Qys bastalysymen elorda tūrǧyndarynyŋ Esıl jaǧalauy jaqqa qarai asyǧatyny ras. Öitkenı onda müiızı qaraǧaidai būǧylar men kök közdı haskiler jegılgen şanaǧa otyryp alyp, mūz üstınde alaŋsyz syrǧanauǧa bolady.
MÜIIZDI ATTRAKSİON
Taŋsyq januar bolǧandyqtan ba, būǧylardyŋ ainalasynan kısı üzılmeidı. Äsırese, balalar jaǧy betı-qolyn qaryǧan aiazǧa qaramastan müiızdı maqūlyqtyŋ ana jerınen bır, myna jerınen bır şyǧyp, retı kelse, sipap qaluǧa tyrysyp jür. Būl äreketterı būǧylarǧa da ūnaityn boluy kerek, kırpık qaqpastan, basyn iıp, sol ornynan qozǧalmaidy. Januarlar ärtürlı aurularǧa qarsy egılgendıkten, olardy sipau qauıptı emes. Tek müiızınen abailau kerek: būǧy oqys qimyldap qalsa, müiızımen abaisyzda süzıp ketuı mümkın.
Būǧylardyŋ iesı Renat Düisembinovtıŋ aituynşa, olar elımızge osydan bes jyl būryn Reseidıŋ Iаmal-Nenes avtonomdy okrugıne qarasty Salehard qalasy maŋynan äkelınıptı. Odan keiın bıraz uaqyt boiy Soltüstık Qazaqstan oblysynda bolyp, Astanaǧa byltyr ǧana kelgen.
Salmaǧy şamamen 140 kelı tartyp, dene-tūrqy 2 metrden asatyn būl būǧylar aua temperaturasy -10 gradustan joǧarylasa boldy, tynystary tarylyp, özderın jaisyz sezıne bastaidy eken.
Sondyqtan olar jazdygünı kondisioner ornatylǧan qoraǧa qamalady.Tundra men taigany mekenıne ainaldyrǧan soltüstık būǧylarynyŋ Astanada ne jep jürgenı de bızge qyzyq boldy.
– Olarǧa sūly sekıldı dändı daqyldardy, qaiyŋ japyraǧyn, keide saŋyrauqūlaqtar beremız. Özderınıŋ arnaiy dietalary bar. Öitkenı tuǧan topyraqtarynda ömır sürıp jatpaǧandyqtan, densaulyqtary myqty boluy üşın tamaq rasiondaryn barynşa bai etuge tyrysamyz, – deidı Renat.
ŞARŞAMAITYN ŞANAŞYLAR
Būǧylarmen bırge sol maŋda Sıbır haskilerı de şauyp jür. Olardyŋ bärı astanalyq jas käsıpker Beiımbet Bäbievke tiesılı eken.
– Bastapqyda bızde Roni atty jalǧyz küşık qana boldy. Ony qalai ösıru kerektıgın YouTube jelısınen ızdep-qarap jürgenımızde, «Haskilend» atty attraksion türın aşu turaly ideia keldı. Ronidıŋ qasyna Reseiden ekı, Burabaidan bır it aldyryp, qalǧandaryn jaldap, qataryn köbeittık. Bügınde mūnda on ekı it «jūmys ısteidı». Olardyŋ ışınde haskilermen bırge malamuttar da bar, – deidı Beiımbet.
İtter özderınıŋ būl «jūmysyna» dän riza sekıldı, öitkenı şanaǧa jegılgenderı bır-bırınen oza şabuǧa tyrysyp, qoldy-aiaqqa tūrmaidy. Är seruen saiyn olar boiyn jazyp qana qoimai, jaŋa dostar da tabady. Öitkenı itterdıŋ qylyqtaryna süisıngen bala-şaǧa şattana aiqailap, olardy qūşaqtap, moiyndaryn qasyp, äbden erkeletedı.
Beiımbettıŋ aituynşa, haskiler de, malamuttar da balaǧa öte jaqyn. Kışkentailar olardy qanşa umajdap, mazasyn alyp jatsa da, onyŋ bala ekenın tüsınıp, sabyr tanytady. Keide mūnda psihologiialyq auytquşylyǧy bar büldırşınder de kelıp, seruendeidı eken. İttermen bırge oinaǧan soŋ olardyŋ da köŋıl küilerı köterılıp, sabalaq jündı januarlarmen qimai qoştasatyn körınedı.
İtter jegılgen şanaǧa otyruǧa kün saiyn 40 şaqty adam keledı. Olardyŋ bärın de haskiler men malamuttar qyŋq demei syrǧanatyp, şat-şadyman äserge toiǧyzyp jıberedı. Osy kezge deiın januarlardyŋ bırde-bır ret jat qylyq körsetıp, «būzyqtyq» jasaǧan kezderı bolmapty. Ärine, kısınıŋ komandasyn tyŋdatu üşın it ielerı bıraz ter tökken.
