Ūlttyq muzeide elorda äkımdıgı men Qazaqstan Jazuşylar odaǧynyŋ astanalyq filialy jäne «Altyn qazyna» qoǧamdyq bırlestıgınıŋ ūiymdastyruymen qala künıne orai «Euraziia astanalarynyŋ qalamgerlerı» atty ekı kündık halyqaralyq forum öttı.
Būl aituly şarada otandyq qalamgerler men 20 elden kelgen aqyn-jazuşylar körkem ädebiettıŋ özektı mäselelerın talqylady.
Forumnyŋ aşyluynda «Nūr-Sūltan» qalasynyŋ äkımı Altai Kölgınov qatysyp, aqyn-jazuşylarǧa ızgı lebızın bıldırdı.
– Bügınde bas qalamyz älemdık ekonomika, dın, saiasat, mädeniet jäne ǧylym ökılderı bas qosyp, maŋyzdy şeşımder qabyldaityn orynǧa ainaldy. Bügıngı ıs-şaranyŋ ötuı – sonyŋ aiǧaǧy. Säuletı men däuletı kelısken elordamyzdyŋ ruhani qalyptasuyna ziialy qauym ökılderı aitarlyqtai ülesın qosuda. Zaŋǧar jazuşy Mūhtar Äuezov «Ädebiet – ardyŋ ısı» degen eken. Ädebiet salasynyŋ örkendeuı, oqyrmandar qyzyǧyp oqityn körkem eŋbekterdıŋ jazyluy – bız üşın asa qajet dünie. Bügıngı forumda älemdık ädebiettıŋ jai-küiı, tıldık mäseleler men qalamgerlerge özek bolyp jürgen dünieler oi-talqysyna tüsedı dep senemın. Sondyqtan alys jäne jaqyn şetelden kelgen aqyn-jazuşylarǧa Qazaq elınıŋ jüregı – Nūr-Sūltan qalasyna qoş keldıŋızder demekpın!» dedı elorda basşysy.
Sondai-aq jiynda Prezident keŋesşısı Marat Sqaqov, Mädeniet jäne sport ministrı Aqtoty Raiymqūlova, Qazaqstannyŋ halyq jazuşysy, Eŋbek Erı Oljas Süleimenov, belgılı jazuşy, Memlekettık syilyqtyŋ iegerı Äkım Tarazi söz alyp, forumǧa qatysuşylarǧa sättılık tıledı.
Jiyn ekı plenaralyq otyrysqa bölınıp, qalamgerler «älemdık ädebiet: stereotipten arylu» jäne «megopolister ömırı: prozadaǧy körınıster» atty taqyrypta oi qozǧady. Qazaqstan Jazuşylar odaǧynyŋ bırınşı hatşysy Ūlyqbek Esdäulet qazaq aqyndarynyŋ antologiiasyn ispan tılıne audarǧan İspaniia PEN-klubynyŋ bas hatşysy Husto Horhe Padronǧa Halyqaralyq «Alaş» syilyǧyn tapsyrdy.
