Elbasy Astana künıne arnalǧan saltanatty qabyldauǧa qatysty.
«Astana EKSPO-2017» körme keşenınıŋ Kongress-ortalyǧynda ötken ıs-şaraǧa Parlament deputattary, Ükımet müşelerı, memlekettık organdardyŋ, diplomatiialyq korpustyŋ, ziialy qauymnyŋ, ısker toptardyŋ jäne mädeniet salasynyŋ ökılderı qatysty.Memleket basşysy barşa jūrtty Astana künımen qūttyqtap, 19 jyl ışınde elımızdıŋ bas qalasy joǧary qarqynmen damyǧanyn atap öttı.
– Astana – ǧajap qala. Keşe keşke qarai qalany aralap şyqtym. Keşkı mezgılge qaramastan, köşede qydyryp jürgen köptegen adamdy kördım. Būl köp närsenı aŋǧartady. Adamdardyŋ köŋıl-küiı jaqsy, özderın qauıpsız sezınedı. Sonau erte zamanda «Qala qabyrǧasymen emes, adamdarymen körıktı» degen söz aitylǧan, – dedı Qazaqstan Prezidentı.Nūrsūltan Nazarbaev Astananyŋ bügıngı damu yrǧaǧy bükıl elımızdıŋ jaŋaruyna serpın beretının aitty.
– Bız ekonomikada, saiasatta jäne mädeniette auqymdy jaŋǧyrudy ıske asyryp kelemız. Sol jūmystyŋ nätijesı elımızdı damytuǧa arnalǧan. Damuymyzdyŋ basynda ärdaiym Astana tūrady. Bız mūnda türlı mäselenı, sonyŋ ışınde älemnıŋ är tükpırınde beibıtşılık ornatu mäselesın de şeşıp kelemız. Bızdıŋ beibıt, tatu körşılık jäne investisiia tartu jönındegı saiasatymyz ärbır Qazaqstan azamaty üşın qolaily jaǧdai jasauǧa baǧyttalǧan, – dedı Elbasy.
Sondai-aq, Qazaqstan Prezidentı «EKSPO-2017» halyqaralyq körmesın ötkızudıŋ maŋyzdylyǧyn jäne onyŋ qalamyz ben elımızdı odan ärı damytudaǧy rölın atap öttı.
– Qazır Qazaqstan «EKSPO-2017» körmesınıŋ arqasynda halyqaralyq qoǧamdastyq nazaryn özıne audartyp otyr. Qonaqtarymyz Astanaǧa tamsana qaraidy. Bız – ǧasyrlar toǧysynda jaŋa megapolis salǧan bırden-bır memleketpız. Bügınde Astana jylyna el biudjetıne trillion teŋge qūiyp keledı. Būl oraida, barlyq kırıstıŋ 65 paiyzy şaǧyn jäne orta biznesten tüsıp otyr. Bärımız bas qalamyzdyŋ qalyptasuynyŋ kuägerı boldyq, – dedı Nūrsūltan Nazarbaev.
Soŋynda Elbasy barşa qazaqstandyqtardy elorda künımen taǧy da qūttyqtap, baq-bereke jäne jaŋa tabystarǧa jetuge tılektestık bıldırdı, sondai-aq Astanany saluǧa atsalysqan azamattarǧa alǧys aitty.
