«Qazaq elı» monumentı aldynda 1 mamyr – Qazaqstan halqy bırlıgı künıne arnalǧan halyqtyq seruen men merekelık konsert öttı. Saltanatty şarany tamaşalauǧa arnaiy kelgen Memleket basşysy Nūrsūltan Nazarbaev el tūrǧyndaryn bırlık merekesımen qūttyqtady.
– Qūrmettı otandastar! Sızderdı bızdıŋ qazaqstandyq brend, halqymyzdyŋ bırlıgı künımen şyn jürekten qūttyqtaimyn. Totalitarlyq rejim kezınde qazaqtyŋ dalasyna 550 myŋǧa tarta soltüstık kavkazdyqtar, millionǧa juyq nemıs pen ūiǧyr, kärıster, ukraindyqtar erkınen tys köşıp keldı. Olardy mūnda kelgen soŋ qūryp ketedı dep eseptese kerek. Bıraq olai bolǧan joq. Jergılıktı qazaq halqynyŋ bauyrmaldylyǧynyŋ arqasynda bız jūdyryqtai jūmylyp, aiaqtan tık tūrdyq, täuelsız memleket qūrdyq. Tatulyqtyŋ arqasynda bız bır baǧytta, bırıkken küşpen ömır sürıp jatyrmyz. Bırlıgımız üilesıp, barlyǧyna qol jetkızıp kelemız. Bügınde damudyŋ daŋǧyl jolyna tüstık. Jyl saiyn adamdardyŋ ömırın jaqsartudy basty nazarda ūstap, türlı baǧdarlamalardy jariia ettık. Mysaly, menıŋ bes bastamamda jas otbasylaryn baspanamen qamtu, tūrǧyn üi şartyn jaqsartu, eldı gazdandyru, salyqty tömendetu siiaqty jūmystar qolǧa alynuda. Däl osy jauapkerşılıktıŋ arqasynda damyǧan 30 eldıŋ qataryna kıru mındetın jüktedık. Osy joldan taimasaq, älı de talai belestı baǧyndyramyz. Bız – bırtūtas halyqpyz, bır-bırımızdı qūrmetteimız ärı jaqsy köremız, ortaq Konstitusiia men zaŋdarǧa baǧynamyz. Al tatu bolu, dos bolu, bır-bırın qūrmetteu – ol ülken baqyt. Sol baqytty qadırlei bıleiık, aǧaiyn! – degen Nūrsūltan Nazarbaev barşa halyqty ärdaiym tatu boluǧa şaqyryp, är otbasyǧa baq-bereke men amandyq tıledı.
Alaŋǧa jinalǧan jūrtşylyqqa «Ruhani jaŋǧyru – bırlık pen tūtastyq negızı» atty astanalyq ūlttyq-mädeni şyǧarmaşylyq ūjym men memlekettık akademiialyq filarmoniianyŋ ärtısterı, otandyq estrada jūldyzdary teatrlandyrylǧan qoiylym ūsynyp, än men küiden şaşu şaşty. Sonymen qatar, körermen qauym Reseiden kelgen Tureskii horynyŋ önerın tamaşalady. Merekelık şarada qazaq küresı, arqan tartys, asyq atu siiaqty ūlttyq sport oiyndary törge şyǧyp, kır tasyn köteru men qol küresten jarys ūiymdastyryldy.
Nūrdäulet KÄKIŞTEGI
