Biyl – Täuelsızdıgımızge şirek ǧasyr tolyp, egemen elımızdıŋ mereiı tasyǧan tarihi jyl. Osyndai şuaqqa toly jyldy elordadaǧy alǧaşqy oqu oryndarynyŋ bırı, talai mamandy baptap ūşyrǧan S.Seifullin atyndaǧy Qazaq agrotehnikalyq universitetı de auyz toltyryp aitar jaqsylyqtarmen aiaqtaǧaly otyr.
Meşın jyly bızdıŋ oqu ordamyz üşın jaily, tabysty, tamaşa jetıstıkterge toly jyl boldy. Elımızdı örge süirep, damuyna tyŋ serpın beretın keleşek mamandardyŋ sapaly bılım aluy ūstaz bılıktılıgı men oqu ornynyŋ ǧylymi-tehnikalyq mümkındıkterıne ǧana emes, sonymen qatar jas tülekterdıŋ äleumettık jaǧdaiyna da bailanysty ekendıgı aian. Osyndaida bır danyşpannyŋ «sanany tūrmys bileidı» degen qanatty sözı oiymyzǧa oralady. Sondyqtan oqu üderısın jaqsartumen qatar, studentterdıŋ äleumettık jaǧdaiyn ünemı nazarda ūstau – bızdıŋ basty maqsattarymyzdyŋ bırı.
Taiau arada Qazaqstan Respublikasy Bılım jäne ǧylym ministrlıgınıŋ qoldauymen universitetke 800 oryndyq jataqhana salynyp, paidalanuǧa berılmekşı. Būl – bız üşın ülken quanyş. Bızde oqyp jatqan tülekterdıŋ köbı – alys auyldan kelgen balalar. Ärine, mūnymen barlyq studentterdı jataqhanamen tolyq qamtimyz dep aita almaimyz. Degenmen mümkındıgımız kelgenşe olardyŋ teŋ jartysyn jataqhanamen qamtamasyz ettık. Äsırese, şalǧaidan kelgen balalardy ornalastyruǧa jaǧdai jasadyq. Ainalyp kelgende, jataqhana problemasy – elordada kün tärtıbınen tüspegen özektı mäselelerdıŋ bırı. Ony da ornyqty şeşu üşın bırqatar jobalardy josparlap otyrmyz.
Sonymen bırge, oqu ordasynda studentterge arnalǧan äleumettık düken, emhana, därıhana jūmys ısteidı. Onyŋ baǧalary da qoljetımdı.
Asyra aitty demeŋız, bas qaladaǧy joǧary oqu oryndary arasynda bızdıŋ universitettıŋ ashanalaryndaǧy taǧamdar baǧasy eŋ tömenı sanalady.
Bızdıŋ memleketımız naryqtyq jaǧdaida ömır sürıp otyrǧandyqtan, älemdık ekonomikanyŋ äserı köp. Soŋǧy jyldardaǧy mūnai baǧasynyŋ tömendeuı bıraz memleketterdıŋ damuyna yqpalyn tigızdı. Bızdıŋ elımız de daǧdarystyŋ aldyn alyp, ekonomikany tūraqty saqtap qalu üşın bırqatar şaralardy qolǧa aldy. Sonyŋ barlyǧy qarapaiym halyqqa oŋai tigen joq. Sondyqtan bügıngı ekonomikalyq jaǧdaidy eskere otyryp, oqu aqysyn ösırmei, byltyrǧy baǧamen qaldyrdyq. Būl da bızdıŋ jastarǧa jasaǧan qamqorlyǧymyz dep oilaimyn.
Biylǧy jaz mezgılınde Memleket basşysynyŋ tapsyrmasy men Astana qalasy äkımdıgınıŋ qoldauymen universitetke Esıldıŋ sol jaǧalauynan 120 päterlı üş qyzmettık jataqhana salynyp, paidalanuǧa berıldı. Bız ony halyqaralyq «Bolaşaq» baǧdarlamasymen jäne akademiialyq ūtqyrlyqpen şetelde oqyp kelgen jas ǧalymdarǧa, ǧylymi jobalary bar magistranttar men doktoranttarǧa berdık. Būl qūrylys nysanyn soŋǧy 30 jylda universitet igılıgı üşın salynǧan bırden-bır ǧimarat deuge bolady.
Sondai-aq, universitet qol qusyryp otyrmai, uaqyt talabyna sai jaŋaşyl jūmystardy qolǧa aldy. Mäselen, byltyrdan bastap elorda janynan 1200 gektar jer alyp, studentter üşın arnaiy täjıribelık şaruaşylyq ūiymdastyrdyq. Oǧan türlı auylşaruaşylyq daqyldaryn: kartop, arpa, bidai, sūly ektık. Alǧaşqy önım jaman bolǧan joq. Universitet äleumettık jaǧynan az qamtylǧan adamdarǧa kömek retınde bırneşe tonna kartopty tegın taratty. Bız üşın būl da ülken jetıstık. Aldaǧy jyly et, kökönıs önımderınıŋ türlerın arttyru oiymyzda bar. Būl kampusty bolaşaqta zamanaui tehnikalarmen qamtamasyz etemız. Ärı ǧylym jolynda jürgen mamandar sol jerde özderınıŋ ǧylymi-zertteu jūmystaryn jürgızedı.
Ärine, mūnymen bız bärın tyndyryp tastadyq dep aita almaimyz. Älı oiymyzda jürgen maqsat ta, mındet te köp.
Öz basym Astana qalalyq mäslihatynyŋ ekı märte sailanǧan deputaty retınde elorda tūrǧyndarymen jiı kezdesemın. Olardyŋ tūrmys-tırşılıgı men äleumettık jaǧdailaryna şamam jetkenşe qoldau körsetıp kelemın. Äsırese, jūrtşylyqty tūrmystyq-şaruaşylyq mäselelerı köbırek mazalaidy. Tūrǧyndar kötergen bırqatar problemalar da oŋ şeşıldı.
Tüiındep aitqanda, bilıkte otyrǧan azamat üşın halyqtyŋ qyzmetşısı boludan artyq märtebe joq. Elmen bırge körgen jaqsylyqtyŋ qaiyrymy da mol bolady. Dauylpaz aqyn, daryndy qairatker Säken atamyzdyŋ esımın ielengen oqu ordasynyŋ biylǧy jyly jetken jetıstıkterı yntymaǧy jarasqan ūjymǧa tyŋ küş, sony serpın, jaŋa ızdenıster syilady dep oilaimyn. Aldaǧy taŋda da osy ürdısten tanbai, ılgerılei bereiık degım keledı.
A.Kürışbaev,
S.Seifullin atyndaǧy
Qazaq agrotehnikalyq universitetınıŋ rektory, Astana qalasy mäslihatynyŋ deputaty
