Elordada qala äkımınıŋ orynbasary Baqtiiar Mäkennıŋ medisina ūiymdarynyŋ basşylarymen keŋesı öttı. Kezdesu barysynda ındet jaiy talqylandy.
Karantin şaralary men ambulatoriialyq emdeudı küşeitu nätijesınde emhanalarda epidemiologiialyq ahual jaqsaryp, pnevmoniianyŋ taralu qarqynynyŋ tömendegenı baiqalady.
Sondai-aq karantin kezınde, iaǧni 6 şıldeden bastap stasionarlarda emdelıp jatqan nauqastar sany 4,4 ese azaiyp, tösek-oryn qorynyŋ jüktemesı 90 paiyzdan 25 paiyzǧa deiın tömendedı. COVID-19 infeksiiasy rastalyp, auruhanaǧa jatqyzylǧandar sany 4,3 ese azaidy. Pnevmoniiamen auyratyn nauqastar sany bes ese kemıdı. Jedel järdem şaqyru sany 3 myŋnan 1 myŋǧa deiın tömendedı.
Bügınde qalada 12530 ındet jūqtyrǧandar tırkelıp, onyŋ ışınde 9629 adam (76 paiyz) emdelıp şyqty.
Keŋes qorytyndysy boiynşa qala äkımınıŋ orynbasary Baqtiiar Mäken Qoǧamdyq densaulyq saqtau basqarmasy men medisina mekemelerınıŋ basşylaryna azamattar tarapynan şaǧym tudyrǧan nauqastarǧa arnalǧan elektrondy medisinalyq servis – DamuMed qosymşasy monitoringın tūraqty negızde jürgızıp, sapaly servis ūsynuyn qamtamasyz etudı tapsyrdy.
– Būl mäsele DamuMed aqparattyq jüiesınıŋ jetılmegenı, sondai-aq körsetılgen qyzmet turaly därıgerlerdıŋ jazbasyn keş engızumen bailanysty. Nūr-Sūltan qalalyq Qoǧamdyq densaulyq saqtau basqarmasy osy baǧdarlamanyŋ äkımşılıgımen bırlesıp ärbır naqty jaǧdaiǧa taldau jürgızedı. Sonymen qatar qazırgı uaqytta qarjylyq paida alu maqsatyndaǧy jalǧan jazbalardyŋ naqty faktılerı tırkelgen joq, – dep habarlady qalalyq Qoǧamdyq densaulyq saqtau basqarmasy.
Naima NŪRALYQYZY
