Education For All inkliuzivtı bılım beru ortalyǧy Nazarbaev universitetınıŋ kampusynda ekınşı jyl qatarynan jūmys ıstep keledı. Bılım beru qyzmetımen qatar atalǧan ortalyq inkliuzivtı teatr jobasyn da jürgızedı, bügınde olardyŋ repertuarynda bırneşe pesa men miuzikl bar.
Būl ūiymdy Nazarbaev universitetındegı Gumanitarlyq jäne äleumettık ǧylymdar mektebınıŋ tülegı Kämila Rolan aşqan. Onyŋ aituynşa, elımızde 70 myŋnan asa bala mügedek statusy boiynşa tırkeude tūr. Olardyŋ 20 paiyzy jalpy bılım beretın mektepterge barsa, qalǧandary üide oqytylady. Al būl jait jetkınşekterdıŋ kommunikasiialyq qabıletterınıŋ damuyna, dostar tabuyna, bäsekege qabılettı bılım aluyna kedergı tuǧyzatyny anyq.
– Men 2012 jyldan berı Qyzyl Jarty Ai qoǧamynyŋ volonterı retınde tūrmysy tömen otbasylar men migranttardyŋ balalaryn oqytu jönındegı jobamen ainalystym. Tört jyldan keiın inkliuzivtı bılım beru salasynda magistratura baǧdarlamasyna tüsudı şeştım. Būl men üşın atalǧan bılım beru modelın engızudegı problemalardy tolyqtai tüsınuge jäne olardy jeŋude kerek qarym-qabıletterdı meŋgeruge köp kömektestı. Jeke ükımettık emes sektorda Qazaqstan üşın jaŋa täjıribelerdı barynşa erkın qoldanuǧa bolatynyn tüsıngen soŋ, Education For All atty qoǧamdyq ūiymdy aştym, – deidı Kämila.
Qazırgı taŋda ortalyqta Daun sindromy bar balalar, autizmmen auyratyn ūl-qyzdar, giperbelsendı jasöspırımder jäne tūrmysy tömen otbasydan şyqqan jetkınşekter oqytyluda.
– Qoǧamnyŋ bükıl müşelerınıŋ mümkındıkterı teŋ boluy kerek. Osy maqsat – menı jäne menıŋ komandamdy şabyttandyratyn eŋ negızgı küş, – dep aǧynan jarylady Kämila. – Bırde öz jūmysymyzdy tanystyru üşın press-konferensiia ūiymdastyryp, jurnalisterdıŋ sūraqtaryna jauap berıp jatqanymda, zalda otyrǧan erekşe balanyŋ anasy közıne jas aldy. Ol bızdıŋ älgı balaǧa pasient nemese üirenuı qiyn mügedek adam retınde emes, ülken potensialy bar tūlǧa retınde qaraǧanymyz üşın jylaǧan edı. Menıŋ sonda jüregım şym ete tüstı. Mektepte bılım alu qūqyǧy barlyq azamat üşın qalypty jaǧdai boluy kerek qoi. Aldaǧy uaqytta men osyǧan jol aşqym keledı.
