Elordadaǧy Jastar saraiynda kezektı bos jūmys oryndary järmeŋkesı öttı. «Eŋbek mobildılıgı ortalyǧy» ūiymdastyrǧan järmeŋkege 80-ge juyq jūmys beruşı qatysyp, 700-den astam bos jūmys ornyn ūsyndy.
Jūmyssyz azamattardy, probasiia qyzmetınde esepte tūrǧan adamdardy, NEET sanatyndaǧy jastardy jūmyspen qamtuǧa järdemdesude bos jūmys oryndary järmeŋkesı tiımdı. Mūnda qūrylys, bılım, medisina, sauda, kölık-logistika, qarjy salasynyŋ kompaniia ökılderı kelıp, käsıporynnyŋ mümkındıgın tanystyryp, bılıktı kadrlardy aluǧa mümkındıgı bar.
«Biyl jyl basynan berı Mansap ortalyǧynyŋ bastamasymen 8 ırı jalpyqalalyq bos oryndar järmeŋkesı ötkızıldı. Bügıngı ırı järmeŋke – biylǧy soŋǧy ıs-şara. Qalada 27 şaǧyn bos oryndar järmeŋkesı de ötedı. Jyl soŋyna deiın sondai 3 järmeŋkenı ūiymdastyru josparlanyp otyr. Būl jolǧy ıs-şaraǧa 78 kompaniia 773 vakansiia ūsyndy. Mūnda jūmys oryndar ışınde qyzmet körsetu salasynda bos jūmys orny basym. Järmeŋke jūmys beruşı men jūmys ızdep jürgen adamǧa ülken mümkındık beredı. Qajettı jūmys ızdep jürgen adam özınıŋ tüiındemesın bırneşe jūmys beruşıge ūsynyp, tıkelei tıldesse, jūmys beruşı de järmeŋke kezınde özderıne qajettı mamandaryn tez tabady» dedı Mansap ortalyǧynyŋ basşysy Baǧila Orynbetova.
Järmeŋkede jūmys ūsynǧan kompaniia ökılderı qatarynda «Otbasy bank» AQ, «Sentr ipoteki Astana» JŞS, «QazaqZher» JŞS, «Astana Tazalyq» JŞS, «Bank SentrKredit» AQ, «Clean City NC» JŞS, «Astyq Logistik» JŞS, «Magnum» sauda jelısı, sondai-aq qalalyq bılım beru ūiymdary jäne basqa da köptegen jūmys beruşı kompaniialar qatysty. Solardyŋ qatarynda Astana qalasynyŋ Polisiia departamentı bar. Polisiia qyzmetkerı Rüstem Bolatov jūmys ızdeuşılerge ışkı ıster organdaryna qyzmetke kıru tärtıbı, sondai-aq materialdyq qamtamasyz etu jäne äleumettık kepıldıkter turaly barlyq qajettı aqparat berıletının aitty.
«Bos oryndar järmeŋkesıne Polisiia departamentı tūraqty türde qatysyp keledı. Negızınen, bos oryndar polisiia qyzmetkerı, jürgızuşı, patruldık polisei, jyldam qimyldaityn arnaiy jasaqqa ırıkteu jürgızılude. Qalalyqtar arasynda būl qyzmetke ornalasuǧa sūranys köp. Negızgı eskerıletın talaptardyŋ qatarynda jūmys ızdeuşınıŋ jasy 35-ten aspauy tiıs, orta arnauly nemese joǧary bılımınıŋ boluy qajet. Memlekettık qyzmetten testen jäne arnaiy medisinalyq tekserısten ötıp, dene şynyqtyru boiynşa synaqtardy tapsyrǧandar jūmysqa qabyldanady» dedı ol.
Öz tüiındemesın ūsynǧandar arasynda jastardyŋ denı basym boldy. L.Gumilev atyndaǧy Euraziia ūlttyq universitetınıŋ turizm jäne servistık qyzmet körsetu mamandyǧynyŋ boiynşa oqyp jürgen Jalǧas Abylaihan bylai dedı:
«Osy jyly bıtıruşı tülek bolǧannan keiın, jūmysty, bırınşıden, öz mamandyǧym boiynşa qarastyryp jatyrmyn. Iаǧni qyzmet körsetu salasyndaǧy jūmys özıme qyzyq. Bırneşe kompaniiaǧa özımdı ūsyndym. Jastarǧa arnalǧan bos jūmys oryndary järmeŋkesıne osyǧan deiın de qatystym».
Järmeŋke barysynda «Eŋbek mobildıgı ortalyǧynyŋ» mamandary «Jastar praktikasy», «Alǧaşqy jūmys», «Ūrpaqtar kelısımşarty» baǧdarlamalar käsıptık oqytu jäne «enbek.kz» portalymen jūmys ısteu boiynşa keŋes beru, qaita daiarlau, jūmys ızdeu tehnologiiasy jäne qosymşa käsıbi bılım beru mümkındıkterı turaly keŋes berıldı.
