Elordada jūmyssyz jürgen qala tūrǧyndarynyŋ jūmys tauyp, qarjylyq jaǧdaiyn jaqsartuǧa mümkındık beretın «JOLTAP» jobasy qyzu jürıp jatyr, dep habarlaidy astana-akshamy.kz
Bügınde joba aiasynda 2 myŋnan astam elorda tūrǧyny türlı mamandyqtar boiynşa oqytu kurstarynan ötken. Al oqytu baǧdarlamalary eŋbek naryǧynyŋ sūranystaryna süiene otyryp jasalǧan. Oqytu kursynan ötıp, joba arqyly jūmys tapqandardyŋ bırı – elordalyq Tölebi Tūrsynbaev. Barista mamandyǧyn meŋgergen qala tūrǧyny baǧdarlama turaly kezdeisoq bılgenın aitady.
«Men özım elordaǧa Türkıstan qalasynan keldım. Negızı qarjyger mamandyǧy boiynşa diplomym bar. Bıraq ol salada jūmys ıstegen joqpyn. Tek tūrmystyq tehnikalardy jöŋdeu ısımen ainalastym. Būl joba turaly kezdeisoq bıldım dep aitsam bolady. Astanada adam köp jinalatyn oryndarda osyndai punkterdıŋ aşylyp jatqanyn körıp jürdım. Bır künı jai qyzyǧuşylyq tanytyp, kırıp kördım. Al ışte otyrǧan qyzmetkerler maǧan qandai mamandyqqa oquǧa bolatynyn aityp berdı. Barlyq şarttardy tüsındırdı. Sodan barista mamandyǧyn taŋdadym», – deidı qala tūrǧyny.
30 jastaǧy Tölebi Tūrsynbaev soŋǧy kezde tanymaldylyqqa ie bolyp jatqan mamandyq boiynşa būryn da az uaqyt jūmys ıstep körgenın aitady. Bıraq bıraz jyldyq üzılısten keiın «JOLTAP» jobasy boiynşa bılım alu kezınde käsıbi mamandardan iısı aŋqyp, dämı tıl üiıretın kofe jasaudy qaita meŋgergen.
«Oqytu kursy säuır aiynda boldy. Bes kün ışınde baristanyŋ negızgı qyzmetterın üirettı. Kurs öte jaqsy öttı, barlyǧy tüsınıktı boldy. Būryn mende barista qyzmetınde az da bolsa täjıribe bolǧandyqtan, negızgı jūmys barysyn tez eske tüsırdım dep aitsam bolady. Kurs bıtken soŋ bırden jūmys taptym. Ärine, aldymen synaq merzımı boldy. Al resmi türde jūmysqa tez ornalastym. Şynymdy aitsam, barista boludy armandaǧan joqpyn. Bıraq kofemanmyn dep aita alamyn. Jalpy mūndai jūmys menıŋ köŋılıme jaqyn. Jaily jäne şyǧarmaşylyq erkındık bar», – deidı ol.
Bügınde aramyzda keiıpkerımız siiaqty bar mümkındıktı paidalanyp, jūmysqa ornalasqan tūrǧyndar köp. Biyl elordada osy joba boiynşa 10 myŋ tūrǧyndy jaŋa mamandyqtarǧa oqytu josparlanyp otyr.
Aita keteiık, qatysuşylardyŋ taŋdauyna 14 mamandyq ūsynylǧan. Al oqytu baǧdarlamalary mamandyqqa bailanysty 2 aptadan 1 aiǧa deiın barynşa qysqa merzımde praktikalyq daǧdylardy ūsynuǧa baǧyttalǧan. Joba arqyly oqyǧysy nemese aqyl-keŋes, baǧyt-baǧdar alǧysy keletın kez kelgen azamatqa qalanyŋ adam köp jinalatyn oryndarynda ornalasqan «Barşaǧa mümkındık» moduldık punktterınde tegın keŋes berıledı.
