Elbasy Joldauynda käsıptık-tehnikalyq baǧdardy damytuǧa bailanysty bırqatar tapsyrmalar jüktegenı belgılı. Osyǧan bailanysty keşe Qazaqstan Respublikasynyŋ Memlekettık hatşysy Gülşara Äbdıqalyqova İndustrialdyq park aumaǧynda ornalasqan «QazTehEkspo» sauda-öndırıstık keşenıne baryp, osynda atqarylyp jatqan jūmystarmen tanysty. Şaraǧa QR Bılım jäne ǧylym ministrı Erlan Saǧadiev, Densaulyq saqtau jäne äleumettık damu vise-ministrı Bırjan Nūrymbetov, İnvestisiialar jäne damu vise-ministrı Albert Rau men Astana qalasy äkımınıŋ orynbasary Ermek Amanşaev qatysty.
Jalpy būl öndırıs orny jaŋa tehnologiialardy qoldana otyryp, maşina jasau jäne toqyma önerkäsıbı boiynşa dualdy oqytu prosesıne, käsıptık standarttar men bılım baǧdarlamalaryn äzırleuge belsene qatysady. Mysaly, keşende tıgın jäne toqyma būiymdaryn qolma-qol daiyndap şyǧaratyn käsıporyn bar. Mūnda «Zoje» brendınıŋ zamanaui tıgın qondyrǧylary ornatylǧan. Öndırıstı jaŋaşyl käsıpker Säule Baqtaiqyzy basqarady. Ol joǧary oqu oryndary men kolledj jastaryna kiımdı qalai tıgıp, pışudı, jaŋa qondyrǧylarmen qalai jūmys ısteu kerektıgın jan-jaqty üiretedı.
Būdan keiın sauda-öndırıstık keşenı ūjymynyŋ aldynda söz söilegen Memlekettık hatşy 2015-2019 jyldarǧa arnalǧan industrialdyq-innovasiialyq damudyŋ memlekettık baǧdarlamasy şeŋberınde ekonomikanyŋ alty negızgı salasy boiynşa 10 kolledj ben 10 joǧary oqu orny tehnikalyq jäne käsıptık-tehnikalyq baǧdar boiynşa bılıktı kadrlardy daiyndaudy qolǧa alǧanyn, būl täjıribe elımızdıŋ basqa da oqu oryndarynda qoldanylatynyn atap öttı.
Memlekettık hatşy Elbasynyŋ 2017 jyldan bastap, tegın käsıptık bılım berudı engızu jönındegı tapsyrmasyn jüzege asyru maqsatynda elımızdıŋ toǧyz öŋırınde 5-11-synyp aralyǧyndaǧy 20 myŋnan astam oquşyny qamtityn 29 oqu-ädıstemelık kombinat jūmys ıstei bastaǧanyn jetkızdı. «Elımız ozyq otyz eldıŋ qataryna qosyluǧa talpynyp otyr. Būl maqsatqa jetu üşın ūrpaǧymyz jan-jaqty bılımdı ärı öz ısın şeber meŋgergen maman boluy qajet» dedı ol.
Jiynnyŋ soŋynda Memlekettık hatşy Gülşara Äbdıqalyqova Prezidenttıŋ tapsyrmasyn oryndau jönınde naqty tapsyrmalar berdı.
Q. TOQTAMŪRAT, astana-akshamy.kz
