Elbasy Nūrsūltan Nazarbaev «Qazaqstan joly-2050: bır maqsat, bır müdde, bır bolaşaq» atty Joldauynda eŋ basty mındet – halyqty jūmyspen qamtu jäne mümkındıgı şekteulı adamdar üşın kedergısız keŋıstık ūiymdastyru ekendıgın atap ötken edı. Osy tapsyrmany oryndau maqsatynda «Kedergısız keleşek» jobasy qolǧa alynyp, bügınde memleket, azamattyq sektor, biznes ökılderı mümkındıgı şekteulı jandardy belsendı äleumettık ortaǧa tartu mäselesın bırlesıp şeşuge belsene kırıstı.
«Kedergısız keleşek» jobasy densaulyǧyna bailanysty mümkındıgı şekteulı azamattardyŋ ömır sapasyn arttyruǧa, onyŋ ışınde tūraqty jūmys oryndaryna jūmysqa ornalastyruǧa, kedergısız orta qūruǧa, mügedekterdıŋ qūqyn tiımdı jüzege asyru üşın qūqyqtyq keŋıstık qalyptastyruǧa baǧyttalǧan. Būl rette Astanada atqarylyp jatqan jūmystar az emes. Osy jönınde «Halyqqa qyzmet körsetu ortalyǧy» RMK Astana qalasy boiynşa filialynyŋ direktory Gülmira Bäbenova äŋgımeleidı.
–Bügıngı taŋda qaladaǧy halyqqa qyzmet körsetu ortalyqtarynda qanşa mügedek jan jūmys ısteidı?
– Qazırgı kezde Elbasy tapsyrmasyn basşylyqqa ala otyryp, halyqqa qyzmet körsetu ortalyqtary mügedekterdı jūmysqa tartuda. Astana qalasy boiynşa halyqqa qyzmet körsetu ortalyqtarynda bügıngı künı 6 mügedek jūmys ısteidı. Mügedek qyzmetkerlerge bızdıŋ ortalyqta qysqartylǧan, iaǧni aptasyna 36 saǧattan aspaityn jūmys uaqyty közdelgen. Osylaişa, mügedektıgı bar HQKO qyzmetkerı jūmysta künıne 6 saǧattan aspaityn uaqyt ötkızedı.
– Aldaǧy uaqytta olardyŋ qatary arta ma?
– İä, jyl soŋyna deiın Astana qalasy boiynşa halyqqa qyzmet körsetu ortalyqtarynda olardyŋ sanyn 21 adamǧa deiın arttyru josparlanyp otyr. Mümkındıgı şekteulı bolǧanmen, būl adamdardyŋ basqalarmen qūqyǧy bırdei. Osyny eskere otyryp, keleşekte mümkındıgı şekteulı azamattardyŋ äleumettık mäselelerı men olarǧa kedergısız keŋıstık ornatu baǧytyndaǧy ıs-şara¬lardy jalǧastyratyn bolamyz.
– Jyl basynan berı HQKO-da qanşa memlekettık qyzmet körsetıldı?
– Jyl basynan berı Astana qalasy boiynşa halyqqa qyzmet körsetu ortalyqtarynda 1 302 238 qūjat qabyldandy jäne azamattarǧa 1 341 458 qūjat berıldı. Astana qalasy boiynşa halyqqa qyzmet körsetu ortalyǧynyŋ mobildık toby jyl basynan berı bırınşı jäne ekınşı sanattaǧy 88 mügedekke tūraqty mekejailaryna baryp memlekettık qyzmet türlerın körsettı.
Jalpy, halyqqa qyzmet körsetu ortalyǧy mümkındıgı şekteulı adamdardyŋ memlekettık qyzmetter aluy üşın qajettı jaǧdailar jasauǧa basa nazar audarady. Osy maqsatta är ortalyqta mügedekterden qūjattar qabyldau üşın jeke jūmys oryndary bölındı, sondai-aq, pandustar men şaqyrtu batyrmalary ornatylǧan.
Gülbarşyn ÖKEŞQYZY
