Keşe Memleket basşysynyŋ töraǧalyǧymen Ükımettıŋ keŋeitılgen otyrysy öttı. Jiynǧa Qazaqstan Respublikasy Parlamentı Senaty men Mäjılısınıŋ töraǧalary, Premer-Ministr, Memlekettık hatşy, Prezident Äkımşılıgınıŋ Basşysy, Ükımet müşelerı, Astana men Almaty qalalarynyŋ jäne oblystardyŋ äkımderı, Qazaqstan Prezidentıne tıkelei esep beretın ortalyq memlekettık organdardyŋ basşylary qatysty. Otyrysty aşqan Nūrsūltan Nazarbaev elımızdı damytu barysynda ötken jyly qol jetkızılgen nätijelerge toqtalyp, memlekettık jäne salalyq baǧdarlamalardy ıske asyrudyŋ maŋyzdylyǧyn atap öttı.
Basqosu barysynda Premer-ministr B.Saǧyntaev, Qarjy ministrı B.Sūltanov, Ūlttyq bank töraǧasy D.Aqyşev, Premer-ministrdıŋ orynbasary A.Jūmaǧaliev, «Atameken» ūlttyq käsıpkerler palatasynyŋ basqarma töraǧasy A.Myrzahmetov, Qaraǧandy oblysynyŋ äkımı E.Qoşanov jäne Qyzylorda oblysynyŋ äkımı Q.Köşerbaev baiandama jasady.
Elbasy oryndalǧan mındetterdıŋ nätijelerıne toqtalyp, baiandamaşylardyŋ nazaryn bank sektoryndaǧy problemalarǧa, sondai-aq sifrlandyru baǧdarlamasynyŋ maqsattaryn tüsındıru, biudjet qarajatyna baqylaudy küşeitu, baqylaityn memlekettık organdardyŋ tarapynan şaǧyn jäne orta biznestı tekseru jūmystaryn qysqartu mäselelerıne audardy.
Memleket basşysy jasalǧan baiandamalardan keiın syrtqy tūraqsyz faktorlar jaǧdaiynda Ükımet, Ūlttyq bank jäne öŋır äkımderınıŋ elımızdı damytu jönındegı ornyqty körsetkışterge qol jetkızu jolyndaǧy jūmystaryna oŋ baǧa berdı.
Sonymen qatar, Qazaqstan Prezidentı būǧan deiın qabyldanǧan baǧdarlamalyq qūjattardy ıske asyrudyŋ jäne olarǧa bölıngen biudjet qarajatyn igerudıŋ tiımdılıgın arttyru qajet ekenın aitty.
– Älemnıŋ ozyq damyǧan 30 elınıŋ qataryna qosylu üşın belsendı jūmys ısteu kerek. Qajettı barlyq baǧdarlamalyq qūjattar qabyldanyp, zaŋnamaǧa tiıstı özgerıster engızıldı. İnstitusionaldyq reformalar jüzege asyryluda. Bız elımızdıŋ Üşınşı jaŋǧyruyn jariialap, ekonomikamyzdy sifrlandyruǧa kırıstık. Damu ürdısın jedeldetu qajet, – dedı Nūrsūltan Nazarbaev.
İNDUSTRİIаLANDYRU
Memleket basşysy industriialandyru jyldary elımızdegı öŋdeu sektorynyŋ damyǧanyn atap ötıp, onyŋ ekonomikadaǧy ülesın arttyru jönınde şaralar qabyldaudy tapsyrdy.
Sondai-aq, Elbasy öndırıske ozyq tehnologiialardy engızıp, käsıporyndardyŋ eksportqa baǧyttalu mümkındıkterın arttyru mäselelerıne toqtaldy.
– Memlekettık qoldau, eŋ aldymen, ozyq tehnologiialardy engızetınder men eksporttyq önım öndıretınderge körsetıluı qajet. Öŋdeu önerkäsıbınıŋ ozyq ösımın qamtamasyz etu üşın neǧūrlym belsendı şaralar qabyldau kerek, – dedı Qazaqstan Prezidentı.
Nūrsūltan Nazarbaev qazırgı arnaiy ekonomikalyq aimaqtardyŋ tiımdılıgın zertteudı tapsyryp, jaŋa ekonomikalyq aimaqtar qūruǧa uaqytşa tyiym saldy.
Otyrys barysynda mūnai-gaz sektoryndaǧy öŋdeu jäne «Samūryq-Qazyna» ūlttyq äl-auqat qoryn transformasiialau mäselelerı talqylandy.
– Mūnai men gaz öŋdeu maŋyzdy baǧyt bolyp sanalady. Onyŋ üstıne eldı janar maimen qamtu mäselesı jiı köterıledı. Tıptı, 3 zauytty jaŋartqannyŋ özınde Qazaqstandaǧy janar-jaǧarmai tapşylyǧyn 3-4 jylǧa ǧana toqtata alamyz. İntegrasiialanǧan gaz-himiia keşenınıŋ qūrylysy jönınde maǧan 2009 jyly baiandalǧan bolatyn. Sodan berı jobanyŋ qūny 6-dan 9 milliard dollarǧa deiın östı. Aiaqtau merzımı 2016 jyldan 2024 jylǧa şegerıldı, – dedı Qazaqstan Prezidentı.
Nūrsūltan Nazarbaev «Samūryq-Qazyna» ūlttyq äl-auqat qorynyŋ naqtylanǧan strategiiasy men transformasiialau baǧdarlamasy boiynşa Qordy basqaru jönındegı mäselenı Keŋestıŋ kün tärtıbıne qoiudy tapsyrdy.
«NŪRLY JOL» MEMLEKETTIK BAǦDARLAMASY
Memleket basşysy avtomobil joldarynyŋ qūrylysyna bölınetın qarjynyŋ tiımdı ärı jariialy türde paidalanyluyn baqylau qajettıgın aitty.
Qazaqstan Prezidentı bırınşı kezekke jatpaityn respublikalyq joldarǧa bölıngen qarjyny öŋıraralyq jäne audanaralyq jol qūrylystaryna qaita baǧyttaudyŋ maŋyzdylyǧyna nazar audardy.
«NŪRLY JER» MEMLEKETTIK BAǦDARLAMASY
Nūrsūltan Nazarbaev öŋırdegı tūrǧyn üi qūrylysynyŋ nätijelerıne toqtalyp, memlekettık baǧdarlamanyŋ odan ary jüzege asyrylu mehanizmderın qaita qarau kerektıgın atap öttı.
– Soŋǧy ekı jylda tūrǧyn üi qūrylysyna 550 milliard teŋge bölındı. Mūnyŋ bärı äkımder ainalysyp jatqan qūrylysty tıkelei qarjylandyruǧa jūmsaldy. Daǧdarys jyldarynda būl qadam aqtaldy. Endı naryqtyq mehanizmderdı paidalanuǧa köşu kerek. Qūrylysty bankter qarjylandyryp, al Ükımet, Ūlttyq bank jäne äkımder tūrǧyn üi qūnynyŋ arzandauy üşın jaǧdai jasauy qajet, – dedı Memleket basşysy.
«100 NAQTY QADAM» ŪLT JOSPARYN ISKE ASYRU
Qazaqstan Prezidentı Ükımetke import boiynşa elektrondyq deklarasiialaudy engızu jäne tekseruşı baqylau-qadaǧalau organdarynyŋ sanyn qysqartu mäselesın baqylauǧa aludy tapsyrdy.
Būdan bölek, Nūrsūltan Nazarbaev elektr energiiasy qūnyn tömendetu maqsatymen «Bıryŋǧai satyp aluşy» modelın engızu jäne öŋırlık elektr jüielerı kompaniialaryn ırılendıru barysyna toqtaldy.
Memleket basşysy Premer-
ministrge öŋdeu salasyna transūlttyq kompaniialardy tartu jönındegı jūmystardy baqylauǧa aludy tapsyryp, «Qazaq İnvest» jäne «Qazaq Eksport» kompaniialarynyŋ maŋyzdy röl atqaratynyn atap öttı.
Otyrys barysynda agroönerkäsıp sektoryndaǧy jobalardy ıske asyruǧa investorlardy tartu mäselesı men «Astana» halyqaralyq qarjy ortalyǧyn ıske qosu jönınde aldaǧy uaqytta atqarylatyn jūmystar talqylandy.
Sonymen bırge, Qazaqstan Prezidentı özın-özı jūmyspen qamtyǧandar jaiyna toqtalyp, olardyŋ mındettı äleumettık medisinalyq saqtandyru baǧdarlamasyna qatysu mäselesın atap öttı.
– Densaulyq saqtau salasyndaǧy reformany tejep otyrǧan taǧy bır jäit sifrlandyru mäselesıne bailanysty. Osy künge deiın elektrondy densaulyq pasporty jasalmai otyr, därıgerler qūjattamany qaǧaz jüzınde jürgızıp keledı. Jergılıktı jerlerde medisina mekemelerı kompiuterlermen tolyq jabdyqtalmaǧan, internet qoljetımdı emes. Būl – äkımderdıŋ jauapkerşılıgındegı mäsele, – dedı Memleket basşysy.
QOǦAMDYQ SANANY JAŊǦYRTU
Nūrsūltan Nazarbaev öŋırlerdegı keibır basşylardyŋ «Ruhani jaŋǧyru» baǧdarlamasyn ıske asyruǧa salǧyrt qarap, oǧan jüielı ärı tyŋǧylyqty kırıspei otyrǧanyn atap öttı.
– Belgılengen mındetterdı jüzege asyru üşın özınıŋ bar mümkındıgın paidalanbai otyrǧan öŋırler bar. Qoǧamdyq sanany jaŋǧyrtu bır jylmen şektelmeidı. Būl jüielılıktı, ünemı jaŋa täsıl ızdeudı talap etetın ūzaq merzımdı jūmys, – dedı Qazaqstan Prezidentı.
Sondai-aq jiynda qazaq tılınıŋ latyn qarpıne köşu mäselesı de talqylandy.
ZAŊ ÜSTEMDIGIN QAMTAMASYZ ETU JÄNE SYBAILAS JEMQORLYQPEN KÜRES
Memleket basşysy müddelı memlekettık organdarǧa qylmystyq prosestegı asyra qudalauşylyqty bäseŋdetıp, ony ızgılendıru baǧytyn jalǧastyrudy tapsyrdy.
Nūrsūltan Nazarbaev sybailas jemqorlyqpen küres jürgızu ısınde aldyn alu şaralaryn jüielı türde qabyldau basty mındet boluǧa tiıs ekenın aitty.
– Soŋǧy 2 jyldyŋ ışınde ǧana sybailas jemqorlyǧy üşın ekı myŋnan astam lauazymdy tūlǧa qylmystyq jauapkerşılıkke tartyldy. Solardyŋ arasynda ministrler de, türlı deŋgeidegı äkımder de, vedomstvo basşylary da bar. Atap aitqanda, būrynǧy Ūlttyq ekonomika ministrıne, «Qazaqavtojol» käsıpornynyŋ bas direktoryna qatysty qylmystyq ıster sotta qaraluda. Sybailas jemqorlyqpen küres jürgızu ısınde aldyn alu şaralaryn jüielı türde qabyldau basty mındet boluǧa tiıs, – dedı Qazaqstan Prezidentı.
Jiyn soŋynda Memleket basşysy biylǧy Joldaudyŋ barlyq basymdyqtaryn ıske asyrudyŋ maŋyzdylyǧyna toqtalyp, olardy oryndau üşın ärbır basşyǧa jauapkerşılık jükteletının atap öttı.
– Joldauda törtınşı önerkäsıptık revoliusiia jaǧdaiynda atqaryluǧa tiıs 10 naqty mındettı belgıledım. Prezident Äkımşılıgı, Ükımet, Parlament, äkımder, «Atameken» ūlttyq käsıpkerler palatasy jäne ūlttyq holdingter tiıstı jūmys jürgızuı qajet. Bügın men eskerıluge tiıs taǧy bırqatar mäselenı aiqyndadym. Jürgızılıp jatqan konstitusiialyq reforma men kürdelı geosaiasi ahual jaǧdaiynda barlyǧymyz belsendı ärı jūmyla jūmys ısteuımız kerek, – dedı Nūrsūltan Nazarbaev.
