«Köktal-1» tūrǧyn alabynyŋ tūrǧyndary köpten berı eldı mekende kükırtsutek şyǧaryndylarynyŋ belgılengen şamadan asyp, auaǧa taralu mäselesın köterıp kele jatyr. Jaqynda Astana qalasy mäslihatynyŋ deputattary Bauyrjan Smaiylov pen Tabiǧat Zeinulqabden, Saryarqa audanynyŋ äkımı Bauyrjan Eraly, «Qazgidromet» käsıporny men SES ökılderı köktaldyqtarmen kezdesıp, osy mäselenı talqylady.
Tabiǧat Zeinulqabden «Astana su arnasy» käsıpornynyŋ bas direktory qyzmetın atqarady. Ol eldı mekende qosymşa süzgılerdı ornatuǧa uäde berdı. Sondai-aq Älkei Marǧūlan atyndaǧy №40 mektep-lisei maŋaiynda kükırtsutek şyǧaryndylarynyŋ auaǧa taraluyn azaitatyn korpus salynatyn boldy. Kezdesude qala biudjetınen süzgılerdı tūraqty auystyryp otyruǧa qarajat bölu mäselesı köterıldı.
«Men būl mäselenı erekşe baqylauǧa alamyn. Bıraq maǧan būl jaǧdaida qalanyŋ Otyn-energetikalyq keşenı jäne kommunaldyq şaruaşylyq basqarmasynyŋ ūstanymy tüsınıksız. Basqarmanyŋ bırde-bır ökılı kezdesuge qatysqan joq. Osy baǧdarlamalardyŋ äkımşılerı retınde būl kezdesuge qatysuǧa mındettı edı» dedı Bauyrjan Smaiylov.
Onyŋ aituynşa, ötken köktemde köktaldyqtarmen tiıstı mäsele boiynşa kezdesu ūiymdastyrylyp, oǧan Densaulyq saqtau ministrınıŋ orynbasary-bas memlekettık sanitarlyq därıger Aijan Esmaǧambetova, sanitarlyq-epidemiologiialyq qadaǧalau mamandary, Astana qalasy Sanitarlyq-epidemiologiialyq baqylau departamentınıŋ basşysy Sarhat Beisenova şaqyryldy.
«Būl mäsele tūrǧyn alap tūrǧyndary üşın öte özektı. Kükırtsutek şyǧaryndylarynyŋ şamadan köp boluy saldarynan adamdardyŋ tynysy tarylady. Olardyŋ densaulyǧy, äsırese, egde jastaǧy adamdar men balalar ziian şegedı. Sondyqtan būl mäselenı mümkındıgınşe tezırek şeşu qajet» dedı Bauyrjan Smaiylov.
Sonymen qatar deputatqa «Köktal-1» tūrǧyn alabynyŋ Jaŋa qonys jäne Talapker köşelerınıŋ tūrǧyndary kärız mäselesın şeşudı ötındı. «Būl osy köşelerdıŋ tūrǧyndary üşın öte maŋyzdy mäsele. Ol menıŋ sailaualdy baǧdarlamamda bar. Sondyqtan men būl mäselenı erekşe baqylauda ūstaimyn» dedı Bauyrjan Smaiylov.
Eldı mekendegı Titov köşesınde qūrylys jūmystary jürıp jatyr. Būl qatarda aumaqty abattandyru aiasynda jaiau jürgınşıler joly töselıp jatyr. Alaida tūrǧyndar jaiau jürgınşıler jolynyŋ öte tar ekenın jetkızdı. Al Ardagerler köşesı aulalaryndaǧy oiyn alaŋdary jaŋartudy qajet etedı. Sonymen qatar aǧaştardy kesu jäne tüpterın qopsytu turaly mäseleler de bar.
Bauyrjan Smaiylov ärıptesı, qalalyq mäslihat deputaty Altynşaş Tabuldinamen bırge «Köktal-2» tūrǧyn alabyndaǧy «Üi janyndaǧy därıger» jobasy aiasynda jūmys ıstep jatqan emhanaǧa da bardy. Mūnda köptegen adamǧa qyzmet körsetıledı eken. Osyǧan bailanysty därıgerlık bölmelerdıŋ jetıspeuşılıgı tuyndady.
«Köktal-2» tūrǧyndary deputattarǧa qoǧamdyq kölık qatynasy turaly da sūraqtardy qoidy. Äsırese, qalanyŋ sol jaǧalauyna qatynaityn baǧdarlardyŋ azdyǧyn aitty.
«Būl mäsele qazır pysyqtalyp jatyr. Qalaǧa 400 jaŋa avtobustyŋ keluıne bailanysty «Köktal-2»-nı sol jaǧalaumen bailanystyratyn №49 baǧdar aşylady» dedı Bauyrjan
Smaiylov.
