23 qaraşadan bastap elımızdıŋ barlyq kinoteatrlarynda «Kokonyŋ qūpiiasy» atty disneilık multfilmın tamaşalai alasyzdar. Qazaq tılınde. İä, būl – «Bolaşaq» qauymdastyǧynyŋ bastamasymen osymen 23-ret qazaqşa dubliajdalyp otyrǧan animasiialyq film.
Migel esımdı meksikalyq balanyŋ basynan ötken hikaia eşkımdı bei-jai qaldyrmaidy. Qaşan da otbasylyq qūndylyqtardy därıpteitın «Disnei» būl joly «Ölı razy bolmai, tırı baiymaidy» degendı alǧa tartady. Siujet jelısı boiynşa, Migel tanymal muzykant boludy armandaidy. Alaida üi-ışı oǧan tübegeilı qarsy. Kezınde än aityp, bi bilep, otbasyn önerımen asyrap jürgen atasy bır künı üiıne oralmaidy. «Ol bızdı tastap kettı» dep topşalaǧan Emilda äje üidegı bar muzykalyq aspaptardy dalaǧa laqtyryp tastap, aiaq-kiım tıguge bılek sybana kırısedı. Käsıp ūrpaqtan ūrpaqqa jalǧasady. Mıne, osy tūstan bastap äulettıŋ qalyptasqan qaǧidasy boiynşa eşkımnıŋ muzykamen ainalysuyna rūqsat berılmeidı. Muzykanyŋ kesırınen küieuınen aiyrylǧan Emilda äjenıŋ qyzy Koko qūpiiasyn nemeresı aşuǧa tyrysady.
Dubliaj rejisserı retınde astanalyq ärtıs Şah-Mūrat Ordabaev taŋdalynyp alyndy. Al 12 jasar Migeldıŋ dauysyn Q.Quanyşbaev atyndaǧy Memlekettık akademiialyq qazaq muzykalyq drama teatrynyŋ akterlerı Nūrken Öteuılov jäne Ainūr Bermūhambetovanyŋ ūldary Aqarys Äşımhan saldy.
«Aqşamnyŋ» anyqtamasy:
• Jobaǧa tartylǧan eŋ jas ärtıs – Aqarys Äşımhan 12 jasta, al jasy eŋ ülken ärtıs, QR Halyq ärtısı, professor Qūralai Eşmūratova 73 jasta.
• Ärtısterge qoiylǧan basty talap – mındettı türde än aita bılu, sebebı multfilm keiıpkerlerı kürdelı vokal partiialaryn oryndaidy.
• Özın synap körgen 25 balanyŋ ışınen üzdık bolyp tanylǧan Aqarys Äşımhan dubliajdy 5 künnıŋ ışınde jasaǧan.
«Jūmystyŋ bes künı de ūnady, öte qyzyq öttı. Rejisser Şahmūrat aǧany tyŋdamaityn kezderım de boldy. Basty keiıpker önerge jaqyn, än aitqysy keledı. Multfilmde tört än bar, sonyŋ barlyǧyn özım oryndap şyqtym. Film balalardy dostyqqa baulu, ata-analardy qūrmetteu, ata-babalardy ūmytpauǧa şaqyrady» deidı jas ärtıs.
Güldana TALǦATQYZY
