Nūr-Sūltan qalasynyŋ äkımı Altai Kölgınov jylu-elektr ortalyǧy qyzmetkerlerınıŋ jalaqysy 20 paiyzǧa köterılgenın mälım ettı
«Bızde jylytu mausymy 8 aiǧa sozylady. Üilerdı jylumen qamtamasyz etu üşın käsıbi mamandar jūmys ısteidı.
Jylu-elektr ortalyqtarynda qyzmet etetın mamandardyŋ jaǧdaiyn jasauǧa erekşe män berıledı. Biyl JEO qyzmetkerlerınıŋ jalaqysyn 20 paiyzǧa ösırdık.
Memleket basşysynyŋ tapsyrmasy boiynşa qaladaǧy kommunaldyq käsıporyndarda jūmys ısteitın mamandardyŋ jalaqysy köterıldı.
Sonymen qatar jylu-elektr ortalyqtarynyŋ jūmysyn jaqsartuǧa da basa män berıledı: 1-JEO jäne 2-JEO-da su jylytu qazandyqtary tolyqtai gazǧa auystyryldy, al 3-JEO qūrylysy qaita bastaldy. Sol siiaqty taǧy üş gaz qazandyǧyn jobalau jūmysy jürıp jatyr. Olardyŋ quaty saǧatyna 1 myŋ gigakaloriiadan asady, onyŋ küşı 3-JEO-dan da köp. Atalmyş gaz qazandyqtary qūrylysy jürıp jatqan jaŋa audandardy jylumen qosymşa qamtamasyz etedı.
Jaqynda QR Parlamentı Senatynyŋ töraǧasy Mäulen Äşımbaevpen bırge «Şarapat» äleumettık qyzmet körsetu ortalyǧyna bardyq. Qart kısılerdı Nauryz merekesımen arnaiy qūttyqtadyq. Būl ortalyqta zeinetkerlerge äleumettık qyzmet türlerı tolyqtai körsetıledı. Mūnda Ūly Otan soǧysynyŋ ardagerı Raisa Egorovna da bar. Biyl ol 96 jasqa tolady. Ardagerdı arnaiy qūttyqtap, myqty densaulyq tıledık» dedı elorda äkımı.
