Eger bızge osy ömırdegı eŋ tättı, eŋ balǧyn, eŋ taza jaratylys ielerı kımder dep sūraq qoisa, barlyǧymyz bır auyzdan «ärine, ol kırşıksız säbiler ǧoi» dep şu ete qalamyz. Sūraqqa ädemılep jauap beremız de, äŋgımenıŋ basyn qaiyryp qoia salamyz. Älgı «bız» degennıŋ ışınde men de barmyn, sız de barsyz. Älbette, köşede bıreu sızden «balalar üiı» qai jerde dep sūrai qalsa, jauabyŋyz daiyn ba?..
Oilanamyz. Tosylamyz. Alaida, sol sūraqtyŋ jauabyn bıluge, estuge köp kıdırmeimız. Ol ras. Küibeŋ tırlık, qarbalas ömır, uaqytymyz bolmaidy, moiyn būruǧa mūrşa joq… degendei jattandy äläulaiymyzǧa salyp alamyz da, qolymyzdy bır sıltep kete beremız, kete beremız… Bıraq, balalar üiındegı balǧyn büldırşınder oǧan eş renjımeidı de, asa bır tüsınıstıkpen qaraidy… Kerısınşe, olar bızdı qonaqqa şaqyrady. Qonaqtardy kütu üşın jandaryn salyp daiyndalady, talpynady, kütedı, saǧynady, ızdeidı… Säbilık lüpıldegen jürekterımen atalmyş «Rizaşylyq» merekesınde de bar önerlerın ortaǧa saldy. Syrttan kelgen barlyq kısılermen än aityp, bi bilep, oiyn oinap, syilyqtar bölıstı. «Adyrna» halyqtyq orkestrı Qūrmanǧazynyŋ ruhty küilerımen qonaqtardy qarsy alyp, «Asyl arman» bi tobynyŋ tal şybyqtai būralǧan büldırşınderı «Rizaşylyq» keşınıŋ körkı men sänı boldy. Büldırşın bişı qyzdarymyz on bır jasar Jūldyz Jaqaeva men on ekı jasar Jıbek Boranbaevalar üşın būl mereke dostyqtyŋ, tatulyqtyŋ simvoly ıspettes. Säbilermen az-kem syrlasqanymyzda baiqaǧanym: olar bır-bırıne öte qamqor. Bauyrmaldylyqtary, otbasylyq ortada tärbielenıp jatqandyqtary olardyŋ tolaǧai tabystarynan, talpynystarynan bılınıp-aq tūr. Atap aitsaq, Türkiiada ötken «Dance Olympia» halyqaralyq baiqauyna alǧaş ret qatysyp, 2-oryndy ielengen, qalalyq «Delfii oiyndarynan» 3 altyn, 2 kümıs, 1 qola medaldary bar balalar üiı «Barys» sport klubymen de maqtana alady. Körmede tūrǧan tamaşa qolönerlık būiymdarǧa süisınbei, tamsanbai öte almaisyz. Ǧajap, tamaşa, eŋ bastysy, balanyŋ jüirık qiialynan tuǧan, qoldan jasalǧan qolöner būiymdary men kartinalary köz quantady. Ras, ondai jyltyraǧan, körnekılıkterdıŋ san türı dükende de tolyp tūr. Alaida, būl tuyndylarda balanyŋ qoly tigen tazalyq bar. Körmenı tanystyryp jürgen toǧyzynşy synyp oquşylary Zemfira Muliukova men Vialetta Letvienka esımdı jas suretşı qyzdarymyzdyŋ oiynşa, qoldarynan şyqqan osy būiymdary, olardyŋ erteŋ joǧary oqu ornyna tüsuıne septıgın tigızbek. Körmenı tamaşalaǧan bıraz qonaqtar bır parasyn satyp alǧylary-aq keldı. Alaida, oǧan rūqsat etılmeptı. Balalar üiınıŋ basşysy Gülmira Eleusızqyzy eger būl jobany qolǧa alyp jatsa, erteŋgı künı balalar igılıgı üşın jaratylmas pa edı. Qonaqtar syilyqtaryn ūsynyp, köŋıldı merekenıŋ sebepkerlerı bolǧanyna quana tarqasty. Bärı riza bır-bırıne. Tek qana artta köŋıldıŋ jabuyn syǧalaǧan mūŋ qaldy… Ol – bızdı qimastyqpen şyǧaryp salǧan oiyn balasynyŋ möldıregen közderındegı qalyŋ qara mūŋ…
PS: Kün saiyn jer betınde 365 myŋ säbi dünie esıgın aşady eken. Onyŋ 57%-y Aziiaǧa, 26%-y Afrikaǧa, 9%-y Latyn Amerikasyna, 5%-y Europaǧa, 3%-y Soltüstık Amerikaǧa, 1%-ǧa jeter-jetpesı Avstraliia men mūhit ortasyndaǧy elderge tiesılı. Al, qazaq elın bügınde 5 million büldırşın säbi külkısıne bölep otyr. Onyŋ 169-y «Rizaşylyq» meiramyn toilaǧan Astana balalar üiınde ösıp-önude.
Nūrgül Ahanqyzy
