Elorda jastary üş kün boiy komikster älemıne enıp, Marvel keiıpkerlerımen kezdesedı, olarǧa elıktegısı keletınderı kosplei jarysyna qatysady, sondai-aq eŋ jaŋa kompiuterlık jäne üstel oiyndarymen tanysyp, avtorlarynyŋ äŋgımesın tyŋdaidy. Būl mümkındıkterdıŋ barlyǧy Comic Con festivalı aiasynda ıske asqaly tūr. AQŞ-ta qyryq jyldan berı ūiymdastyrylyp kele jatqan halyqaralyq ıs-şara Nūr-Sūltan qalasynda biyl tūŋǧyş ret ötude.
Qazaq komiksterı Amazon-ǧa da jetken
Is-şaranyŋ bırınşı künı Kongress-ortalyq aldyndaǧy ūzyn-sonar kezekten bastaldy. Gik-keŋıstıktıŋ maŋyzdy oqiǧasynan tys qalǧysy kelmeitın jasöspırımder tym köp eken. Işke kıre sala olardyŋ ärqaisysy özı qyzyǧatyn salalardy ızdep kettı. Bırı sonda jürgen Marvel qaharmandarymen bırge fotosessiia jasauǧa attansa, endı bırı komiks qūrastyruşylardyŋ şeberlık synyptaryna asyqty. Bız de sony betke alǧanbyz. Söitsek otandyq komiksşı Mädıbek Mūsabekovtıŋ «Altyn jauynger» atty jaŋa tuyndysy tūsaukeserınıŋ däl üstınen tüsıppız. Avtordyŋ aituynşa, mūndaǧy oqiǧa saq patşaiymy Tomiris pen parsy patşasy Kir arasyndaǧy teketıres zamanynda örbidı. Saq jerın basyp aludy közdegen Kirdı toqtatu üşın Tomiriske 12 altyn jauynger kömekke keledı. Komiks fentezi janrynda berılgen.
Būǧan deiın Mädıbektıŋ qolynan şyqqan «Ermek batyr» atty alǧaşqy qazaqstandyq komiks TMD ǧana emes, AQŞ tūrǧyndary arasynda da tanymaldyqqa ie bolypty.
– Amerikany bız Amazon saity arqyly baǧyndyrudy şeştık. Onda komiksımızdı 2 dollardan sattyq. Ärine, būdan köp paida tüsırmedık, bıraq mol täjıribe jinadyq. Amazon-nyŋ modernizasiiasynan ötudıŋ özı – ülken jetıstık, öitkenı ol kompaniia komikstegı surettıŋ, mätınnıŋ, siujettıŋ sapasy men basqa da tehnikalyq parametrlerıne qataŋ talap qoiady, – deidı ol.
Kei komikstı saluǧa on şaqty jyl kerek
Festival körermenderı otandyq qana emes, şeteldık komiksşılerdıŋ de därısterın tyŋdap, äŋgımelesuge mümkındık aldy. Mäselen, solardyŋ bırı Reseiden kelgen qonaq, bırneşe grafikalyq novellanyŋ avtory Iýliia Nikitina komiks jasaudyŋ qyr-syryn bastan-aiaq tüsındırıp berdı.
– Ädette komiks janryna jaŋadan kelıp jatqandar oqiǧanyŋ ssenariiın jüre bara jetıldıremın dep oilaidy. Äu basta naqty ssenarii bolmaǧandyqtan, siujettıŋ kei jerlerı sätsız şyǧyp, sonyŋ kesırınen redaktor sol tūstardy tüzeuı mümkın. Al komiks degenımız bır-bırımen özara bailanysatyn suretterden tūratyndyqtan, ssenariidıŋ bır jerı özgerse, säikesınşe bükıl komikstı de qaita salyp şyǧu kerek. Sondyqtan eŋbegıŋ eş ketpesın deseŋ, ıske kırıspes būryn ne salaryŋdy äbden saralap alǧan jön, – deidı Iýliia.
Öz kezegınde astanalyq jastar odan bır komikstı jasauǧa qanşa uaqyt ketetının sūraǧan-dy. Būǧan reseilık illiustrator bylaişa jauap qatty:
– Ol köbınese ssenariige bailanysty. Mysaly, men keibır komiksterdı jarty jyl jasaimyn. Al keide būǧan bır-ekı jyl uaqytym ketedı. Jaqynda bızdıŋ studiiamyzǧa Sankt-Peterburgten bır kısı kelıp ketken. Ol on ekı jyl boiy bır jobamen jūmys ıstep jatyr eken. Būl suretşınıŋ asa şydamdy boluy qajettıgın körsetedı.
Ūlttyq ülgıdegı oiyn jasaǧan
Comic Con qamtityn taqyryptardyŋ şeŋberıne üstel oiyndary da kıredı. Osy tūsta bız festivalge Almatydan kelgen qonaq, «Qazaq handyǧy» atty üstel oiynynyŋ avtory Qobylandy Janabekūlymen tanystyq.
– Är halyqtyŋ süiıp oinaityn öz üstel oiyny bar. Mäselen, Amerikada – «Monopoliia», Germaniiada – «Karkasson», Reseide – «Loto». Osy sekıldı üstel oiyndary bızde nege joq degen oiǧa keldım. Işımız pyssa, qartany qolǧa alamyz. Odan adamdar qandai män-maǧyna, tälım-tärbie tabady? Ūlttyq ülgıdegı üstel oiynyn şyǧaru turaly ideia osydan soŋ keldı, – deidı Qobyldandy.
Oiynnyŋ şarty mynadai: oiynşylar alaŋdaǧy qazaq rularyn bır jüzdıŋ astyna tezırek bırıktıru kerek. Būl jolda olar öz tastaryn alaŋ betındegı ūiaşyqtardyŋ boiymen jürgızedı. Är ūiaşyqta kartalar jasyrynǧan. Eger oiynşyǧa «Barymta» degen söz jazylǧan karta tüsse, onda onyŋ basqa adam qolyndaǧy «Bilık» jetonyn tartyp aluǧa qūqy bar. Al «Oba» sözı jazuly kartaǧa ie bolǧan adam özındegı bır «Kiız üi» jetonyn joǧaltady. Osylaişa, oiyn barysy qazaqtyŋ salt-dästürı men tarihyna qatysty ataular arqyly jüzege asady.
«Qazaq handyǧy» oiynyn festival körermenderı qyzyǧa oinauda. Qobylannyŋ aituynşa, mūnyŋ, äsırese, qala jastaryna berer paidasy zor bolmaq.
