Kezınde Astananyŋ eŋ ülken zaly bolǧan Kongress-holl 2010 jyly Astana Memlekettık akademiialyq filarmoniiasyna berılgenı belgılı. Endı ǧimarattyŋ maŋdaişasyndaǧy būrynǧy atauy «Astana» konsert zaly» bolyp özgermek. Osyǧan bailanysty nysannyŋ qasbetıne qaita jaŋǧyrtu jūmystary jürgızılıp jatyr.
Kongress-holl būryn Tyŋ igeruşıler saraiy bolǧanyn baiyrǧy tūrǧyndar jaqsy bılse kerek. Keiın jaŋa şahardyŋ bıtım-bolmysyna bailanysty 1998 jyly qaita türlenıp, Astananyŋ aişyqty nysandarynyŋ bırıne ainaldy. Tıptı «Kongress-holl» atauymen memlekettık mekeme de qūryldy. Alaida 2010 jyly osynda Astana Memlekettık filarmoniiasy köşıp keluıne orai ekı mekeme bırıgıp, soŋynda «Kongress-holl» jeke mekeme retındegı qyzmetın mülde toqtatty. Bır sözben aitqanda, bügınde būl ǧimarat tügel – filarmoniianyŋ enşısınde.
«Kongress-holl» degen mäjılıster, resmi jiyndar ötetın oryn degen maǧynany bıldıredı. Al mūnda köbıne änşılerdıŋ, öner ūjymdarynyŋ konserttık baǧdarlamalary ūiymdastyrylyp jür. Filarmoniianyŋ konsertı de osynda ötedı. Bıraq jūrtşylyq keide filarmoniianyŋ qaida ekenın bılmei, şatastyryp alatyny bar. Sondyqtan ǧimarattyŋ maŋdaişasyndaǧy jazudy özgertpekşımız. Būl turaly qala äkımınıŋ qaulysy şyqty. Al nysannyŋ qasbetındegı ülken ekranǧa «Filarmoniia» degen jazu tūrady, ainalasy qazaqtyŋ oiu-örnegımen körkemdeletın bolady» deidı Astana Memlekettık akademiialyq filarmoniiasynyŋ bas direktory ärı körkemdık jetekşısı Säken Abdrahmanov.
İä, ǧimarattyŋ atauy özgergenımen, Astana Kongress-holsyz qalmaidy. «EKSPO – 2017» halyqaralyq körme aumaǧynda jaŋa Kongress-holl ǧimaratynyŋ qūrylysy jürgızılıp jatyr. Būl turaly jaqynda jahandyq körmenıŋ damuyna orai ötken jiynda aityldy.
Qymbat TOQTAMŪRAT
