Köpbalaly analar jaiy eleusız qalmaidy

Qalalyq äkımdıkte qala tırşılıgıne qatysty otyrys ötıp, onda jüielı problemalar talqylandy. Jiynda köpbalaly analardyŋ jaiy, qalanyŋ köktemgı su tasqynyna daiyndyǧy, sol siiaqty därıgerlerdıŋ jūmysyna salǧyrttyǧy sekıldı maŋyzdy mäseleler qozǧaldy.

Qala äkımı Baqyt Sūltanov jinalysty köpbalaly analar mäselesın qarastyruǧa qatysty äkımdık tarapynan atqarylǧan jüielı ısterdıŋ jüzege asyrylu barysynan bastady.
– Qazır audan äkımdıkterı tiıstı mekemelermen bırlesıp, qaladaǧy ört qauıpsızdıgın küşeitıp jatyr. Bızge özınıŋ äleumettık qiyn jaǧdaiyn aityp köpbalaly analar habarlasty. Olarmen bırneşe kezdesu ötkızıp, bärınıŋ ötınış-aryzyn qabyldadyq. Onyŋ eşbırı äkımdık nazarynan tys qalmaidy, – dedı B.Sūltanov.
Būǧan qosa, äkım qala tūrǧyndary üşın «Aşyq esık» aptalyǧyn ötkızudı tapsyrdy. Aitarlyǧy, ötken aptada elordadaǧy barlyq audannyŋ äkımderı köpbalaly otbasylarmen kezdesu ötkızgen bolatyn.
– Qazırgı kezde audan äkımderı azamattardy qabyldap jatyr. Būl jūmys jüielı jäne tūraqty türde jürgızıluı tiıs. Är ötınış boiynşa mäselenı şeşu kerek, – dedı qala äkımı.
Ärı qarai qalanyŋ köktemgı su tas­qynyna daiyndyǧy pysyqtaldy. Äkım 2018 jyly 5527 su basu oqiǧasy tırkelgenın jäne onyŋ basym köpşılıgı Baiqoŋyr audanyna tiesılı ekendıgın aitty.
– Köktem şyǧa osy mäsele boiynşa şaǧymdar tüsetın bolady. Esıl audany äkımdıgı «Astana Tazalyq» JŞS-pen bırlesıp, Maibalyq kölınen «Nūra-Esıl» arnasyna deiıngı kanaldy qardan tazalauy kerek. Al Saryarqa men Esıl audany äkımdıgıne Esıl özenınıŋ jaǧasyn bekıtıp, gaz apparaturasy zauytynyŋ audany men Ş.Beisekova köşesı boiyndaǧy köpırdıŋ ar jaǧyndaǧy saiajai aumaqtaryn su basudan qorǧau kerek. Barlyq audandyq äkımdık pen TJD bırlesıp, su basu qaupı joǧary 34 uchaskenı qataŋ baqylauǧa aludy tapsyramyn. Otyn-energetikalyq keşenı jäne kommunaldyq şaruaşylyq basqarmasy «SK Qūlager» JŞS-pen bırlesıp İlinka tūrǧyn üi massivındegı bögettı qosymşa bekıtuı kerek. Kölık jäne jol-kölık infraqūrylymyn damytu basqarmasyna su tasqyny bastalǧanǧa deiın «Nūrly jol» vokzaly janyndaǧy jaŋa köpır qūrylysy audanyndaǧy bögettı būzudy tapsyramyn, – dedı B.Sūltanov.
Sonymen qatar, äkım qalalyq ortany regenerasiialau, strategiialyq jäne biudjettık josparlau, qorşaǧan ortany qorǧau jäne tabiǧatty paidalanu basqarmalarynyŋ basşylaryna, «LRT qūrylysyn salu jönındegı direksiia» JŞS, «QazAvtoJol» AQ, «Qazsuşar» RMK, «Qazgidromet» RMK basşylyǧyna tiıstı tapsyrmalar berdı.
Qaladaǧy jüielı mäseleler qatarynda densaulyq salasy da bar. Osy joly med­qyzmetkerlerdıŋ dörekı qyzmet körsetuıne qatysty mäsele köterıldı.
– Äleumettık jelıde jazyp, şu kö­termeiınşe, dūrys jūmys ıstei almaisyzdar ma? – dedı Qoǧamdyq densaulyq saqtau basqarmasynyŋ basşysy Qa­mal­jan Nadyrovqa qarata. – Jyl basynan bergı reitingte tüsken şaǧymdardy ne­gızsız deisız. Jel bolmasa, şöptıŋ basy qimyldamaidy. Tärtıpke keltırıŋız! – dep toqtaldy äkım.
Būǧan qosa, äkım därıgerlerdıŋ jala­qysyn köteru jaiyn qozǧap, damu strategiiasyn äzırleu kezınde jergılıktı biudjet esebınen būl mäsele qarastyrylatynyn jetkızdı.
2019 jyldyŋ 1 aqpanyndaǧy jaǧdai boiynşa qala biudjetınıŋ oryndaluy, obektılerdı qalanyŋ kommunaldyq menşıgıne qabyldau turaly qala äkımınıŋ orynbasary Asqar Ämrin aityp berdı. Al äleumettık maŋyzy bar azyq-tülık tauarlarynyŋ baǧalary, SMART-siti jobalaryn ıske asyru jäne «Sergek» beinebaqylau kameralaryn qosu barysy turaly qala äkımınıŋ orynbasary Malika Bektūrova baiandady.
Sondai-aq, qala äkımı lift şarua­şylyǧy jūmysyna bailanysty özektı mäselelerge nazar audardy. «Liftılerdıŋ naşar jaǧdaiy men tūrǧyndardy evakuasiialau mäselesın qaita qarauǧa şaqyramyn. Tūraqty baqylauda ūstap, atqarylǧan jūmys jaiynda ai saiyn baian­dap otyryŋyz» dedı äkım.
Odan ärı ülestık qūrylysqa qaty­su­şylardyŋ mäselelerı jäne iKomek or­talyǧynyŋ jūmysy boiynşa baian­dama tyŋdaldy. Ört qauıpsızdıgınıŋ mäse­lesı qaraldy. Jyl bastalǧaly qala tūrǧyndarynan köp qabatty tūrǧyn üi­ler men adamdar köp jinalatyn oryn­dardaǧy ört qauıpsızdıgın tekseru boiynşa 31 ötınış tüsken. Barlyq sūraq bo­iynşa TJD tarapynan «Osy ötınış bo­iynşa Astana qalasy Tötenşe jaǧdai­lar departamentıne hat jazyŋyz» degen jeleu­men jabylǧan.
– Osy şara jedel äreket etuge kedergı keltırıp, jūrttyŋ qauıpsızdıgıne qauıp tudyruda. Mūndai äreketterdıŋ nätijesın körıp jürmız, – dep atap öttı äkım TJD-nıŋ basşysyna qarata. – Sızder aryz tüsken mekenjaiǧa baryp jazbaşa ötınışın sol jerden jazǧyzyp ala alasyzdar ǧoi. Qosymşa mäseleler tudyrmai, bırden atqaryp tastauǧa bolady ǧoi. Tötenşe jaǧdailar departamentıne iKomek ortalyǧy arqyly ört qauıpsızdıgıne bailanysty tüsetın ötınışterdı qarau, oryndau täsılın qaita talqylaudy tapsyramyn, – dedı äkım.
Būdan ärı 2017-2019 jyldarǧa ar­nal­ǧan «Nūrly jol» jäne «Nūrly jer» memlekettık baǧdarlamasynyŋ inf­raqūrylymdyq damuy, aulalardyŋ abattandyryluy men qauıpsızdıgın jüzege asyru barysy qaraldy. Otyrys qorytyndysy boiynşa qala äkımı tiıstı qūrylymdarǧa naqty tapsyrmalar berdı.