Nūr-Sūltan qalasy äkımdıgınıŋ «Jastar» teatrynda jas dramaturg Jänıbek Älıkennıŋ «Küieu bala» dramasynyŋ premerasy öttı. Spektakldıŋ qoiuşy rejisserı – Qazaqstannyŋ eŋbek sıŋırgen qairatkerı Däuren Serǧazin.
Qazaq qyzynyŋ şeteldıkke tūrmysqa şyǧuy – qazırgı qoǧamda köp talqylanatyn taqyryptyŋ bırı. Ökınışke qarai, osyndai jaǧdailar köbeiıp otyr. Äleumettık jelılerden qaraköz qaryndastarymyzdyŋ qara näsıldı jıgıtpen nemese özge ūlttan şyqqan azamatpen bas qūraǧanyn jiı köretın boldyq. Bügınderı qazaq «qyzǧa qyryq üiden tyiym» sala almai otyr. Ärine, būl jaǧdaida qyzdy ǧana kınälaǧan dūrys emes. Būǧan ata-anasynyŋ, aralasqan ortasynyŋ da belgılı bır deŋgeide kınäsı bar.
Jaŋa qoiylymnyŋ negızgı arqauyna osy aralas neke mäselesı alynǧan. Al bıle bılgen adamǧa būl bır äulettıŋ nemese otbasynyŋ problemasy emes, būǧan ūlt bolyp tosqauyl qoiǧan jön. Sebebı qyzdyŋ ary – ūlttyŋ ary.
«Küieu bala» dramasynda auyl äkımı Beisenbektıŋ (akter Jandäulet Batai) qyzy Roza (Äsem Quanyşbaeva) auylǧa özı taŋdaǧan qytai jıgıtı Li Huandı (Nūrbek Ädılbek) tanystyruǧa äkeledı. Qytailyqtyŋ Quan degen ekınşı aty da bar eken. Osydan örbitın oqiǧa qazırgı qazaq qoǧamyndaǧy, auyl ömırındegı bırqatar problemany aşady.
Drama avtory aralas neke mäselesın qozǧaimyn dep auqymy keŋ mäselelerdı köteredı. Iаǧni bır spektakldıŋ ışınde qazır özektı bırneşe problema turaly aitylady. Būl jerde öskeleŋ ūrpaq pen jastar tärbiesı, ūlttyq qūndylyqtar, auyldyŋ azyp-tozuy, tıptı ekonomikalyq mäseleler qozǧalǧan. Qoiuşy rejisser sonyŋ bärın qamtuǧa tyrysqan. Alaida bızdıŋşe, spektakl şūbalaŋqy bolyp kettı. İä, arasynda bır üzılıspen üş saǧatqa juyq jüredı. Sol sebepten körermendı jalyqtyratyn jerlerı de bar. Bızdıŋşe, materialdy syǧyp, yqşamdap beru kerek. Būdan drama ūtpasa, ūtylmaidy dep esepteimız.
Al qytai azamattarynyŋ elımızde qaptaǧany, olardyŋ köbeigenınen ūltqa tönetın qater turaly köpten aitylyp jür. Qytailyqtar Qazaqstanda dıttegen maqsattaryna jetu üşın qazaq qyzdaryna üilenıp jatqanyn da jiı estimız. Spektaklde osy mäsele de qamtylady. Li Huan maida tılımen Rozanyŋ tuysqandarynyŋ, auyldastarynyŋ köŋılın tabuǧa tyrysady. Keibıreuınıkın tabady da. Mäselen, Rozanyŋ äkım äkesıne auylǧa investisiia qūiamyn dep uäde beredı. Auyldaǧy jastardyŋ kösemı Nūrbolat (Eldos Şaikenov) degen jıgıtke jastarǧa jūmys tauyp beremın deidı.
Bır ǧana adam qytai küieu balany qabyldamaidy. Būl – äkımnıŋ äkesı, Rozanyŋ atasy, auyldyŋ qadırlı aqsaqaly Särsenbai (Mūhtarhan Manap). Aldymen ol osyndai nekege şariǧat ne deidı dep auyl imamymen (Nūrbek Älıbek) keŋesedı. Būdan soŋ da ūzaq tolǧanysqa tüsedı. Aqyry qylmysqa barady. Nemeresı taŋdaǧan jıgıttı atyp tastaidy.
Spektakldıŋ janry drama bolǧanmen, onda komediia elementterı de kezdesedı. Mäselen, auyldyŋ ösekşı äielderınıŋ äreketı körermendı küldırmei qoimaidy. Auyl tūrǧyndarynyŋ keşkılık teledidardyŋ qasyna jinalyp, türık nemese korei telehikaialaryn tamaşalauy da bügınnıŋ körınısı.
Tüiındep aitqanda, dramanyŋ oilantar tūstary az emes. Bıraq säl jinaqtap, artyq körınıster jonyp alynsa degen tılegımız bar.
