22 qyrküiek künı elorda eŋbekpen oiandy. Astananyŋ 100 myŋǧa juyq tūrǧyny qoldaryna kürek-ketpenın ūstap, qala äkımdıgı ūiymdastyrǧan senbılıkke şyqty. Tazalyq jasaǧandy tabiǧattyŋ özı qūp körgendei, künnıŋ közı de sol künı aşylyp sala berdı.
Bas şahar qai jaǧynan da basqalarǧa ülgı bolyp, köş bastau qajettıgın, osy tūrǧyda tazalyq jaǧy da şet qaluǧa tiıs emestıgın elordalyqtar ūǧynǧaly qaşan. Senbılıkke şyǧyp, qalany mūntazdai etu – Astanaǧa jyly sezımın bıldırudıŋ bır türı ekenın bügınde jas ta, jasamys ta jaqsy bıledı. Elordalyq äkımdık bas bolyp otyrǧan tazalyq jūmystaryna ülken-kışınıŋ belsene atsalysuy da sondyqtan.
– Bar jaqsylyq atauly tazalyqtan bastau alady, – deidı elordalyqtarmen bırge senbılıkke şyǧyp, Esıl audany aumaǧynda aǧaş otyrǧyzǧan Astana qalasynyŋ äkımı İmanǧali Tasmaǧambetov. – Jalpyqalalyq senbılık eŋselı elordamyzdyŋ ädemılıgı men sän- saltanatyn arttyratyn, tazalyǧy men tärtıbın qalyptastyratyn igı ürdıs. Osynau tazalyq şarasyna jürek qalauymen şyqqan 100 myŋǧa juyq tūrǧyn öz ısterı arqyly Astanaǧa degen yqylas- nietın, qūrmetın bıldırıp jatyr. Tek osy senbılıktıŋ özınde 2 myŋnan astam köşet otyrǧyzylmaqşy. Az uaqyttyŋ ışınde Astanamyz jasyl jelektı şaharǧa ainalyp, jaiqalyp kele jatqanyn keide özımız de baiqamai qalamyz. Mūny elordaǧa süisıngen eldıŋ emeurınınen aŋǧaramyz. Būl şaranyŋ astarynda qalany tek kögaldandyru ǧana emes, öskeleŋ örenderdıŋ boiyna özderı tūryp jatqan şahardy kütıp ūstap, ony eŋbek arqyly süiuge baulu mäselesı de jatyr. Senbılıktı tärbielık mänı ülken şara deitınımız sondyqtan. Bız jyldan jylǧa astanalyqtardyŋ ekologiialyq mädenietın qalyptastyruǧa tyrysyp kelemız. Sondyqtan tazalyq jūmysyna belsene qatysqan barşa halyqqa alǧysymdy bıldıremın. Är astanalyq erteŋ-aq, jaiqala ösken aǧaştardyŋ baqqa ainalǧanyn körgende, eŋbekterınıŋ eş ketpegenın ūǧynatyn bolady.
Elordalyqtar erteŋgılık saǧat 9.00-de özderıne tiesılı aumaqqa jinaldy. Bır-bırıne «Merekelerıŋızben!» dep jyly jymiiady. Senbılıktı eŋbek merekesıne balaǧan qauymnyŋ köŋıl-hoşy köterıŋkı.
Jurnalister qauymy aldymen Astana qalalyq äkımdıgı ǧimaratynyŋ sol jaq qaptalynda, Abai daŋǧyly boiynda jūmys ıstep jatqan adamdardyŋ eŋbegıne kuä boldy. Osy aumaqta Saryarqa audany äkımınıŋ apparaty, audandyq Ardagerler keŋesı, QR Qarjy ministrlıgınıŋ Kedendık baqylau komitetı, qazaq jäne orys teatrlarynyŋ ūjymy men M.Ötemısūly atyndaǧy Oquşylar saraiynyŋ qyzmetkerlerı eŋbek etude eken. Olardyŋ bel ortasynda küregın alyp qyzu jūmysqa kırısken Saryarqa audanynyŋ äkımı Ermek Ospanovty äŋgımege tarttyq.
–Saryarqa audanynyŋ tūrǧyndary bır otbasynyŋ adamdaryndai jūmylyp, jūmys ıstep jatqanyna özderıŋız de kuäsızder. Bärımızge ortaq Astanany körıktendıruge är astanalyq üles qosu qajettıgın tūrǧyndar tüsınıp, aianbai atsalysyp otyr. Senbılıkke audanymyzdan şamamen 35 myŋnan astam adam şyǧuǧa yqylas bıldırgen. Endı mıne, köptıŋ küşımen aǧaş otyrǧyzyp, ainalany ainadai ǧyp tazalap jatqan jaiymyz bar, –dedı Ermek Sabyrbekūly.
Senbı, jeksenbı – ekı kün ışınde Saryarqa audany boiynşa 925 tonnadan astam qoqys şyǧarylǧan. Oǧan 124 bırlık tehnika tartylǧan. Senbılıktı ötkızu barysynda qoqysty jinau jönınde 25 ötınış tüsıp, sonyŋ bärı de uaqytyly oryndaldy deidı mamandar.
Būdan keiın jurnalister mıngen kölık qalalyq mäslihat deputattary, assambleia jäne Astana äkımınıŋ apparaty eŋbek etıp jatqan Esıl audanyna qarasty Tūran daŋǧylyna qarai bet tüzedı.
Tazalyq jūmysyna jan-tänımen kırısken astanalyqtar ainalany ainadai ǧyp sypyryp, kül- qoqystan tazartyp qana qoimai, aǧaş otyrǧyzu jūmystaryna da belsene kırısıptı. Bıreuler topyraq tasyp jür. Keibıreuler aǧaş otyrǧyzatyn şūŋqyr qazyp äbıger. Esıl audanynyŋ äkımı Säbila Mūstafinanyŋ aituynşa, būl audan da jalpyqalalyq senbılıkke tyŋǧylyqty äzırlengen. Tazalyq jūmysyna audannan 15 myŋnan astam adam qatysypty.
Almaty audany aumaǧy da qyzu jūmys üstınde. Kerek-jaraqtaryn alyp, eŋbekke kırısken jūrtşylyqtyŋ qatarynda audan äkımınıŋ apparaty, Işkı ıster ministrlıgı, «Jas Otan» jastar qanaty Astana qalalyq filialynyŋ ökılderı bar.
Jalpyqalalyq senbılıkke äzırlık barysynda Almaty audany arnaiy ştab qūryp, ekologiialyq ailyqtyŋ jobasyn tüzıptı. Audan aumaǧy 31 sektordan qūrylǧan 8 kvartalǧa bölıngen. «Negızınen, san körsetkışterınen görı, sapaǧa airyqşa maŋyz berdık» deidı audan äkımdıgı qyzmetkerlerı.
Olar da tūrǧyndardy senbılık jönınde qūlaqtandyruǧa asa köŋıl bölgen. Osy maqsatta Abylaihan, Abai, B.Momyşūly daŋǧyldarynda jäne Puşkin, Taşenev köşelerı boiynda arnaiy ülken taqtaişa ılıptı.
Jalpyqalalyq senbılıkke audan boiynşa 40 myŋnan astam tūrǧyn men käsıporyn, mekeme qyzmetkerlerı şyqqan. Tazalyq jūmysyna 100 jük kölıgı jäne 40 jük tiegış jūmyldyrylǧan eken.
Audandy kögaldandyru jūmystary da qauyrt jürgızılıp, tek Täuelsızdık daŋǧyly boiyna 228 aǧaş, Abylaihan daŋǧylyndaǧy №2 qalalyq balalar auruhanasy aumaǧyna 141 köşet otyrǧyzylǧan.
Baqyt BEKIŞEVA, №2 qalalyq köpsalaly balalar auruhanasynyŋ bas medbikesı:
Senbılıkke balalar auruhanasy ūjymynyŋ atynan 160 adam qatystyq. Mūndai şarany bızdıŋ ūjym köktem şyqqannan bastap, jerge qar tüskenge deiın är senbı saiyn dästürlı türde ötkızıp tūrady. Aulanyŋ taza bolǧany eŋ aldymen auruhanada emdelıp jürgen balalar üşın paidaly.
Taiauda ūjymymyz auruhananyŋ jaŋa ǧimaratyna qonys audarǧan. Bügıngı senbılıktıŋ basty erekşelıgı – jaŋa aulamyzǧa aǧaş otyrǧyzyp, ainalamyzdy tazartyp jatyrmyz. Mūndai keremet ǧimaratty taza ūstamaudyŋ özı mümkın emes şyǧar.
Senbılık barysynda auruhana aulasyna jüzden astam aǧaş otyrǧyzyldy. Men özım 5 aǧaş otyrǧyzdym. Olardy baqylap jüreiın dep, ädeiı belgılep qoidym. Auruhananyŋ eskı ǧimaraty maŋaiyna da bırneşe tüp aǧaş otyrǧyzǧanmyn. Olar qazır jaiqalǧan aǧaşqa ainaldy. Ary-berı ötkende körgen saiyn köŋılım köterılıp qalady.
Saltanat ÄLİ, «Jas Otan» JQ atqaruşy hatşysynyŋ bırınşı orynbasary:
-Bız jastar da elordamyzdyŋ ainadai jarqyrap, mūntazdai taza bolyp tūrǧanyn qalaimyz. Köşelerımız taza tūrsa, köŋılımız de ösıp qalady emes pe?! Astana – küllı qazaqstandyqtardyŋ ortaq üiı. Sondyqtan bas şahardyŋ özgege ülgı bolyp, jarqyrap tūruyna bärımız de müddelımız. «Jas Otan» jastar qanatynyŋ jastary tegıs senbılıkke şyqtyq. «Jas kelse, ıske!» demei me?! Özımızge bölıngen öŋırdı qas-qaǧym sätte tazalap, taldardy otyrǧyzyp şyqtyq. Qatarlastaryŋmen qaljyŋdasa jürıp, jūmys ıstegennıŋ özı qyzyq qoi. Uaqyttyŋ qalai ötkenın de baiqamai qalyppyz. Mūndaǧy jastar qanşama köşetter otyrǧyzdy. Eger osy qarqyn tömendemese, keleşekte Astanany jasyl jelektı qalaǧa ainaldyru jönındegı Elbasynyŋ tapsyrmasyn mültıksız oryndaitynymyz sözsız.
Aiajan RAIHAN, №54 mekteptıŋ 2-synyp oquşysy:
–Senbılık degen tazalyq künı ekenın men de bılemın. Būl künı bükıl Astananyŋ adamdary dalaǧa şyǧyp, üiınıŋ maŋaiyn tazalaidy, qalany tazalaidy. Men älı senbılıkke qatysyp körgen joqpyn, anaşym sen älı kışkentaisyŋ deidı. Bıraq men aǧaştardy küte bılemın. Menıŋ sıŋlım Aiaru tuǧanda Astana oǧan bır aǧaş syilapty. Bız anaşym, äkemız bärımız sol aǧaşty körıp, baryp tūramyz. Osy joly da senbılıkten keiın baryp qaittyq. Men oǧan su qūidym. Sıŋlımnıŋ aǧaşy ädemı bolyp ösıp keledı. Aiaru ülkeigende ekeuımız de aǧaşymyzǧa baryp tūratyn bolamyz.
Mereke JAQYPOV, «Astana kögaldandyru qūrylysy» AQ brigadirı:
-Qala tazalyǧyn saqtau – barlyq astanalyqtarǧa ortaq mındet. Astana qai jaǧynan bolsa da, basqaǧa ülgı bolu kerektıgın jiı aitamyz. Endeşe, elorda tazalyq jaǧynan da aldyna jan salmai, asqaqtap tūrsa, keremet emes pe?! Aǧaş otyrǧyzu, ony kütıp-baptau – men eŋbek etetın käsıporyn jūmysşylarynyŋ kündelıktı tırlıgı. Osyndai senbılık kezınde tūrǧyndardyŋ esebınen jūmysymyz tıpten jandanyp, marqaiyp qalamyz. Aǧaş otyrǧyzu – ata-baba dästürınen kele jatqan igı ürdıs. Elordalyqtar otyrǧyzǧan aǧaştar erteŋ-aq jaiqalyp ösıp, tūrǧyndardyŋ saialy baǧyna ainalar älı.
Qymbat TOQTAMŪRAT
