Elordada «Küi anasy» respublikalyq qorynyŋ bastamasymen, Astana qalasy äkımdıgınıŋ qoldauymen Dina Nūrpeiısova atyndaǧy «Astana – küi qanatynda» atty dombyraşy-küişılerdıŋ I qalalyq baiqauy ūiymdastyryldy. Keşe Dostyq üiınde atalmyş baiqaudyŋ qazylar alqasynyŋ otyrysy men qatysuşylardy tyŋdau öttı.
Otyrys aldynda Dina Nūrpeiısova ruhyna taǧzym etılıp, eskertkışıne gül şoqtary qoiyldy. Astana qalasy Işkı saiasat basqarmasynyŋ bölım basşysy Aidana Qamzaeva qatysuşylarǧa sättılık tıledı. Būl baiqau qalalyqtan respublikalyq deŋgeige köterıluıne tılektestıgın bıldırıp, basqarma tarapynan qoldaityndaryn jetkızdı.
– Küi önerınde qazaq halqynyŋ tarihy men mädenietı, ruhani bailyǧy, kiesı men qasietı jatyr. Qazırgı zamanda ūlttyq kodymyzdy jastarǧa jetkızıp, nasihattaityn bır qūral, – dedı Aidana Baqytjanqyzy.
Baiqaudyŋ bastamaşysy, «Küi anasy» respublikalyq qorynyŋ jetekşısı Tölegen Quanyşev atalmyş qordyŋ jūmysyna toqtalyp, ūiym aşylǧanda bıraz ıs josparlanǧanyn, sonyŋ bärı qazır ret-retımen jüzege asyp jatqanyn atap öttı. Astana äkımdıgı alda da osyndai ūlttyq baiqaulardy qoldaityndaryna senım bıldırdı. Memleket jäne qoǧam qairatkerı, Astana qalasy Qoǧamdyq keŋesınıŋ müşesı İrak Elekeev «dombyra – haram» degen jelıkpe sözge osyndai baiqaularmen toitarys bere alatynymyzdy aitty. Belgılı küişı, önertanuşy Abdulhamit Raiymbergenov qatysuşylarǧa Almatydan beineqūttyqtau joldady. Qazylar alqasynyŋ töraǧasy Aitolqyn Toqtaǧan baiqaudyŋ maqsatyn aityp öttı.
Baiqau 14 pen 35 jas aralyǧyndaǧy jas oryndauşylar arasynda ūiymdastyryldy. Köptegen ötınış tüsıp, solardyŋ arasynda 18 qatysuşy ırıkteldı. Bügın Muzykalyq jas körermender teatrynda jeŋımpazdardy marapattau saltanaty ötedı.
