Kümändı qūrylystyŋ qūryǧyna tüsıp qalmaŋyz
Seisenbı künı Astana qalasy äkımınıŋ bırınşı orynbasary Sergei Horoşunnyŋ töraǧalyǧymen köppäterlı tūrǧyn üilerge ülestık qatysu mäselelerı jönındegı vedomstvoaralyq komissiianyŋ kezektı otyrysy ötıp, onda nysandardy salu barysynda zaŋ būzuşylyqqa jol bergen 12 qūrylys kompaniiasynyŋ jaiy talqylandy.
Elordada baspanaly bolu – basty mäsele. Bıraq qalai da üilı bolamyn dep, kez kelgen qūrylys kompaniiasyna qarajat sala beruge bolmaidy. Äkımnıŋ bırınşı orynbasary Sergei Horoşunnyŋ aituynşa, bügınde tūrǧyn üige qatysty tüitkıldıŋ bırı – keibır kompaniialardyŋ rūqsat qūjattary bolmasa da päterlerdı satylymǧa şyǧaruy bolyp tūr.
Qūrylys salasy – elorda äkımdıgınıŋ erekşe nazarynda. Jergılıktı bilık äkımdık saityndaǧy «Virtualdy qabyldau bölmesı» men «Halyqtyq baqylau» aidarlaryna kelıp tüsken tūrǧyndardyŋ aryz-şaǧymyna qarai qūrylystardy ünemı tekserıp, baqylap otyrady. Bügınde qūrylys salu barysynda zaŋdylyqty saqtamaǧan 41 nysan anyqtalyp otyr. Taǧy jetı nysannyŋ qūrylys-montajdau jūmystarynda kem-ketıkter men öz erkımen basyp alu derekterı tırkelgen.
Kezektı jiynda osyndai 12 qūrylys nysanynyŋ mäselesı qaralyp, olardyŋ ökılderınen tüsınıkteme alyndy.
Memlekettık säulet-qūrylys baqylau basqarmasy basşysynyŋ orynbasary Däulet Dosqūlov aldymen «AstanaDorİndustriia» JŞS salyp jatqan «Beibarys» tūrǧyn üi keşenıne toqtaldy. «Būl nysandy tūrǧyzu tört kezeŋge bölıngen. Qūrylys saluşy nysannyŋ bırınşı kezegı boiynşa eskizdık jobany maqūldaǧan, qūrylysqa rūqsat qūjaty bar jäne qūrylys-montajdau jūmystary bastalǧan. Alaida, qūrylysşylar nysannyŋ ekınşı, üşınşı kezegın eşqandai rūqsat qūjattarynsyz jürgızıp otyr. Būǧan qosa, olar tiıstı lisenziianyŋ joqtyǧyna qaramastan, üleskerlerdıŋ qarajatyn tartyp, päterlerdı zaŋsyz satumen ainalysqan» dedı basqarma basşysynyŋ orynbasary.
«SatConstructionGroup» JŞS salyp jatqan «Semeinyi» tūrǧyn üi keşenınıŋ rūqsat qūjattarynyŋ qatarynda eskizdık jobanyŋ kelısımı men jūmys jobasynyŋ memlekettık saraptamasy bar, al qūrylys saluǧa rūqsat äzırşe nysannyŋ qaŋqasyn tūrǧyzuǧa ǧana berılıptı. Qalǧan qūjattary tügel emes.
Al Syǧanaq pen Ş.Beisekova köşelerınıŋ qiylysynda ornalasqan «Körkem Tauer» tūrǧyn üi keşenınıŋ (Qūrylys saluşy – IndustrialInnovationGroup» JŞS) qūjattarynda eskizdık joba kelısımı, jūmys jobasynyŋ memlekettık saraptamasy bolǧanymen, barlyq nysandy saluǧa berıletın rūqsat qūjaty bolmai şyqqqan.
Būdan özge, zaŋdy belden basyp, tiıstı qūjattary tügel bolmasa da jarnamasyn jariialap, päterlerdı satyp kelgen mynadai qūrylys nysandarynyŋ aty belgılı boldy:
«Elımai» TK («OtauSiti» TQK), «Tūran kvartaly» (TOO «Qazstroi T-İ-A»), №199 ben S304 köşelerınıŋ qiylysynda ornalasqan tūrǧyn üi keşenı (qūrylys iesı – «Agropromgrajstroi»), «EkoDom» TK («NŪR NŪR» TQK),»Zere – 2» TK («Altyn Sapa 2011» JŞS), «Leia+» pen TK «Leia Sarybūlaq» («BestRealEstate» JŞS), «Lazurnyi bereg» TK («Simurg 2000» JŞS) jäne Syǧanaq köşesınıŋ oŋtüstık bölıgınde, Tūran daŋǧylynyŋ batysynda jobalanǧan köppäterlı tūrǧyn üi keşenı, qūrylys saluşysy – Litvak Grigorii Borisovich.
Atalǧan nysandardyŋ qūjattary tolyq emes, ärqaisysynda şikılıkter bar. Soǧan qaramastan qūrylys saluşylar päterlerdı saudaǧa şyǧaryp kelgen.
Astana äkımınıŋ bırınşı orynbasary Sergei Horoşun qala tūrǧyndaryn qarajatyn üige salarda kümändı kompaniialardan aulaq boluǧa şaqyrdy. Aldymen qūrylys kompaniiasynyŋ qūjattaryn sūrastyryp, tiıstı rūqsat qaǧazdaryn tügel tekserıp alǧany jön nemese äkımdıkke, oǧan qarasty tiıstı basqarmalardyŋ kömegıne jügınuge bolady. Mūndai aqparatty bılgısı kelgen tūrǧyndar Astana qalasy äkımdıgınıŋ www.astana.gov.kz saityn qarauǧa nemese Säulet jäne qala qūrylysy basqarmasy men Memlekettık säulet-qūrylys baqylau basqarmasyna habarlasuǧa bolady. Olar sūrau jıberılgen qūrylys nysany turaly tolyqqandy mälımet beruge ärqaşan daiyn.
Qymbat TOQTAMŪRAT
Materialdy “Astana aqşamy” gazetınıŋ astana-akshamy.kz resmi saityna sılteme jasaǧanda ǧana paidalanuǧa rūqsat etıledı.