Täuelsızdık saraiynda jas suretşı, «Şabyt» halyqaralyq festivalınıŋ laureaty, «Daryn» memlekettık jastar syilyǧynyŋ iegerı Nūrbolat Asqardyŋ «Ömır» atty jeke körmesı ötıp jatyr. 21 qazanǧa deiın jalǧasatyn körmege taŋdauly kartinalary qoiyldy.
Ekspozisiia negızın taqyryptyq kartinalar men peizaj baǧytynda salynǧan suretter qūraidy. Olardan otbasylyq ömır, sondaǧy qyzyqtar sekıldı kündelıktı ömırde kezdesetın körınısterdı tamaşalauǧa bolady. Bır sözben aitqanda, körme atauyna sai keledı.
Mamandardyŋ pıkırınşe, suretşınıŋ taŋdaǧan taqyrypqa erekşe közqarasy bar. Kartinalardan tereŋ oi da, suretşı şeberlıgı de baiqalady. Bastysy, Nūrbolat aksentterdı dūrys qoia bıledı. Suretşı kıbırtıktemei, qylqalamdy erkın ūstaidy. Kompozisiia jäne tüspen eksperimentterge batyl barady. Boiaulardy da üilestıre bıledı. Ol sūlulyqty alystan ızdemei, jaqynnan köre alady.
«Şyǧarmaşylyq adamǧa talant qana azdyq etedı. Bır biıkterge jetu üşın eŋbek te kerek. Nūrbolatta osynyŋ ekeuı de bar. Kartinalarynan Otanǧa, tuǧan jerge, halqyna degen mahabbaty esıp tūrady. Men onyŋ bolaşaǧyna senem. Osy baǧytynan taimasa, jas suretşını alda ülken biıkter kütıp tūr» deidı balalar körkemsuret mektebınıŋ direktory Gülziia İsenova.
