Astana qalasy mäslihatynyŋ jaqynda ötetın kezektı sessiiasynda qalada mädeniettı, dene şynyqtyru men sportty damytu jaiy qaralady. Osyǧan bailanysty mäslihat deputattary ekı kün boiy bırqatar mädeni jäne sport nysandaryn aralap, olardyŋ jaǧdaiymen tanysty. Atalǧan salalarda jetıstıktermen qatar kemşılıkter jetıp artylady eken. Sonyŋ ışınde deputattar tüitkılderge nazar audardy.
JASTAR SARAIY JASTARǦA ARNALADY
Juyrda Astana äkımı Baqyt Sūltanov Jastar jylynyŋ bastaluyna orai biyl Jastar saraiynyŋ bazasynda «Jastar Synergy» elordalyq jastar haby qūrylatynyn mälımdedı. Hab jaŋaşyl jastarǧa, jas käsıpkerlerge, frilanserlerge, sifrlyq auditoriiaǧa köpbeiındık qyzmet körsetıp, jastar men memlekettık organdardy bırıktıretın resurstyq ortalyqqa ainalady. Mejelı mındetke jetu üşın qala basşysy Jastar saraiyn jöndeuge tapsyrma berdı. Deputattar aldymen osy nysanǧa at basyn būrdy.
Qalalyq mäslihattyŋ deputaty ärı osy mädeni oşaqtyŋ direktory Sergei Solodovnikovtyŋ aituynşa, nysanǧa, şynymen de, kürdelı jöndeu kerek. 1974 jyly salynǧan ǧimarattyŋ tozyǧy äbden jetken. Kommunikasiialardyŋ 80 paiyzy jaŋartudy qajet etedı. Qazırgı taŋda jobalyq-smetalyq qūjat äzırlenıp, memlekettık saraptamadan ötıp jatyr.
– Qala basşysynyŋ tapsyrmasymen jaqynda Jastar saraiy Mädeniet jäne sport basqarmasynyŋ balansynan alynyp, «Astana jastary» kommunaldyq memlekettık mekemesıne berıldı, – deidı S.Solodovnikov.
Aita ketetın jait, mädeni oşaqta bügınderı on ekı üiırme jūmys ısteidı. Olarǧa 200-den asa bala barady. Köpbalaly jäne az qamtylǧan otbasylardan şyqqan balalar üiırmelerge tegın qatysady. Aqyly üiırmeler de bar. «Mūnyŋ sebebı, bızdı 31 paiyzǧa ǧana qalalyq biudjet qarjylandyrady. Qarjynyŋ qalǧan 69 paiyzyn özımız tabamyz. Mekemede 143 adam jūmys ısteidı. Olarǧa jalaqy töleu üşın aiyna şamamen alǧanda 7 million teŋge tabuymyz kerek. Sol aqşaǧa kabinetterde aǧymdaǧy jöndeudı de jasap jatamyz» deidı mekeme direktory.
TEATR JERTÖLESıNIŊ TÜITKILI
Bügınderı «Jastar» teatry otyrǧan ǧimarat 1954 jyly salynyp, bastapqyda «Temırjolşylar» saraiy ataldy. Qala Astana atanǧan soŋ, onda K.Bäiseiıtova atyndaǧy opera jäne balet teatry ornalasty. 2015 jyly «Jastar» teatryna berıldı.
Mäslihat deputattary nysanǧa barǧanda 15-16 nauryzda premerasy ötetın «Aiman-Şolpan» muzykalyq komediiasyna daiyndyǧynyŋ üstınen tüstı. Spektakldı qoiuşy rejisser Nūrqanat Jaqypbai deputattardy premeraǧa şaqyrdy.
– Osydan tört jyl būryn teatrdy jöndeuge 150 million teŋge bölındı. Alaida qazır bızdı osy teatrǧa qatysty bır närse qatty mazalap otyr. Mädeni oşaqtyŋ jertölesın köktem şyqqanda jerasty sulary basady. Būl jaǧdai bırneşe jyldan berı qaitalanyp kele jatyr. Mäselenı şeşuge, iaǧni jertölenı jöndeuge 89 million teŋge kerek. Osy qarjyny qanşa sūrasaq ta, sūranysymyz qanaǧattandyrylmady, – dedı Mädeniet jäne sport basqarmasynyŋ basşysy Bolat Majaǧūlov.
Osyǧan ūqsas jaǧdai ılgerıde teatrmen körşıles S.Seifullin atyndaǧy Qazaq agrotehnikalyq universitetı men №1 qalalyq emhanada da oryn alǧan eken. Būl turaly aitqan qalalyq mäslihat deputattary, atalmyş universitet rektory Aqylbek Kürışbaev pen Mäjit Şaidarov mäselenı qalai şeşkenderın jetkızdı. Drenaj ben gidrooqşaulau jasatqandaryn, būl jūmystar qymbatqa tüsse de, tüitkıldı şeşetının aityp öttı.
Jertöleden joǧary tura sahna ornalasqan eken. «Tömennen keletın ylǧal ärtısterdıŋ densaulyǧyna da ziian ǧoi. Ökpelerıne bır suyq tise, qaita-qaita auyra beredı ǧoi» degen M.Şaidarov mūnyŋ taǧy bır kerı äserın tılıne tiek ettı.
Jalpy, ǧimaratqa tehnikalyq audit jasalyp, jertöle apatty bolyp tanylǧan. Deputattar tömen tüsıp, jaǧdai şynymen kürdelı ekendıgıne köz jetkızdı. «Nysanda K.Bäiseiıtova atyndaǧy opera jäne balet teatry otyrǧanda, iaǧni 1999-2015 jyldardyŋ aralyǧynda mūnda mülde jöndeu jūmystary jürgızılmegen» dedı B.Majaǧūlov. Jertöledegı armaturalar şynymen şıruge ainalypty. Sol sebepten sahnanyŋ da opyrylyp tüsu qaupı tuyndaǧan. Osynyŋ bärın eskergen mäslihat deputattary kezektı sessiiaǧa deiın jertölenı jöndeu boiynşa jobalyq-smetalyq qūjattamany äzırlep, ūsynu kerektıgın aitty.
SİRKTE ŞATAQ QAIDAN ŞYQTY?
Elımızdıŋ tört qalasynda sirk jūmys ısteidı. Sonyŋ bırı de bıregeiı – «Astanalyq» sirk. Deputattar būl nysanǧa barǧanda mekeme direktory Erık Joljaqsynov sirktı aralatyp, ekı tüitkıldı jetkızdı. Bırınşıden, ǧimarat 2005 jyldan berı jöndeu körmegen.
– Tiıstı talap boiynşa sirk kümbezı örtke tözımdı materialdan boluy kerek. Qūrylys kezınde būl talap saqtalmai, kädımgı şüberek ılıngen. Jaman aitpai, jaqsy joq, alda-jalda ǧimarattan ört şyǧatyn bolsa, ne bolatynyn oilaudyŋ özı qorqynyşty. Bızdıŋ körermenderımız – balalar ǧoi. Jylyna olarǧa arnap 120 qoiylym qoiamyz. Bırneşe jyl būryn kümbezdı jöndeuge 29 million teŋge sūradyq. Sūranysymyz qanaǧattandyrylmady. Sosyn infliasiiaǧa ūrynyp qaldyq, – dedı E.Joljaqsynov.
Onyŋ üstıne, sirkte tötenşe jaǧdailar kezınde şyǧatyn üş esık bar edı. Bıreuın qazır ǧimarattyŋ tömengı qabatynda ornalasqan dämhana iesı jauyp tastaǧan. Būl tamaqtanu orny «Astana» ÄKK» ŪK arqyly jalǧa berılgen. İesı sirk direktoryn pysqyrmai, oiyna kelgenın ıstep otyr. Özı japtyrǧan esık jaqta qūrylys jürgızıp, qabyrǧa qalap tastady. «Būl äreketıŋızben körermenderge, sirk qyzmetkerlerıne qauıp tudyryp otyrsyz desem, könbeidı. Jalpy, Tötenşe jaǧdailar departamentınıŋ de eskertuın elemei otyr. «Joǧaryda myqty tıregım bar. Maǧan eşteŋe ıstei almaisyŋdar» dep otyryp aldy. Onyŋ üstıne, dämhana satyp alu qūqyǧymen oǧan jalǧa berılgen. Kelısımşartty oqyǧanymda soǧan köz jetkızdım» dedı sirk direktory.
Būl keleŋsızdıktı estıgen qalalyq mäslihat deputattary mūnda bıraz tüsınıksız jaǧdailar oryn alyp otyrǧanyn aitty.
Mūnyŋ anyq-qanyǧy kezektı sessiiada anyqtaluy tiıs.
NÖSERDIŊ KESIRI
«Mäŋgılık el» saltanat qaqpasynyŋ ışınen ekı-üş jyl būryn körme galereiasy men şolu alaŋy aşyldy. Keluşıler nysanǧa jerasty ötkelı arqyly kıredı. Alaida nöser jauǧanda oǧan kıru mümkın emes. Töbeden su sorǧalap, kıreberıstı alyp ketedı. Sonyŋ kesırınen jasalǧan jöndeu jūmystary da dalaǧa ketıp jatady. Jaǧdaidy retke keltıru üşın ötkeldıŋ üstınen ötetın kölıkter jolynyŋ qabatyn tügelımen auystyru qajet. Būl turaly aitqan B.Majaǧūlov osy jūmystarǧa 600 million teŋge kerektıgın jetkızdı. Onyŋ üstıne, 21,5 metr biıktıktegı şolu alaŋynan jūmyskerler qardy qolmen şyǧarady.
Ekınşı künı mäslihat deputattary dene şynyqtyru jäne sport nysandaryn aralady. Aldymen Olimpiadalyq rezervtıŋ №4 mamandandyrylǧan balalar men jasöspırımder sport mektebıne barǧanda mūndaǧy tüitkıldermen Mädeniet jäne sport basqarmasy basşysynyŋ orynbasary Berık Marjyqbaev pen mektep direktory Maqsat Qadyrbaev tanystyrdy. Nysannyŋ töbesınen su aǧady eken. Negızı, su sporty türlerıne arnalǧan mektepte bassein de joq. Jas sportşylar būryn «Qazaqstan» sport keşenındegı basseinge baryp daiyndalsa, qazır ondaǧy bassein jöndeuge jabylyp, balalar «Barys Arena» mūz saraiyna baruǧa mäjbür. Būl jaǧdaiǧa ata-analar narazylyq tanytyp otyr.
Aita keterlıgı, «Qazaqstan» sport keşenı ekı jyldai būryn «Astana» ÄKK» ŪK basqaruyna berıldı. Alaida moinyna alǧan mındettı kompaniia baiau atqaryp otyr. Apatty bolyp tanylǧan bassein bıraz uaqyttan berı ıstemei tūr. Tiıstı jobalyq-smetalyq qūjat ta älı jasalmaǧan. Mäslihat deputattary sport keşenıne barǧanda osyny bıldı.
Būǧan qosa, deputattar «Barys Arena» mūz saraiyna, jaqynda aşylǧan Paralimpiialyq jattyǧu ortalyǧyna, «Alan» gimnastika akademiiasyna bardy. Alǧaşqy nysanda tüitkılder mülde joq dep aitsa da bolady. Mūz saraiy avtonomdy jylu jüiesınde otyryp, būryn bıraz qarjyny dalaǧa ketırse, biyl ortalyq jylu jüiesıne qosylmaq. Al qalǧan ekı nysan boiynşa bıraz jūmys ısteu kerek. Aralau barysynda deputattar köŋılderıne bırtalai närsenı tüidı. Endı kezektı sessiiada anyqtalǧan mäseleler jan-jaqty qaraluy tiıs.
