Astana qalalyq «Nūr Otan» partiiasynyŋ filialy soǧys jäne tylda eŋbek etkenderdı nazardan tys qaldyrmai, ünemı qamqor qolyn sozyp keledı. Jyl saiyn ötetın «Ardagerlerdı ardaqtaiyq!» şarasy aiasynda nūrotandyqtar ardagerlermen kezdesu, olardyŋ päterlerıne baryp äŋgımelesu, türlı syilyqtar tapsyru siiaqty qamqorlyq şaralaryn tūraqty türde jürgızıp keledı. Biyl da būl igılıktı şara qolǧa alyndy.
Aksiianyŋ alǧaşqy künı «Jas Otan» jastar qanatynyŋ müşelerı soǧys ardagerlerı Süleimen Aitqojinov, Qūrmanbai Aitjanov, Aleksandr Balakin, Äubäkır Qojymūratov, Sihymbai Mamyrovtardyŋ üilerınde bolyp, jastar qariialardyŋ aulasyn tazartyp, üi şaruasyna järdemdesıp, türlı syilyqtar tabys ettı. Jalpy, «Jas Otan» jastar qanatynyŋ 50-ge juyq jastary ardagerler tūratyn köşenı, aulany Jeŋıs künı qarsaŋynda tazartyp, qariialardyŋ alǧysyn alyp qaitty.Soǧys jauyngerı Sihymbai Mamyrov jastarmen bolǧan äŋgımesınde qan maidandy esıne aldy. Dneprde bolǧan keskılesken ūrysta 1943 jyly sol jaq jambasynan jaraqat alǧanyna qaramastan, Jeŋıs üşın qasyq qandary qalǧanşa soǧysqan ardager Sihymbai ata 1944 jyly Sevastopolde bomba jarylǧanda, topyraq astynda kömılıp qalǧanyn älı künge deiın ūmytpaidy eken. Tänıne tüsken jaradan emes, janyn jaralaǧan sol bır sūm soǧysty bügıngı ūrpaqtary körmesın dep tıleidı ol.
– Ekınşı düniejüzılık soǧysta erlıktıŋ has ülgısın körsetken maidangerlerdı madaqtau, olardyŋ aldynda bas iıp qūrmetteu – bügıngı ūrpaqtyŋ būljymas paryzyna ainaluy tiıs, – deidı «Nūr Otan» partiiasy Astana qalalyq filialy töraǧasynyŋ bırınşı orynbasary Edıl Mamytbekov. Uaqyt ötken saiyn sol bır sūrapyl soǧystyŋ kuägerlerı bolǧan qaharmandardyŋ qatary sirep barady. Sondyqtan da ardagerlerdı ardaqtaudy bügıngı jastar eşqaşan nazardan tys qaldyrmau kerek. Rasynda da, qan maidanda jaŋbyrdai jauǧan oqtyŋ astynda mūz jastanyp, qar jamylyp, qanyn tökken atalarymyz ben tylda aryp-aşyp eŋbek etken qariialarymyzdyŋ aldynda bız ömırbaqi qaryzdarmyz. Öitkenı būlar – ardaqty ardagerler.
