Ä. Mämbetov atyndaǧy Memlekettık drama jäne komediia teatrynda KSRO halyq ärtısı, KSRO jäne Qaz KSR Memlekettık syilyqtarynyŋ laureaty, Halyq Qaharmany Äzırbaijan Mämbetovtıŋ 90 jyldyǧyna arnalǧan eske alu keşı öttı. Şara barysynda sahna sardarynyŋ otbasy müşelerımen, bırge qyzmet ıstegen teatr jäne öner qairatkerlerımen, şäkırtterımen şyǧarmaşylyq kezdesu ūiymdastyryldy.
Keş özgeşe formatta ötkızıldı. Sūhbattar jäne interaktivtı oiyndarǧa kezdesu qonaqtary Ä.Mämbetovtıŋ jary QazKSR halyq ärtısı, Qazaq ūlttyq öner universitetınıŋ professory Qorlan Qalilambekova, nemeresı Karina İzmailova, küieu balasy Nūrlan İzmailov, qyzy Dina Mämbetova qatysty. Sonymen qatar Qazaqstannyŋ halyq ärtısterı Tılektes Meiramov pen Güljan Äspetova, Rymkeş Omarhanova, Nūrken Öteuılov, Quandyq Qystyqbaev, Syrym Qaşqabaev, Altynai Nögerbek, Nūrlan Jūmaniiazov, Bekbolat Qūrmanǧojaev, Mūrat Maqsūtov, Beibıt Bahtygereev, rejisser ömırınıŋ soŋǧy jyldary eŋbek etken. Q.Quanyşbaev atyndaǧy Qazaq memlekettık akademiialyq muzykalyq drama teatrynyŋ direktory Aibolat Jäudır, Muzykalyq jas körermen teatrynyŋ direktory Ashat Maemirov, «Jastar» teatrynyŋ körkemdık jetekşısı Nūrqanat Jaqypbai, Janqaldybek Tölenbaev, Leilo Beknazarqyzy Haninga, Amantai Jūmaşev, Aqyş Omar estelıkterımen bölıstı.
Güljan Äspetova Qūrmanǧazy atyndaǧy konservatoriiany bıtırerde diplomdyq jūmysynda Qaragözdı oinady. Komissiia töraǧasy Äzırbaijan Mädiūly boldy. Äigılı rejisser Äspetovanyŋ oiynyna täntı bolyp, M.Äuezov teatryna jūmysqa şaqyrdy. Keiınnen teatrda «Qaragözdı» qoiǧanda osy röldı oǧan berdı. 1999 jyly Äzırbaijan Mämbetov Elbasynyŋ şaqyruymen Q.Quanyşbaev atyndaǧy teatrǧa bas rejisser bolyp keldı. Sol kezde Almatydan bırınşı şaqyrǧan ärtısterdıŋ bırı – Güljan Äspetova. Aktrisa bastapqyda rejisserdıŋ kömekşısı bolyp, keiınnen Äzırbaijan Mädiūly sahnalaǧan spektaklderde keiıpkerlerdı somdady. Aktrisa sol kezder turaly äŋgımeledı.
Äzırbaijan Mämbetov 4-kursta oqyp jürgen Tılektes Meiramovqa Ǧabit Müsırepovtıŋ «Qozy Körpeş–Baian sūlu» tragediiasyndaǧy basty keiıpker – Qozy rölın senıp tapsyrdy. Akterdıŋ astanaǧa qyzmet auystyryp, Qalleki teatryna tez sıŋısıp ketuıne de Äzırbaijan Mädiūlynyŋ kömegı zor boldy. Osyny aitqan akter Äzırbaijan Mämbetov bas qalaǧa auysyp kelgende Mūhtar Äuezov teatryndaǧy tamaşa dästür men syilastyqty, adami qarym-qatynasty, airyqşa bır jylylyqty özımen bırge Qalibek Quanyşbaev teatryna da ala kelgenın, sol qasiettı ūjym boiyna sıŋırgenın jetkızdı.
Kezdesu barysynda keş qonaqtaryna sūraqtar qoiylyp, otbasylyq jeke mūraǧattan beinejazbalar körsetıldı. Biyl 22-30 qazan aralyǧynda elordada ötetın «TEATRALL» II halyqaralyq teatr festivalı Äzırbaijan Mämbetovtıŋ 90 jyldyǧyna arnalatyny aityldy.
