Keşe «Astana» konsert zalynda elorda äkımınıŋ orynbasary Qosman Aitmūhametov elorda tūrǧyndarymen eseptı kezdesuın ötkızdı. Jiynǧa qalalyq Ardagerler keŋesı men qoǧamdyq keŋestıŋ töraǧasy Sansyzbai Esılov qatysty.
ELU KÖŞE JÖNDELDI
Jiynda äkım orynbasary qaladaǧy kommunaldyq şaruaşylyq, energetika, qorşaǧan ortany qorǧau, tötenşe jaǧdailardyŋ aldyn alu, kölık infraqūrylymy jäne kögaldandyru salalary boiynşa atqarylǧan jūmystarǧa toqtaldy. Ol öz sözınde bügınde bas şaharǧa jylu beretın energetikalyq ortalyqtardyŋ qalypty rejimde jūmys ıstep tūrǧandyǧyn jetkızdı. Osy saladaǧy sūraqtardyŋ bärı qalalyq ştabta talqylanatynyn aitty. Elordaǧa qarasty su qoimalary da, elektr stansalarynyŋ qyzmetı de qalypty ekendıgı aityldy. Ötken jyly bırqatar köşelerde jylu jelılerı jaŋartylǧan.
«Byltyr 50 köşede jalpy ūzyndyǧy 44 şaqyrymǧa sozylǧan ortaşa jöndeu jürgızıldı. 35 köşege 34 km qūraǧan ortaşa aǧymdyq jūmystary atqaryldy. «Jūmyspen qamtu jol kartasy – 2020» baǧdarlamasy aiasynda 15 köşege jöndeu jasaldy. İlinka tūrǧyn alabynda 50 köşe salyndy. Onyŋ 32-sıne asfalt töseldı» dedı Qosman Qaiyrtaiūly.
Elordada dübırlep ötken EKSPO-2017 halyqaralyq mamandandyrylǧan körmesın ötkızu kezınde jūmys ısteuı tiıs nysandar men «Myŋjyldyq» saiabaǧynyŋ, jaŋa temırjol vokzaly maŋy, oŋtüstık-şyǧys audany, Orynbor, Tūran daŋǧyldary siiaqty qalanyŋ damyp jatqan bölıkterın jylumen qamtamasyz etu maqsatynda elorda äkımdıgı 4-şı jäne 5-şı kırısterdıŋ jylu magistraldaryn salu jobasyn jüzege asyrǧan.
EKI KÖPIR PAIDALANUǦA BERILEDI
Odan keiın qala äkımınıŋ orynbasary alda jüzege asatyn jūmystarǧa şolu jasady. Biyl 9 şaqyrymǧa sozylǧan jylu jelılerı jaŋǧyrtylady. Sondai-aq, 48 km qūraityn su qūbyrlaryna jöndeu jürgızıledı.
«2018 jyly bas şahardaǧy kölık jüretın ekı ülken köpır paidalanuǧa berıledı. Kışı ainalma jolynyŋ qūrylysy şeŋberınde Saraişyq köşesınıŋ jalǧasy – Tūran men Beisekovanyŋ arasy qosylady. Būl uchaskenıŋ jūmysy qala künıne deiın aiaqtalady. Sonymen bırge Beisekova köşesınıŋ 3 şaqyrym jolyn jöndeu jūmystary jalǧasady. Abylaixan daŋǧyly men Qoşqarbaev köşesı qiylysyndaǧy jol aiyryǧynyŋ qūrylysy bıtedı» dedı Q.Aitmūxametov.
Onyŋ aituynşa, biyl qaladaǧy 32 köşege jol jöndeu jūmystary jürgızıledı. Onyŋ jartysy – Köktal-2, İnternasionalnyi men Michurino eldı mekenderıne qatysty. Jäne 60 köşede jalpy ūzyndyǧy 35 şaqyrym joldarda ortaşa jöndeu jasalady. Qosman Qaiyrtaiūly kezdesude qalanyŋ kögaldandyru mäselesıne de toqtaldy. Bügınde Astanada 10 saiabaq, 4 bulvar jäne 95 gülzar bar. Osy jyly şaharda 14 gülzar paidalanuǧa berıledı. Olardyŋ köbı eskı sürılgen üilerdıŋ ornynda bolady. Elordalyqtarǧa taǧy bır jaǧymdy jaŋalyqty jetkızeiık. Biyl aumaǧy 92 gektardy alyp jatqan «Botanikalyq baqtyŋ» qūrylysy aiaqtalady. Onyŋ qūramynda ekı jylyjai bolady. Oǧan älemnıŋ köptegen elderınen köpşılıkke aty ǧana tanys zaty beimälım aǧaştar äkelıp egıledı.
LİFT JYRY TAUSYLMAIDY
Qosman Aitmūhametovtıŋ baiandamasynan keiın tūrǧyndardyŋ sūraq qoiu kezegı bastaldy. Sözdı aldymen «Grand Astana» tūrǧyn üi keşenınıŋ tūrǧyny aldy. Ol äkım orynbasaryna atalǧan üidegı liftınıŋ qalai qūlaǧanyn aityp berdı.
«Keşe üiımızde lift qūlady. Onyŋ ışınde menıŋ joldasym jäne taǧy 4 adam boldy. Lift jetınşı qabattan qūlady. Bıraq ony basqaşa jetkızıp jatyr. Liftınıŋ tejegışı ıstep kettı deidı. Negızınde, olai emes. Menıŋ küieuım segızınşı qabattan liftıge kıredı. Jetınşı qabattan taǧy ekı jas jıgıt mınedı. Sol kezde liftınıŋ bır närsesı üzılgendei tömen qarai qūldilaidy. Onyŋ qatty qūlaǧany sonşa, ışındegı adamdardyŋ bärı bastaryn töbege soǧady. Qūdai saqtaǧanda, lift bırınşı jäne ekınşı qabattyŋ arasynda toqtaǧan. Küieuım maǧan qoŋyrau şalyp, PİK direktorynyŋ telefon nömırın sūrady. Oǧan zvondasaq, almaidy. Adamdar liftte 50 minut otyrdy. Olardy joǧary köterıp, üstıŋgı qabattan şyǧardy. Osyny qalai tüsınuge bolady?» dedı Ekaterina Manataeva. Äkım orynbasary atalǧan mäselenı baqylauda ūstap otyrǧanyn aityp: «Bız keşırım sūraimyz. Rasynda da, keşe ondai jaǧdai boldy. Bıraq eşkım jauapkerşılıkten qaşyp otyrǧan joq. Qazır arnaiy komissiia qūryldy. Bır-ekı künde «Grand Astananyŋ» liftterın tekseremız. Alaŋdamaŋyz. Tiıstı şaralardy qolǧa alamyz» dedı ol.
ASFALT EMES, TAS JOL TÖSELEDI
«187-şı köşede tūramyz. Bızdıŋ üiımız 2010 jyly memlekettık baǧdarlamamen berılgen. Bıraq sodan berı üidı qala älı balansyna alǧan joq. İnjenerlık jelıler de dūrys emes. Aulada balalar oinaityn alaŋ da joq. Kışkentailarymyzdy qaida jıbererımızdı bılmeimız. Qaşan bızdıŋ üi qalanyŋ balansyna kıredı» degen tūrǧynnyŋ sūraǧyna Qosman Qaiyrtaiūly: «Bız ol üige injenerlık jelılerdı jürgızdık. Būl jūmys demeuşılerdıŋ qoldauymen ıske asyryldy. Endı balalardyŋ oiyn alaŋdary boi köteredı. Sız aitqan mäselenı bılemız. Ūzamai, oŋ şeşımın tabady» dep jauap berdı.
«Lesozavod tūrǧyn alabyndaǧy «Öndırıs» köşesındegı 8 üidıŋ tūrǧyndardyŋ atynan kelıp otyrmyn» dep sözın bastady Ömırtai Aqpaev degen aqsaqal. «Bızdıŋ segız üi köşenıŋ bas jaǧynda ornalasqan. Bylaişa aitqanda, qaltarysta tūr. Joly öte jaman. Köktemnen qara küzge deiın batpaq keşıp jüremız. Sodan qatty qinalamyz. Üşqoŋyr köşesıne şyǧatyn joldyŋ arasy – 250 metr. Osyǧan asfalt tösep berseŋızder» dedı qariia. «Jaqsy, biylǧy josparǧa kırgızemız. Bıraq ol jerge asfalt emes, tas jol salyp beremız» dedı Q.Aitmūhametov.
ALǦYS TA AITYLDY
Kelesı kezekte Almaty audanyndaǧy Baǧanaly köşesınıŋ tūrǧyny S.Eŋsebaeva degen azamatşa sol köşedegı 19 jeke tūrǧyn üidıŋ ielerı özderı ūiymdasyp, kärız jelılerın tartqyzǧanyn aityp, bıraq sonyŋ qūjattaryn bır-ekı jyldan berı älı daiyndai almai jürgenın aitty. Oǧan Qosman Qaiyrtaiūly jiynǧa qatysyp otyrǧan Säulet jäne qala qūrylysy basqarma basşysynyŋ orynbasaryna atalǧan mäselenı qadaǧalaudy tapsyrdy. Kezdesu barysynda päter ielerı kooperativterınıŋ jūmysyna qatysty da sūraqtar qoiyldy. Qalyŋ jauǧan qar da nazardan tys qalmady. Äkımnıŋ orynbasaryna rizaşylyǧyn bıldırgen azamattar da boldy.
Bır sözben aitqanda, jiynda kündelıktı tırşılıkte onşa bılınbegenmen, bıraq aiaǧymyzdy san orap jatatyn tūrmystaǧy maŋyzy zor mäseleler köbırek qauzaldy. Astana äkımınıŋ orynbasary Qosman Aitmūhametov jiyrmadan astam tūrǧynnyŋ sūraqtaryna jauap berdı.
Azamat ESENJOL
