Qalalyq äkımdıktıŋ keŋeitılgen jinalysynda elorda basşysy Ädılbek Jaqsybekov pen «Astana EKSPO-2017» ŪK töraǧasy Ahmetjan Esımov elımız üşın ülken syn bolǧaly tūrǧan aldaǧy halyqaralyq mamandandyrylǧan körmege daiyndyqtyŋ jai-küiın jäne ony ötkızuge bailanysty tuyndaityn mäselelerdı talqylady.
Basqosu barysynda aituly şaraǧa qatysty atqarylyp jatqan şarualar turaly tiıstı vedomstvo ökılderınıŋ esepterı tyŋdaldy. Atap körseterlık bır jait, joǧaryda atalǧan taraptar arasynda ūzyn-sany 50 ıs-şara engızılgen jūmys jospary äzırlengen. Sonymen qatar, bas şahardyŋ barlyq qyzmetterı men ūlttyq kompaniianyŋ bırlese äreket etuıne negız bolyp otyrǧan ärıptestık Memorandumy şarttary oidaǧydai oryndaluda.
«Bızdı ülken de jauapkerşılıktı jūmys kütıp tūr. Osy oraida Ūlttyq kompaniia men qalalyq äkımdıkke qarasty mekemeler öz maqsattaryn bır arnaǧa toǧystyruy qajet. Öitkenı, aldymyzda jūmyla atqaryluǧa tiıs ortaq mındetter tūr» dedı elorda äkımı.
Qūrylys jūmystaryn jürgızu kestesıne säikes EKSPO nysandary 2016 jyly salynyp bıtuı kerek. Bügınde Astana äkımdıgı körmege äzırlık aiasynda qalanyŋ infraqūrylymy men elordalyq servis sapasyn jaqsartu, sondai-aq, aqparattyq nasihat pen şet elderden turisterdı tartu baǧytynda auqymdy jūmystar atqaruda. EKSPO kezınde jüzege asyrylatyn şaralar legıne erekşe köŋıl bölınude. Körme bolyp jatqanda älem astanalary künın, ärtürlı festivalder, konserttık baǧdarlamalar, halyqaralyq konkurstar, sporttyq jarystar men biznes-forumdar ūiymdastyru josparlanǧan. Qauıpsızdıktı qamtamasyz etu jaǧy da nazardan tys qalmaq emes.
Logistika mäselesı de airyqşa maŋyzǧa ie. Sondyqtan qazırgı uaqytta halyqaralyq äuejai terminalyn keŋeitu, temır jol vokzaly men jeŋıl relstı kölık jolaqtaryn salu sekıldı bırqatar ırı jobalar ıske qosyluda. Būl rette elorda meimandaryn qabyldaǧanǧa deiın navigasiia jüiesı de jaqsartylady.
Qazannyŋ 31-ı künı Milanda EKSPO-2015 öz jūmysyn aiaqtap, Astanada EKSPO-2017 tuyn saltanatty türde tabystau räsımı ötedı. «Sol mezetten bastap bükıl nazar bızdıŋ körmege auady. Asa auqymdy «EKSPO-2017» körmesın ötkızuge barlyq memlekettık organdar men oblystar atsalysatynyna qaramastan, negızgı auyrtpalyq Ūlttyq kompaniia men elorda äkımdıgınıŋ moinyna tüsedı. Körmenı dūrys ötkızu üşın bızdıŋ aramyzda özara tüsınıstık pen senımdı serıktestıktıŋ boluy öte maŋyzdy» dedı jiynda söz söilegen Ahmetjan Esımov.
