Keşe Aqordada Elbasy Nūrsūltan Nazarbaevtyŋ töraǧalyǧymen Ükımettıŋ keŋeitılgen otyrysy öttı. Alqaly jiynda biylǧy toǧyz aidaǧy elımızdıŋ äleumettık-ekonomikalyq örkendeu deŋgeiı jäne älemdegı damyǧan 30 memlekettıŋ qataryna qosyluǧa bailanysty jasalǧan josparlardyŋ alǧaşqy legı talqylandy.
Jiynda söz söilegen Premer-ministr Serık Ahmetov biyl Elbasynyŋ «Qazaqstan – 2050» strategiiasy: qalyptasqan memlekettıŋ jaŋa saiasi baǧyty» atty Joldauynda aitylǧan tapsyrmalardy jüzege asyruǧa basty köŋıl bölıngenın atap öttı.
–Bırınşı kezekte ekonomikanyŋ tūraqty ösımın qamtamasyz etuge män berıldı jäne jaŋa jūmys oryndaryn aşuǧa nazar audaryldy. Sızdıŋ tapsyrmaŋyz boiynşa daǧdarysqa qarsy der kezınde qabyldanǧan şaralardyŋ arqasynda elımızdıŋ äleumettık ekonomikalyq damuynda oŋ ürdıs saqtaldy, – dedı Serık Ahmetov.
İndustriialandyru salasynda da oŋ özgerıster baryna toqtalǧan Ükımet basşysy bırınşı jartyjyldyqta 34 joba ıske qosylǧanyn jetkızdı. Ondaǧy investisiia 72 mlrd teŋgege jetıp, 2300 şamasynda tūraqty jūmys oryndary qūrylǧan.
Elımızde käsıpkerlıktı qoldau jūmystary da jalǧasyp keledı. Aitalyq, bizneske qatysty barlyq lisenziialardy beru avtomattandyrylǧan jüiege köşe bastaǧan. Kelesı jyldan bastap rūqsattyŋ barlyq türı osy nūsqaǧa auysatyn bolady.
Bılım salasynyŋ jai-küiıne de toqtalǧan Ükımet basşysy «Balapan» baǧdarlamasy boiynşa mektepke deiıngı mekemeler jelısı aǧymdaǧy jyly 1138 bırlıkke artyp, bes jasqa deiıngı balalardy qamtu auqymy 71,5 paiyzdy qūraǧanyn jetkızdı. Osy jyldyŋ soŋyna deiın taǧy 152 mektep paidalanuǧa berıledı. Al 2015 jylǧa deiın 552 mektep salu josparlanyp otyr. Söitıp, 2020 jylǧa qarai mektepterdegı oryn jetıspeuşılıgı jäne ondaǧy üş auysymmen oqu mäselesı tolyǧymen şeşıletın bolady.
El ekonomikasynda jaqsy ösım baryn QR Ekonomika jäne biudjettık josparlau ministrı Erbolat Dosaev ta naqtylady. Ministrdıŋ aituynşa, älemdık ekonomikadaǧy tūraqsyzdyqqa qaramastan, elımızde ekonomikalyq ösım baiqalyp, IJÖ soŋǧy toǧyz aida 5,7 paiyzdy qūraǧan. İnvestisiialyq belsendılık te artyp, biylǧy toǧyz aida negızgı kapitaldaǧy investisiia kölemı 7,9 paiyzǧa artqan. Būl 2009 jylǧy daǧdarystan keiıngı eŋ joǧary ösım bolyp sanalady eken.
İndustriia jäne jaŋa tehnologiialar ministrı Äset İsekeşev jaǧymdy jaŋalyqtardy jariia ettı. Onyŋ aituynşa, öŋdeu önerkäsıbındegı eŋbek önımdılıgı byltyr 2009 jylmen salystyrǧanda 1,7 esege artqan. Būl körsetkış 2015 jylǧa deiın 1,5 ese ösedı degen boljam bar.
Alqaly jiyn barysynda Elbasy Nūrsūltan Nazarbaev Ükımetke naqty tapsyrmalar jüktedı. Ministrler kabinetı tiımdı innovasiialyq käsıporyndar salu kerek. Būl jūmysqa Ükımettan bastap, oblys, audan, auyl äkımderı tügel kırısuge tiıs.
Memlekettık biudjettı josparlau jäne ony oryndau sapasyn arttyru qajettıgın qozǧaǧan Elbasy memlekettık satyp alu jüiesındegı biudjet saiasatyn oŋtailandyrudy tapsyrdy. Osy oraida biudjet jobasyna oblys äkımderınıŋ kelısımı de eskerıluı tiıs.
–Menıŋ tapsyrmamnan keiın Ükımet öŋır basşylarymen jūmys ıstei bastady. Degenmen, būlai jūmys ısteuge bolmaidy. Biudjet jobasy öŋırmen kelısıle otyryp jasaluy kerek. Ärine, ärbır öŋır özıne tartyp, qorjynyn köbeitkısı keledı. Mūny baqylap, bır ızge tüsıretın – Ükımet, – dedı Memleket basşysy.
Elımızdıŋ bılım beru jüiesındegı keibır kemşılıkterdı synǧa alǧan Prezident jastardy mamandyqqa oqytu men olardy jūmysqa ornalastyru mäselelerı älı de özektı küiınde qalyp otyrǧanyn aitty. Ony şeşudıŋ bır joly – qai öŋırge qandai jäne qanşa maman kerek ekendıgın aldyn ala bılıp otyru. Sol arqyly jastardy oqytyp, olardyŋ jūmysqa ornalasuyna järdemdesuge bolady.
Sondai-aq, Memleket basşysy testıleuge qatysty reformany da synǧa alyp: «Bıryŋǧai ūlttyq testıleuge qatysty taǧy neǧylǧan jaŋalyq? Jūrt testke endı üirene bastap edı. Taǧy jaŋasy şyqty. Būl ne özı?» dedı Bılım jäne ǧylym ministrıne qarata.
Mäselenıŋ mänın tübegeilı zerttemei tūryp, reformalar jasaudyŋ aiaǧy köptegen problemalardyŋ tuyndauyna äkeletının eskertken Elbasy medisina salasyndaǧy tüiındı mäselege de toqtalyp, keleşekte Astana men Almatyda därıgerler jetıspeuşılıgın şeşu jaǧyn qarastyrudy tapsyrdy.
Elımızdıŋ äleumettık-ekonomikalyq salasyn ärı qarai damytuǧa bailanysty tiıstı organdarǧa naqty tapsyrmalar jüktegen Elbasy elımızdıŋ ekonomikasyna oŋ baǧa bere kele, alǧa qoiǧan ülken maqsattarǧa jetu üşın jūmyla jūmys ısteuge şaqyrdy.
Qymbat TOQTAMŪRAT
