Şıldenıŋ alǧaşqy ekı aptasynda 11 bala köpqabatty üidıŋ terezesınen qūlapty. Būl degenıŋız, Astananyŋ är künınde osyndai bır oqiǧa tırkeledı degen söz. Äsırese, olardyŋ 1-4 jas aralyǧyndaǧy büldırşınder ekenın eskersek, būǧan ülkender jaǧynyŋ salǧyrttyǧy sep der edık. Olar älı künge deiın masadan qūtqaratyn tordyŋ qauıpsızdıktı küşeituge eş qatysy joq ekenın eskermei kele jatyr.
Jyl basynan berı qalada köp qabatty üidıŋ terezesınen 40-qa juyq balanyŋ qūlau faktısı tırkelgen. Biıkten qūlaǧan balalar köbıne türlı süiek jaraqatyn alyp, bas süiegı men ışkı organdary zaqymdanǧan küide öte auyr jaǧdaida jetkızıledı eken. Terezeden qūlaǧan balalardyŋ qastarynda köbıne ülken adamdar bolǧan. Üi ışınde bärı bırge, nazarda jürse de nege osyndai oqiǧa köp oryn alyp kettı? «Ata-analar köbıne moskittık tordyŋ baryna senedı. Al ol eşqandai salmaqty kötere almaidy. Ol bar eken dep balany baqylausyz qaldyruǧa bolmaidy. Jaqynda ǧana osylai balamnan aiyrylyp qala jazdadym. Endı mūndai oqiǧany eşqandai ata-anaǧa tılemes edım. Saqtyqta qorlyq joq» deidı ata-ana Aisūlu Berkımbaeva.
Al därıgerler jaǧy mūndai jaǧdaiǧa jaibaraqat qaraityn ata-analarǧa arnalǧan qoldanystaǧy zaŋnamamyzdyŋ arnaiy küşı boluy kerek dep esepteidı. Qaiǧyly oqiǧalardyŋ aldyn aludyŋ bırden bır joly terezege bala özdıgınen aşa almaityn būǧattauyştar ornatu qajet. Bölme jihazdaryn da terezeden alysyraq qoiǧan jön. Ärbır ata-ana balasyn biıkten qūlaudyŋ qorǧau jolyndaǧy qauıpsızdık şaralaryna salǧyrttyqpen qaramauy kerek.
Güljan Rahman
