Jaqynda Astana qalalyq mäslihatynda deputattar qalanyŋ densaulyq saqtau salasynda bılıktı kadrlardyŋ jetıspeuşılıgı, arnaiy tehnikanyŋ tömen jaǧdaiy jäne basqa da özektı mäselelerdı talqylady
– Bügın bız halyqqa körsetıletın qyzmetterdıŋ sapasy men jedel medisinalyq järdem stansiialarynyŋ problemalyq mäselelerı taqyrybyna qaita oraldyq. Elordada jedel medisinalyq kömek körsetu boiynşa 11 punkt bar, olardyŋ kadrlarmen qamtyluy 90 paiyzdy qūraidy. Bıraq mamandardy, äsırese jürgızuşılerdı ırıkteuge qatysty şaǧym köp tüsıp otyr. Jedel järdem jürgızuşılerınıŋ qatysuymen jol-kölık oqiǧalarynyŋ öskenı baiqaluda. Olardy jürgızuşı retınde qyzmetke alarda ırıkteu aşyq türde ötkızılmeidı, sonymen bırge kölıkke bekıtılgen jürgızuşıler kölıktıŋ tehnikalyq jai-küiın baqylamaidy, auysymdy basqa jürgızuşıge tapsyrǧan kezde kölıktı tiıstı deŋgeide qabyldap almaidy, – dedı otyrysta qalalyq mäslihat töraǧasy Erlan Kanalimov.
Sondyqtan ol jedel tärtıpte avtokölıkterdıŋ tehnikalyq jai-küiın, jürgızuşılerdıŋ jūmysyn baqylau ädıstemesın pysyqtau, kadrlyq ırıkteuge, sapaly arnaiy kölık satyp aluǧa nazar audaru keregın aityp, sol jūmystardy tiıstı tūlǧalar men mekemelerge tapsyrdy. Būdan basqa, ol aldaǧy 3 jylǧa arnalǧan densaulyq saqtau salasyn damytudyŋ keşendı josparynda közdelgen Almaty, Baiqoŋyr jäne Nūra audandarynda jedel järdemnıŋ 3 qosalqy stansiiasyn salu üşın jer uchaskelerın ızdeudı jedeldetu qajettıgın atap öttı.
