Astana qalasy mäslihatynyŋ deputattary elordadaǧy bırqatar medisinalyq nysanǧa baryp, jūmysymen tanysty.
Aldymen Erlan Kanalimov bastaǧan halyq qalaulylary Saryarqa audany Beibarys Sūltan köşesındegı №11 üiıne toqtady. Mūnda investor esebımen audandyq emhana boi köterdı. Jaŋa medisinalyq nysannyŋ jalpy aumaǧy – 1890 şarşy metr. 4 etajdy ǧimarat 46 kabinettı qamtidy. Mūnda zamanaui medisinalyq apparattar qamtamasyz etıledı.
– Bır auysymda 100-150 adamdy qabyldauǧa bolady. Jalpy aiyna 15 myŋ tūrǧynǧa qyzmet körsetu josparda bar. Tamyz aiynda rentgen, mammografiia jäne taǧy basqa apparatty ornatyp, 1-qyrküiekten bastap em aluşylardy qabyldaudy bastaimyz, – dedı emhananyŋ basşysy Tolqyn Satybaldina.
Emdeu qyzmetınıŋ barlyq türın körsetetın emhananyŋ jalpy ştaty – 88. Onda akuşer-ginekolog, hirurg, travmatolog, nevropatolog, kardiolog, stomatolog, urolog, onkolog, proktolog, profpatolog, gastroenterolog, dermatolog, allergolog därıger halyqqa qyzmet etedı. Käsıpker Bauyrjan Baqtybaevtyŋ qarjy saluymen salyndy.
– Jyl ötken saiyn Astana qalasynda halyq sany artyp, äleumettık infraqūrylymdy talapqa sai sanyn arttyru jäne sapasyn jaqsartu mındetı tūr. Keşe Prezident Qasym-Jomart Toqaev elordany damytu mäselelerı jönınde keŋes ötkızıp, aldymyzǧa bırqatar naqty talap qoidy. Sonyŋ bırı – halyqqa sapaly qyzmet körsetudı jetıldıru, onyŋ ışınde medisina nysandarynyŋ sanyn arttyru kerek. Būl ıste ükımetke qarap otyra beruge äste bolmaidy. Käsıpkerlerdı tartu maŋyzdy. Osyndai bastamaǧa Bauyrjan Baqtybaev dem berıp otyr. Būl qūptarlyq jaǧdai. Bızdıŋ taraptan qandai süieldemeleu jūmystary kerek. Bız tekserıp, synau üşın emes, mäseleler bolsa, bırlese şeşu üşın arnaiy keldık, – dedı mäslihat hatşysy Erlan Kanalimov.
Odan keiın deputattar Täuelsızdık köşesı №11/1 üiınde ornalasqan №1 qalalyq balalar auruhanasyna toqtady. Üşınşı nysan – «Nūrly jol» vokzaly maŋynda A83 köşesındegı jaŋa ǧimaratqa bardy. Mūnda «Kazanat siti» JŞS öz qarjysynyŋ esebımen emhana qūrylysyn jürgızıp jatyr eken.
