On aidan berı ındetpen küreste aldyŋǧy şepte jürgen aq halatty abzal jandar elordada dert jūqtyrǧan 16 myŋnan asa adamdy qūtqarǧan. Būl turaly qala basşysy Altai Kölgınov özınıŋ Instagram paraqşasynda baiandady.
«Olardyŋ ärqaisysy adam ömırı üşın küresedı. Pandemiia kezınde densaulyq saqtau jüiesıne tüser salmaq artty. Bızdıŋ därıgerler on aidan berı koronaviruspen küreste kündız-tünı aianbai, aldyŋǧy şepte jūmys ıstep keledı. Būl degenımız – auyr jaǧdaidaǧy köpsaǧattyq auysymdar, jaqyndarynan jyraqta jüru. Ünemı bettūmşa taǧyp jürgendıkten betterınde ızı men daǧy qalady. Osy uaqyt aralyǧynda medisina qyzmetkerlerı ındet jūqtyrǧan 16 myŋnan asa adamdy qūtqardy» dep jazdy Nūr-Sūltan qalasynyŋ äkımı.
Altai Kölgınov pandemiia kezınde medisina qyzmetkerlerı özderın käsıbi jäne adamgerşılık qyrlaryn körsetkenın atap öttı. «Jūmysyn janyn salyp ısteitındıkten är nauqas olardyŋ jüregınde desek bolady. Öitkenı ömırıne qater töngen uaqytta, jasandy jeldetkış apparattarynan alǧaş oianyp, közın aşqan kezde qasynda solar bolady. Olar bırınşı infeksiialyq stasionarlardaǧy jūmysqa kırısıp, şetelden ūşyp kelgen jolauşylardy qabyldap, blok-beketterde kezekşılık atqardy. Medisinalyq joǧary oqu oryndary men kolledjderınıŋ studentterı, volonterler kömekke keldı» dedı qala basşysy.
Äkım Prezidenttıŋ tapsyrmasy boiynşa memleket tarapynan medisinalyq qyzmetkerlerge tiıstı qarjylai qoldau körsetılgenın tılge tiek ettı. «Äkımdık qorynan qosymşa syiaqylar bırneşe märte berıldı. Medisinalyq mekemeler qosymşa jabdyqtarmen, qorǧanys zattarymen, därı-därmekpen qamtamasyz etıldı. Jedel järdem stansasynyŋ jūmysy küşeitıldı. Kölık qozǧalysy qauyrt kezderde ahual ortalyǧy nauqastardy stasionarlarǧa bölu jūmysyn der kezınde ūiymdastyryp otyrdy. Indet küşeigen uaqytta qoŋyraular sany 3-4 esege deiın köbeidı» dep tüsındırdı A.Kölgınov.
Qala basşysynyŋ aituynşa, qazır şūǧyl jaǧdai bolsa, bır uaqytta 18 nysandy jūmyldyra alamyz. Būl – şamamen 7 myŋ oryn. «Ondai auyr jüktemenı bırden artuǧa bolmaitynyn tüsınu kerek. Olardy qai nauqasqa būryn kömektesu keregı jönınde taŋdau jasaityn jaǧdaiǧa jetkızbeu qajet. Sol sanauly minut tek nauqastyŋ densaulyǧyna emes, özınıŋ ömırıne de qauıp töndıruı mümkın. Tek sanitarlyq normany saqtau arqyly ǧana koronavirustyŋ taralmauyna jol bermeuge bolady. Aldaǧy merekelık künder sanitarlyq-epidemiologiialyq talaptardyŋ būzyluy saldarynan densaulyqqa bailanysty demalys künge ainalmasyn» dep tüiındedı äkım.
