Ötken jyly elordadaǧy №74 mektep-gimnaziiaǧa aqiyq aqyn Mūqaǧali Maqataevtyŋ aty berıldı. Bılım beru oşaǧynda endı mūqaǧalitanuǧa jol aşylyp otyr. Keşe atalmyş oqu ornynda «Mūqaǧali älemı» atty şyǧarmaşylyq-tanymdyq ortalyǧynyŋ aşylu saltanaty öttı. Parlament Mäjılısınıŋ deputattary, qalalyq basqarmalardyŋ basşylary, Mūqaǧali aqynnyŋ ūrpaqtary, belgılı ǧalymdar, qalamgerler qauymy qatysqan şarada ortalyq jūmysy tanystyrylyp, «Jaqsy sözım – jany igı halqym üşın» atty oquşylar men mūǧalımderdıŋ konsertı öttı.
Mūqaǧali älemıne jeteleitın ortalyqtyŋ aşyluyna osy oqu ornynyŋ būrynǧy basşysy, taiauda jaŋadan aşylǧan №93 mektep-gimnaziianyŋ direktory bolyp taǧaiyndalǧan Jeŋıskül Nüsıpjan mūryndyq boldy. Muzei ıspettı ortalyq üş bölımnen tūrady. Onda aqynnyŋ ömırı men şyǧarmaşylyǧynan syr şertetın mälımetter qamtylǧan. Sonymen qatar ǧylymi konferensiialar ötkızetın zal jasaqtaldy. Jalpy ortalyq zamanaui talaptarǧa sai keledı. QR-kod arqyly Mūqaǧali öz dauysymen oqyǧan öleŋderdı, aqynnyŋ sözıne jazylǧan änderdı tyŋdap, 3D tehnologiia kömegımen Mūqaǧalidyŋ beinesımen qauyşuǧa bolady.
– Aqiyq aqyn Mūqaǧali Maqataevtyŋ atyn elordadaǧy bır mektepke beru talai jylǧy arman edı. Būl mäsele jylda qalalyq onomastika komissiiasynda qaralyp, şegerıle beretın. Aqyry byltyr oŋ şeşımı şyǧarylyp, aqynnyŋ aty №74 mektep-gimnaziiaǧa būiyrdy. Endı «Mūqaǧali älemı» ortalyǧynyŋ aşyluyna kuä bolyp otyrmyz. Būl az eŋbek emes. Jalpy bügınderı qalamyzda 94 memlekettık mektep bar. Sonyŋ 34-ıne tūlǧalardyŋ aty berıldı. 8 mekteptıŋ atauyn qalalyq onomastika komissiiasy bekıttı. Būl ūsynystar respublikalyq atalmyş komissiianyŋ qarauyna jıberıldı. Taǧy 8 mekteptıŋ atauyna qatysty mäsele jaqynda qalalyq onomastika komissiiasy otyrysynda qaraluy tiıs. Bolaşaqta elordanyŋ barlyq 94 mektebıne ūlylarymyzdyŋ esımderın bersek, jaqsy bolatyn edı, – dedı Nūr-Sūltan qalasy Bılım basqarmasynyŋ bölım meŋgeruşısı Asyl Amangeldıqyzy.
Filologiia ǧylymdarynyŋ doktory, professor Ädıl Ahmetov mektep-gimnaziia atauy Mūqaǧalidyŋ atyna zaty sai bolyp otyrǧanyn atap ötıp, oquşylar men mūǧalımderdıŋ önerıne riza bolǧanyn aitty.
– Mektepte Mūqaǧaliǧa degen süiıspenşılık körınıp tūr. Ruhani jaŋǧyrudy köpten berı aityp kelemız. Ol özınen-özı bola salmaidy. Sony ıske asyratyn Jeŋıskül Temırhanqyzy siiaqty adamdar bolady. Mūqaǧalidyŋ poeziiasymen susyndaǧan adam jaman boluǧa tiıs emes. Aqyndar köp qoi, solardyŋ ışınde Otan turaly eŋ köp jazǧan Mūqaǧali Maqataev. Myna mektepte Mūqaǧalidyŋ ruhy aŋqyp tūr, – dedı ǧalym.
Aqiyq aqynnyŋ ūly Jūldyz Mūqaǧaliūly men kelını Baqytkül Aidarova mektep-gimnaziia ūjymyna rizaşylyǧyn jetkızdı.
– Elorda mektebıne äkemızdıŋ aty berıluımen oty janyp, oşaǧy tırıldı dep aituǧa bolady. Bız soǧan şeksız quanyştymyz. Äkemnıŋ ekı sözınıŋ bırı «qazaǧym» edı. Soŋǧy demı üzılgenşe sony aityp kettı. Jyrlarynan halyq ruh alyp otyr. Ömırde eşnärse kezdeisoq bolmaidy. Äkemızdıŋ aty da osy mektepke kezdeisoq berılmedı. Erteŋ osy bılım oşaǧynan äkem aitatyndai, soqyrdyŋ közın aşatyn, mylqauǧa tıl bıtıretın aqyn şyǧatynyna kämıl senemın, – dedı Jūldyz Maqataev.
Şara barysynda Mūqaǧali aqynnyŋ ūrpaqtaryna, oqu orny qonaqtaryna qūrmet pen syi-syiapat körsetıldı. İyqtaryna qazaqtyŋ dästürımen şapan jabyldy. Ūrpaqtary öz tarapynan Mūqaǧali mūrasyn ünemı nasihattap, mektepte ortalyqtyŋ aşyluyna atsalysqan adamdarǧa «Mūqaǧali Maqataev» tösbelgısı men estelık syilyqtardy tapsyrdy.
