Qūrmettı qazaqstandyqtar, otandastar!
Ardaqty aǧaiyn!
Qadırlı ärıptesterım,«Nūr Otan» partiiasynyŋ
müşelerı!
Memleketımızdıŋ asa maŋyzdy tarihi sätterınde halqyma ündeu joldaitynymdy bılesızder.
Bügın de barşaŋyzǧa ündeu jariialaǧaly otyrmyn.
Bıraq, bügıngı ündeudıŋ maŋyzy zor.
Men Qazaqstan Respublikasynyŋ Prezidentı retındegı ökılettıgımdı toqtatu jönınde şeşım qabyldadym. Būl oŋai şeşım emes.
Biyl elımızdıŋ eŋ joǧary lauazymyndaǧy qyzmetımdı atqaryp kele jatqanyma 30 jyl tolady.
Halqym maǧan täuelsız Qazaqstannyŋ Tūŋǧyş Prezidentı bolu mümkındıgın berdı.
Keŋes imperiiasy qūlaǧan sätte bızdıŋ saiasatymyz ben ekonomikamyz qūldyrap qaldy. El ışınde qobalju men tüsınıksız jaǧdai oryn aldy.
Işkı jalpy önım ekı ese qysqardy, azyq-tülık pen halyq tūtynatyn tauarlardyŋ tapşylyǧy aiqyn sezıldı. Bır mezette ırı zauyttardyŋ bärı toqtap qaldy. Dünie töŋkerılıp ketkendei körındı.
Būl synaq bolatyn. Bız odan sürınbei ötıp, damudyŋ qazaqstandyq jolyn saluǧa belsene kırısıp kettık.
Bızdıŋ üştūǧyrly mındetımız – naryqtyq ekonomika qūru, totalitarlyq ideologiialyq jüienı būzu jäne qoǧamnyŋ barlyq instituttaryn jaŋǧyrtu boldy. Bız mūny zamanaui demokratiialyq memleket – Qazaqstan Respublikasyn qūru üşın jasadyq.
Bız älsız ekonomikamen jäne jaǧdaiy joq azamattarmen demokratiialyq instituttar qalyptastyru mümkın bolmaitynyn tüsınıp, ekonomikany damytu jäne azamattardyŋ äl-auqatyn arttyru ısıne basa män berdık. Sonyŋ nätijesınde ekonomikamyzdy 15 ese, al halyqtyŋ tabysyn 9 ese (dollarmen eseptegende) arttyryp, kedeişılık deŋgeiın 10 esege juyq qysqarta aldyq.
Bız 2007-2012 jyldardaǧy auqymdy älemdık qarjy daǧdarysyn qosa alǧanda, kezdesken qiyndyqtardyŋ bärın eşkımnıŋ kömegınsız jäne tabysty eŋsere bıldık.
Qazaqstan agrarly ekonomikadan önerkäsıptık-servistık ekonomikaǧa öttı. Eldı industriialandyru jäne urbanizasiialau prosesı jürıp jatyr. Şikızat sektoryna älemnıŋ ırı investorlary keldı.
Sonyŋ arqasynda mūnai-gaz sektoryndaǧy kürdelı jobalardy jüzege asyra aldyq.
Şikızat resurstary esebınen qazaqstandyqtardyŋ bolaşaq ūrpaǧy üşın qor qūryldy. Qazaqstan jahandyq ekonomikanyŋ ajyramas bölıgıne ainaldy. İnvestisiia tartyp, älemnıŋ barlyq derlık elderımen sauda-sattyq jürgızıp kelemız.
Elımızdıŋ jaŋa infraqūrylymdyq dıŋgegı boi köterdı. Eldıŋ barlyq öŋırın avtomobil joldary men temır jol jelısı bailanystyrady.
Al, aviasiia marşruttary älemnıŋ tükpır-tükpırıne baruǧa mümkındık berıp otyr.
Qazaqstan tek aumaǧy jaǧynan ǧana ırı memleketke ainalǧan joq. Bügınde azamattarymyzdyŋ sany 18 millionnan asty. 20 millionǧa jetetın kün de alys emes.
Bız älemdegı ozyq damyǧan 50 eldıŋ qataryna qosyldyq. 2050 jylǧa deiıngı damu baǧdarlamasy äzırlendı. Maqsatymyz – ozyq damyǧan 30 eldıŋ qataryna enu.
Bız qiraǧan KSRO-nyŋ ornynda zamanaui naryqtyq ekonomikasy bar, tabysty Qazaqstan memleketın qūryp, köpūltty jäne köpkonfessiialy elımızde beibıtşılık pen tūraqtylyqty qalyptastyrdyq. Köpǧasyrlyq tarihymyzda alǧaş ret Qazaqstan Respublikasynyŋ halyqaralyq-qūqyqtyq tūrǧydan moiyndaluyn qamtamasyz ettık. Memleket retınde bederlenbegen Qazaqstandy älem kartasyna engızdık. Bızdıŋ öz Tuymyz, Änūranymyz, Eltaŋbamyz bar.
Bız 90-jyldardaǧy eŋ kürdelı kezeŋde «Bolaşaq» baǧdarlamasy boiynşa mamandar daiarlau ısın qolǧa aldyq. Jastardyŋ laiyqty bılım alyp, älemdık täjıribenı zertteuıne mümkındık tuǧyzdyq, sondai-aq olardyŋ elımızge öz paidasyn tigızuıne jol aştyq.
Jahandy daǧdarys jailaǧanyna qaramastan, bız Astanada älemdık deŋgeidegı universitet aşyp, ziiatkerlık mektepter saldyq. Egemendıkke ie bolǧan jyldarda düniege kelgen jastarymyz memleket qamqorlyǧyn baǧalai bıledı dep senemın. Olar – täuelsız Qazaqstannyŋ tülep ūşqan jas qyrandary.
Jastardyŋ elımızdı qorǧap, ony nyǧaita tüsetınıne, özderınıŋ bar bılımı men küş-quatyn Otanymyzdy örkendetuge jūmsaitynyna senımdımın.
Elımızdıŋ tarihynda alǧaş ret öz elordamyzdy tūrǧyzdyq. Astana – barlyq jetıstıkterımız ben jeŋısterımızdıŋ jarqyn körınısı.
Osynyŋ bärın sızdermen bırge jasadyq, qūrmettı qazaqstandyqtar.
Osy jyldarda ötken barlyq sailaularda sızder maǧan senım artyp, bastamalaryma qoldau bıldırdıŋızder. Maǧan ūly halqyma, tuǧan jerıme qyzmet etu baqyty būiyrdy. Barşaŋyzǧa – halqyma zor rizaşylyǧymdy bıldırıp, basymdy iemın.
Osyndai qoldaudyŋ arqasynda sızderdıŋ senımderıŋızdı aqtau üşın men bar küş-jıgerımdı, densaulyǧymdy, uaqytymdy aiamai adal qyzmet ettım.
Özderıŋız bılesızder, zaŋdarymyzǧa säikes men Tūŋǧyş Prezident – Elbasy (Ūlt köşbasşysy) märtebesıne ie boldym. Eleulı ökılettıgı bar Qauıpsızdık Keŋesınıŋ Töraǧasy retınde qyzmet ete beremın. «Nūr Otan» partiiasynyŋ Töraǧasy, Konstitusiialyq Keŋestıŋ müşesımın.
Iаǧni özderıŋızben bırge bolamyn. Elımızdıŋ, halqymyzdyŋ qamy – menıŋ müddem bolyp qala beredı.
Täuelsız Qazaqstan memleketınıŋ negızın qalauşy retındegı aldaǧy mındetım – basşylardyŋ jaŋa buynynyŋ bilıkke keluın qamtamasyz etu. Olar elımızdı jaŋǧyrtu prosesterın jalǧastyratyn bolady.
Qazaqstandaǧy bilık sabaqtastyǧy konstitusiialyq tūrǧydan rettelgen. Prezidenttıŋ ökılettıgı merzımınen būryn toqtatylǧan jaǧdaida onyŋ ökılettıgı qalǧan merzımı aiaqtalǧanǧa deiın Senat töraǧasyna berıledı. Sodan keiın jaŋa Prezident sailauy bolady.
Qazır Parlament Senatynyŋ töraǧasy Qasym-Jomart Kemelūly Toqaev. Ony sızder jaqsy bılesızder. Ol Mäskeu memlekettık halyqaralyq qatynastar institutynyŋ tülegı, ǧylym doktory. Aǧylşyn jäne qytai tılderın erkın meŋgergen. Basşylyq lauazymdarda qyzmet etıp, mol täjıribe jinady. Elımızdıŋ syrtqy saiasatynyŋ qalyptasu jyldarynda Syrtqy ıster ministrı, Premer-ministrdıŋ orynbasary jäne Premer-ministr, Senat Töraǧasy boldy. Elımızdı, onyŋ ekonomikasy men saiasatyn jetık bıledı.
Bırıkken Ūlttar Ūiymy Bas hatşysynyŋ orynbasary bolyp jūmys ıstedı. Būl – onyŋ diplomat retınde sıŋırgen eŋbegınıŋ jäne Qazaqstanǧa degen zor senımnıŋ jemısı.
Ol Qazaqstan täuelsızdıgınıŋ alǧaşqy künderınen bastap menımen bırge jūmys ıstep keledı. Men ony jaqsy bılemın. Ol – adal ärı jauapkerşılıgı joǧary azamat. Elımızdıŋ ışkı jäne syrtqy saiasatyn jan-jaqty sezınedı. Ol barlyq baǧdarlamalardy äzırleuge jäne qabyldauǧa atsalysty.
Qasym-Jomart Kemelūly Qazaqstandy basqaruǧa naǧyz laiyqty azamat dep senemın.
Qūrmettı otandastar!
Bız älemnıŋ bır orynda tūrmai, ünemı özgerıp jatqanyn körıp otyrmyz.
Jaŋa mümkındıktermen qatar jahandyq jaŋa tehnologiialyq jäne demografiialyq syn-qaterler tuyndap, älemdık tärtıp tūraqsyzdana tüsude.
Ärbır ūrpaqtyŋ atqaratyn öz mındetterı bar. Men jäne menıŋ zamandastarym elımız üşın qoldan kelgennıŋ bärın jasadyq.
Onyŋ nätijelerı özderıŋızge belgılı. Älem özgerıp, jaŋa buyn keledı. Būl – tabiǧi prosess. Olar öz zamanynyŋ problemalaryn şeşetın bolady. Sondai-aq elımızdı odan ärı örkendetu üşın bar küş-jıgerın jūmyldyruǧa tiıs.
Älemmen bırge bız de özgeruge tiıspız. Jas qazaqstandyqtarǧa aitarym: täuelsız Qazaqstanymyzdy, ortaq Otanymyzdy, Mäŋgılık elımızdı saqtai bılıŋızder. Būl – bızdıŋ halqymyz, bızdıŋ ūly babalarymyzdyŋ jerı. Otanymyz da, jerımız de bır.
Halqymyzdyŋ dostyǧy men bırlıgın, bır-bırımızge degen senımdı saqtap, elımızdegı ärbır azamattyŋ töl mädenietı men dästürın qūrmettei bılıŋızder.
Sonda ǧana bız myqty bolyp, syn-qaterdıŋ bärıne tötep beremız.
Sonda ǧana bız örkendeitın bolamyz.
Qūrmettı qazaqstandyqtar!
Menıŋ otandastarym!
Men bügıngı sözımdı sızderdıŋ ärqaisyŋyzǧa arnaimyn.
Elımızdıŋ aldynda auqymdy mındetter tūr. Jetıstıkke jetetınımızge senemın.
Men Qazaqstannyŋ bolaşaǧyn qalai elestetemın?
Bolaşaq qazaqstandyqtar bılımdı, üş tılde söileitın, erkın adamdardyŋ qoǧamyn qalyptastyratynyna nyq senımdımın.
Olar – älemnıŋ azamattary. Olar dünienı şarlaidy. Olar jaŋa bılım aluǧa qūştar. Olar – eŋbeksüigış. Olar – öz elınıŋ patriottary.
Qazaqstan 2050 jyly jalpyǧa ortaq eŋbek qoǧamyna ainalady dep senemın.
Būl – bärı de adam igılıgı üşın jasalatyn, ekonomikasy myqty memleket. Onyŋ bılım salasy da, densaulyq saqtau salasy da üzdık bolady. Onda beibıtşılık pen tynyştyq saltanat qūrady. Azamattary erkın ärı teŋ qūqyly, al bilıgı ädılettı bolmaq. Mūndai elde zaŋ üstemdık etedı.
Men dūrys jolmen kele jatqanymyzǧa senımdımın. Bızdı tura joldan eşteŋe de taidyra almaidy.
Eger bız küştı bolsaq, bärı de bızben sanasady.
Eger bız äldeqandai küşke nemese basqa bıreuge ümıt artsaq, qol jetkızgen jetıstıktıŋ bärınen airylamyz.
