Qūrmettı qazaqstandyqtar!
Men bügın elımız üşın maŋyzdy şeşım qabyldaǧaly otyrmyn.
Ötken jyldardaǧy äleumettık-ekonomikalyq ahual tūraqty boldy. Būl – ärine, jaqsy kezeŋ. Bıraq, būl qazırgı uaqyt talaby üşın jetkılıksız.
Men ūsynǧan Üşınşı jaŋǧyru jäne «100 naqty qadam – Ūlt jospary» qūrylymdyq reformalardy jedel jüzege asyruǧa baǧyttaldy.
Bes institusionaldyq reformanyŋ tolyq ıske asyryluy şaǧyn jäne orta biznestıŋ ülesın tübegeilı arttyruǧa jäne memlekettıŋ ekonomikaǧa aralasu ülesın tömendetuge, bankterdı «tazartuǧa», sottarǧa jäne qūqyq qorǧau jüiesıne degen senımdı arttyruǧa tiıs.
Qabyldanǧan zaŋdarǧa, Ükımet şeşımderıne qaramastan, ekonomikanyŋ köptegen baǧyttary boiynşa oŋ özgerısterge qol jetkızılmedı. Işkı jalpy önım negızınen şikızat resurstary esebınen qamtamasyz etıldı. Bıraq, Ükımet pen Ūlttyq bank el ekonomikasyn sapaly damytuǧa serpın beretın naqty qūraldardy tolyqqandy jasap şyǧara almady.
Memlekettık baǧdarlamalardy jüzege asyru barysyna jasalǧan taldau qorytyndysy olardyŋ oryndalyp jatqanyn körsetkenımen, köptegen maŋyzdy baǧyttar boiynşa naqty nätijelerdıŋ joq ekenın aŋǧartty.
Önımdı jūmys oryndary jetkılıktı türde aşylmai otyr. Būl, äsırese, auyldyq jerlerge qatysty. Şaǧyn jäne orta biznes ösımnıŋ qozǧauşy küşıne jäne ony damytu ısı äkımder men ministrlerdıŋ negızgı mındetıne ainalmady. Men tūrǧyndardyŋ tabysy men tūrmys sapasy ärbır Ükımet müşesı men ärbır äkımnıŋ jūmysyndaǧy negızgı basymdyq bolu kerek dep bırneşe ret aittym.
Ekı jyl būryn bız konstitusiialyq reforma jürgızdık. Osyǧan orai Ükımet äkımdermen bırge äleumettık-ekonomikalyq mäselelerdı şeşıp, oǧan jauap beru üşın barlyq tiıstı ökılettık pen derbestıkke ie boldy. İndustrialdy, äleumettık, infraqūrylymdyq damu, densaulyq saqtau jäne bılım beru salalaryn damytuǧa qatysty barlyq qajettı memlekettık baǧdarlamalar qabyldandy.
Olardy jüzege asyru üşın qajettı qarjy bölındı.
Degenmen, jüielı jūmys jürgızılmedı. Tūrǧyndardyŋ naqty tabysy öspedı. Otbasylardyŋ biudjetınde azyq-tülıkke degen şyǧyn kölemı arta tüstı. Atqaruşy organdardyŋ salǧyrttyǧynan äleumettık tūrǧydan az qamtylǧan tūrǧyndardyŋ bır bölıgı atauly äleumettık kömekpen qamtylmaǧan. Onyŋ üstıne Ükımet müşelerı, ministrler, äkımder halyqpen jūmys ıstei almady, sondai-aq jūrtşylyqtyŋ problemalaryna qūlaq asyp, atqarylyp jatqan ıster men saiasatty tüsındıru jūmystaryn jürgızuge şamasy kelmedı.
Būl rette, men el Prezidentı ärı Konstitusiianyŋ kepılı retınde halyqtyŋ müddesın eskere otyryp, mynadai şeşım qabyldadym.
Ükımet otstavkaǧa ketuge tiıs dep sanaimyn.
Ükımettıŋ jaŋa basşylyǧy ömır süru deŋgeiın arttyruǧa, ekonomikany yntalandyruǧa, strategiialyq mındetterdı jüzege asyruǧa baǧyttalǧan naqty şaralar äzırleuge tiıs.
Men «Nūr Otan» partiiasynyŋ jaqynda ötetın sezınde äleumettık qoldaudy küşeituge jäne azamattardyŋ tūrmys sapasyn arttyruǧa arnalǧan bırqatar şaralar ūsynamyn. Osy maqsatpen biudjetten jäne Ūlttyq qordan qomaqty qarjy bölınetın bolady.
Būl qarajat mynadai mındetterdı şeşuge baǧyttalady:
– az qamtylǧan azamattarǧa äleumettık qoldau körsetu ısın küşeitu.
– halyqtyŋ äleumettık tūrǧydan älsız toptarynyŋ baspana jaǧdaiyn jaqsartu mümkındıkterın arttyru.
– öŋırlerdı damytu saiasatyn tübegeilı özgertu.
Ükımet pen barlyq deŋgeidegı äkımderdıŋ jūmysy osy mındetterdı jüzege asyruǧa baǧyttaluy tiıs.
Ükımet pen öŋırlerdıŋ ielıgındegı qarajat közdelgen maqsatqa sai jūmsalmai otyr. Mūnyŋ bärıne baqylau ornatylady. Osy taqyryptar jönınde «Nūr Otan» partiiasynyŋ sezınde tolyǧyraq aitylatyn bolady.
