– Memleket basşysy Nūrsūltan Nazarbaevtyŋ töraǧalyǧymen ötken «Nūr Otan» partiiasynyŋ XVIII sezınde käsıpkerlık mäselesı qozǧalyp, auyl şaruaşylyǧyn jandandyru jaily naqtyly mındetter aityldy. Elbasy osy baǧyttaǧy «Auyl – el besıgı» jobasy aiasynda 2019-2021 jyldary 90 mlrd teŋge bölınetının mälım ettı.
Elımız egemendıgın alǧan tūstan berı käsıppen ainalysyp kelemın. On jylǧa juyq uaqyt auyl şaruaşylyǧyna qajet qūraldardy, tehnikalardy, sondai-aq janar-jaǧarmai jetkızıp tūrdym. Eger bügıngı uaqyt pen 90-jyldarǧy kezeŋdı salystyrar bolsaq, qazır biznes bastaimyn degender üşın qolaily jaǧdai köp jasalyp jatyr. Egemendıktıŋ eleŋ-alaŋ jyldary nesienıŋ paiyzy öte joǧary bolatyn. Al qazırgı uaqytta «Damu» käsıpkerlıktı damytu qory, odan qala berdı türlı mikrokredittık ūiymdar bar.
Auyl şaruaşylyǧy qazaqtyŋ qanyna sıŋgen käsıp qoi. Mal şaruaşylyǧy, egınşılık, terı öŋdeu – mūnyŋ bärı bızde būrynnan bar bolatyn. Bıle bılsek, būl – özı beinetı köp sala. Alaida qai elde bolmasyn auyl şaruaşylyǧy asyrauşy buyn ekenı sözsız. Osy oraida Memleket basşymyz auyl şaruaşylyǧyn köterudı ünemı basty nazarda ūstap keledı. Menıŋşe, eŋ aldymen, auylǧa baryp jūmys ıstep, sol jaqtyŋ tūrmysyn köteremın degen adam üşın jaǧdaidyŋ bärı jan-jaqty jasaluy kerek. Bırınşı kezekte bank jüiesıne reforma jasap, öte tömen paiyzben, tıptı paiyzsyz kredit beru kerek dep esepteimın.
Qazaqstan damuşy elderdıŋ bırı ǧoi. Osyǧan deiın älemdegı bırqatar eldıŋ täjıribesın süzıp şyqtym. Mysalǧa, ırgemızde tūrǧan Qytaidyŋ özınde jas käsıpkerlerge öte tömen paiyzdyq kredit berıledı. Al AQŞ, Japoniia memleketterınde paiyzy da joq. Odan qala berdı islam bankterınde tıptı käsıptı bırge jürgızıp, jön körsetıp otyrady, onda da paiyzy joq. Al bızde, şynyn aitu kerek, būl mäsele aqsap tūr. Keibır bankterde 7-8 paiyzdy qūrasa, eŋ tömengısınıŋ özı – 4 paiyz. Būl – käsıbın endı bastaǧandar üşın auyrlau. Sondyqtan äsırese ekınşı deŋgeilı bankterge reforma jürgızse, ekonomikamyz örlep keter edı degen pıkırdemın.
Aitpaqşy, taǧy bır qosarym käsıp bastaǧysy keletınderge eŋ aldymen bılım kerek ekenın aitqym keledı. Būl rette de Elbasy ünemı aityp jüredı. Şynymen de, zaman aǧymynan qaluǧa bolmaidy. Bügıngıdei älem özgerıp jatqan tūsta qai salada bolmasyn innovasiialyq közqaras boluy kerek. Ol üşın de, äsırese, jastar üşın jan-jaqty jaǧdai jasalyp jatyr ǧoi. Jyl saiyn qanşama jastarymyz şeteldıŋ ozyq universitetterıne oquǧa attanyp jatyr. Osynyŋ bärınıŋ qaitarymy boluy kerek dep oilaimyn. Ol üşın Elbasymyz aitqandai, oqu bıtırgen jastardy jūmyspen qamtudy aldyn ala oilastyru qajet. Sonda olardyŋ eŋbekke degen qūlşynysy, otandyq patriotizmı arta tüsedı. Demek, qandai da bır ıstı bılımsız bastau öte qiyn. Sonymen qatar jastar qyzyqqan käsıptı tereŋırek oqyp, qyr-syryn bılıp alǧany, al eŋ maŋyzdysy, sol jūmysyn süiıp ısteuı qajet.
Tüiındep aitqanda, memleket tarapynan jaǧdai jasalyp jatyr. Olai bolsa ülken de, kışı de eldık müddenı alǧa qoiyp eŋbek etuı kerek dep oilaimyn. Al eŋbek aqtalmai qoimaidy.
