Täuelsızdık künı merekesı qarsaŋynda Qazaqstan Respublikasy Prezidentınıŋ Jarlyǧymen memleketımızdıŋ äleumettık- ekonomikalyq jäne mädeni damuyna, halyqtar arasyndaǧy dostyq pen yntymaqtastyqty nyǧaituǧa qosqan eleulı ülesı, belsendı qoǧamdyq qyzmetı üşın el azamattarynyŋ ülken bır toby memlekettık nagradalarmen marapattaldy.
Olardyŋ qatarynda öndırıs, biznes, bılım beru, densaulyq saqtau salalarynyŋ körnektı ökılderı, äskeri qyzmetşıler, qūqyq qorǧau organdarynyŋ qyzmetkerlerı, sportşylar, soǧys jäne eŋbek ardagerlerı, mädeniet jäne ǧylym qairatkerlerı bar.
Qasym-Jomart Toqaev saltanatty räsımge qatysuşylardy Täuelsızdık künımen qūttyqtap, egemendık elımızdıŋ baǧa jetpes bailyǧy ekenın aitty. Qazaqstan Prezidentı saltanatty räsımde söilegen sözınde memlekettık nagrada alǧan azamattardyŋ sıŋırgen eŋbegın joǧary baǧalady.
– Bairaqty babalarymyz bızge ūlan-baitaq jerdı mūra etıp qaldyrdy. Olardyŋ amanatyna adal bolu – barşamyzdyŋ kielı paryzymyz. Azattyq üşın alysyp, el üşın janyn pida etken batyrlardyŋ erlıgı eşqaşan ūmytylmaidy, – dedı Qazaqstan Prezidentı.
Qasym-Jomart Kemelūly «Qazaqstannyŋ Eŋbek Erı» ataǧy ūlttyq mädeniettı damytuǧa qosqan airyqşa ülesı, än önerın nasihattaudaǧy erekşe eŋbegı üşın Roza Rymbaevaǧa tabys ettı. Ūlyq marapat Öndırıstık qyzmettegı erekşe eŋbegı üşın «Qazaqmys korporasiiasy» JŞS filialy – «Jezqazǧantüstımet» ÖB ken öndırıstık keşenınıŋ ūŋǧylauşysy Tūrsynbek Makişevke de berıldı.
Qazaqstannyŋ tanymal jazuşy-ǧalymdarynyŋ da el täuelsızdıgıne qosqan ülesı marapattaldy. Olardyŋ qatarynda belgılı sazger-jazuşy İ.Jaqanov, T.Äbdıkūly, S.Abdrahmanov, ǧalym jäne qoǧam qairatkerı Ä.Ahmetov, elordadaǧy Säken Seifullinnıŋ mūrajaiynyŋ direktory N.Aitūly, aqyn M.Aithoja, taǧy basqa azamattar bar. Joǧary marapatqa ǧalymdardan abaitanuşy M.Myrzahmetūly, tarihşy M.Qoigeldiev, Q.Salǧaraūly, A.Jūmadıldaev ie boldy.
«Qazaqstannyŋ eŋbek sıŋırgen qairatkerı» qūrmettı ataǧy ǧylym jäne mädeniet salasynyŋ 36 körnektı ökılıne berıldı, olardyŋ ışınde belgılı talantty änşı Dimaş Qūdaibergen bar.
Önerkäsıp, kölık, qūrylys, auyl şaruaşylyǧy jäne basqa materialdyq öndırıs salalarynyŋ 72 jūmysşysy men eŋbekkerı III därejelı «Eŋbek Daŋqy» ordenınıŋ iegerlerı atandy.
Äskeri jäne qyzmettık boryşyn ülgılı atqarǧany, zaŋdylyq pen qūqyqtyq tärtıptı qamtamasyz etude körsetken erlıgı men janqiiarlyǧy, eldıŋ ūlttyq qauıpsızdıgı men qorǧanys qabıletın nyǧaituǧa qosqan ülesı üşın äskeri qyzmetşıler men qūqyq qorǧau organdary ökılderınıŋ bır toby I jäne II därejelı «Daŋq», sondai-aq I, II, III därejelı «Aibyn» ordenderımen, «Erlıgı üşın» jäne «Jauyngerlık erlıgı üşın» medaldarymen marapattaldy.
