Ūlystyŋ ūly künı qarsaŋynda Nauryz meiramyna orailastyra ūiymdastyrylǧan järmeŋkege jolymyz tüstı.
Kongress-holl saraiynyŋ aldy – qaraqūrym halyq. Bolmaşy närsege elp ete qoimaityn qala tūrǧyndaryn qyzyqtyrǧanyna qaraǧanda, ışındegı şaranyŋ maŋyzy äjeptäuır siiaqty. Syǧylysqan adamdardyŋ legımen bırge bız de ǧimaratqa endık. Ädepkıde kısılerdıŋ sonşalyqty köptıgıne kädımgıdei aŋtarylyp qalǧanymyz ras. Mūnda bazardaǧydai sauda qatarlary qoiylyp, maŋdaişalaryna sonda satylatyn tauardyŋ aty jazylypty. Bızdıŋ közımızge «Tūz lampalary» degen jazu taŋsyq körındı.
– Saudaŋyz jürsın! – dedık satuşy jıgıttıŋ janyna jaqyndap. – Būl ne boldy sonda?
– Kelıŋız, qaryndas! Qazır sızge tüsındıreiın, – dep bäiek bolyp jatyr älgı azamat. – Tūz lampalarynyŋ qasietı orasan zor. Äsırese, türlı tehnikany paidalanatyn qazırgıdei zamanda däl osy şamdar kerek-aq. Kompiuter, teledidar, telefon tärızdı qūraldardyŋ bärı qorşaǧan ortaǧa ziiandy iondardy taratady. Al tūzdy lampalar sol qauıptı tolqynnyŋ betın qaitaryp, jaily da paidaly atmosfera qalyptastyrady. Tūzdar Gimalai tauynyŋ üŋgırlerınen äkelıngen.
– Baǧasy qanşa?
– Bes myŋnan bastalady.
Qymbatsynyp tūrǧanbyz. Söitsek, būl baǧa bylaiǧy naryqtaǧydan äldeqaida tömen eken. Ony bızge Säbila esımdı kelınşek aitty.
– Barlyq qatardy aralap şyqtym. Ap-arzan. Özıme mynadai monşaq pen syrǧa satyp aldym, – dep qolyndaǧy zattaryn maqtana körsettı.
Keiıpkerımız nūsqaǧan jaqqa qarai jyljyp, qolöner būiymdaryn satyp otyrǧan äjeige bardyq. Äşekeilerı bırınen bırı ötedı. Asyl tastarmen kömkerılgen bılezık, öŋırjiek, syrǧadan bastap qyz ataulyǧa kerektınıŋ tügelı tolyp tūr. Qūny da qoljetımdı.
– Jeke dükenımız bar. Myna närselerdı zerger ūlym daiyndaidy. Bırneşe jyldan berı osy ıs otbasylyq käsıbımızge ainaldy. Nauryz merekesınde astanalyqtarǧa syi retınde öz önımderımızdı arzandatylǧan baǧamen ūsynudamyz, – dep jymidy käsıpker qariia.
Ūlttyq naqyştaǧy dünielerge qyzyǧuşylyq tanytyp jatqandardyŋ bırı – şeteldıkter. Europalyq ülgıde kiıngen erlı-zaiypty bızdıŋ közımızşe qoşqarmüiız oiuy beinelengen şolpyny satyp aldy. Küieuı ony äielınıŋ şaşyna ölşep älek.
– Mūny ūzyn şaşqa taqsa ädemı jarasady, – dedık aǧylşynşalap.
– O, ärine! – dep, jūbaiy basyn izedı.
Onysyn bız «Şaşymdy ösıremın» degen uädesı bolar dep qabyldadyq. Ösıru-ösırmeu özınıŋ şaruasy ǧoi, äiteuır, qazaqtyŋ önerıne degen ystyq yqylastaryna jüregımız jylydy.
Järmeŋke nauryzdyŋ 27-sıne deiın jalǧasady. Baruǧa niettengen elordalyqtar bolsa, marhabat!
Botagöz MARATQYZY
