Mūrat ÄUEZ, memleket jäne qoǧam qairatkerı, mädeniettanuşy: DIN SAULYǦY, TIL TAZALYǦY, DIL BERIKTIGI KEREK

– Mūrat aǧa, biylǧy jyl atauly oqiǧalarǧa toly boldy. Alaştyŋ 100 jyl­dyǧyna bailanysty ıs-şaralar arasynda zaŋǧar jazuşy­myz Mūhtar Äuezovtıŋ 120 jyldyǧy da eskerılıp, alaştyŋ ardaqty ūldaryna qūrmetımız arta tüstı. Osy oraida Sızdıŋ oiyŋyzdy bılgımız kelıp edı.

– Alaş tarihyna oralyp, ony zerdeleude bırqatar şaralar ötıp jatyr. Ortasynda özımız de jürmız. Degenmen, atalyp ötpei qalǧan datalarǧa toqtalǧym kelıp otyr. Täuelsız elımızde mındettı türde atalyp ötetın asa maŋyzdy oqiǧalardyŋ bırı 1916 jylǧy Ūlt-azattyq köterılısı edı. Eleusız öttı. 16-jylǧy köterılıs qazaqtyŋ Torǧai, Jetısu, Qarqara öŋırın şarpydy. Osy oqiǧanyŋ bır jelısı Mūhtar Äuezovtıŋ «Qily zamanynda» jazylǧan. Būl tek qazaqtardyŋ emes, türkı tektes halyqtardyŋ öz keŋıstıgınde ūlt müddesı üşın eŋ soŋǧy ret qolyna qaru ūstap bırıgıp, patşa otarşylyǧyna qarsy şyqqan küresı edı.
Būl dataǧa qyrǧyzdar jaqsy daiyndyqpen kelıp, atap öte aldy. Olar qazaq aǧaiyndaryn da qatarynda körgısı kelıp şaqyryp edı, bızdıŋ memleket tarapynan salqyndau qabyldandy. Eldıŋ oŋtüstıgınde oryn alǧan Qoqan handyǧyna qarsy köterılıstıŋ tarihy da osy künge deiın atalmai keledı. Būl dümpulerdıŋ ışkı sebepterı är jerde ärtürlı boluy mümkın. Alaida soǧan qaramastan ūlttyŋ kösemderı alǧa şyǧyp, otarşylyqqa qarsy bır müddege ūmtylyp yntymaqtasuymen qūndy. Bız būǧan män bermedık. Eger şynymen bolaşaǧymyzdy oilaǧymyz kelse, osyndai tarihi qadamdarymyzdy eş­uaqytta esten şyǧarmaǧan jön.
751 jylǧy Talas şaiqasy da tek qazaq emes, türkı tarihynan da kömeskılenıp bara jatyr. Qazırgı Taraz jerınde türkıtektes babalarymyz qytaidyŋ Taŋ dinastiiasyna arabtarmen bırıgıp, toitarys bergen. Mūny qalai eleusız qaldyruǧa bolady?! Orta Aziia deŋgeiınde emes, jalpy Euraziialyq keŋıstıktegı ahualǧa müldem basqaşa sipat berıp, tarih döŋgelegın basqa arnaǧa būrǧan şaiqas memlekettıgımızdıŋ ırgetasyndai qabyldanuy tiıs edı. Sebebı ekpındep kelgen qytaidy keiın şegındırıp, islam dınınıŋ quaty bolar, osy küngı Orta Aziiany meken etken halyqtardyŋ memleket bolyp qalyptasuyna sebep boldy.
– Qazırgı «Ruhani jaŋǧyru» baǧdarlamasy aiasynda ruhaniiatymyzda bır serpılıstıŋ belgısı baiqalǧandai körı­nedı. Aldaǧy uaqytta būl olqylyqtardyŋ orny tolar…
– Osynyŋ aldynda da 2004 jyly «Mädeni mūra» atty memlekettık baǧdarlama da jaqsy bastalǧan. Myŋdaǧan tarihi qūjattar men öte sirek kezdesetın kıtaptar men qoljazbalar elge oraldy. Jüzdegen qasiettı keseneler memlekettıŋ qorǧauyna alynyp, olarǧa keşendı jöndeuler jürgızıldı. Arheo­logiialyq qazba jūmysyna jan bıttı. Mädeni mūranyŋ tūjyrymdamasyn Karl Baipaqov, Meruert Äbuseiıtova siiaqty ǧalymdar ūsynysymen men jazyp şyqqan edım. Sol kezdegı qoǧamdyq komissiiany basqarǧan İ.Tasmaǧambetov, «bır söz qosylyp bır sözı özgermesın» dep būryştama soǧyp, öndırıske ketken edı. Ras, egemen elımızdıŋ ruhani qūndylyqtaryn tügendeudegı alǧaşqy talabymyz jemıstı boldy.
Bıraq mūra bar jerde mūralanu degen ūǧym bar. Mūra­ny ızdedık, taptyq. Al mūralanu – öz sanaŋdy küşeitu, zerdeleu. Mūramyz arqyly jaŋa sapaǧa ötu. Ökınışke qarai, ekınşı qa­damǧa barmadyq. Keide ha­lyq ruhaniiatyna kelgen­de osynyŋ basynda bır qyrsyq otyrǧandai sezınemın. Mūra­myzdyŋ jemısın halyq­tyŋ sanasyna jetkızıp, kökı­rek közın aşuǧa kelgende orta joldan şort kesıp, aqşa joq dep qarap otyrady. Būl baǧdarlama da orta joldan qaiyrylmasa eken dep tıleimın.
– Osydan bes jyl būryn bergen sūhbatyŋyzda «Men üşın kirillisa otarşyl imperiia qarularynyŋ bırı ǧana» dep aitypsyz. Bügınde latyn qarpıne ötu turaly nauqan bastalǧanda köŋılıŋız jailandy ma?
– Taǧy da bıtpes jaranyŋ auzyn tyrnadyŋ. Būl da qate! Ras, kirillisadan bas tartuymyz kerek boldy. Öitkenı otyzynşy jyldary Kremldıŋ türkı tektes halyqtardyŋ arasyna jık salyp, bırın-bırı tüsınbeitındei etıp alystatu üşın kirillisany beiımdedı. Auyzekı tıldesseŋız özbek, qyrǧyz, qaraqalpaqty, no­ǧai-tatarlardy tüsıne alamyz. Alaida orystyŋ qarpıne auysqanda türkılerge onsyz da tüsınıktı ortaq dybystardyŋ öŋı ainalyp şyǧa keldı. Jazba düniesın oqyp bılu mümkın emes. Osylaişa kirillisa arqyly aramyzdy aşty, ajyratyp jıberdı. Olardyŋ ortaq ruhani mūrasyn oqyp-bıluge osylaişa tosqauyl qoiyldy.
Qazırgı ideologtar «latynǧa köşkenımızde eşqandai saiasat joq» dep aitady. Ondai arzan sözdıŋ keregı joq. Būl naǧyz – saiasat, naǧyz saiasi qimyl. Aramyzdy ajyratqan küşke qarsy jauabymyz, soǧan qarsy bızdıŋ äreketımız. Sol üşın de latynşaǧa ötuımız kerek boldy. Jüielı, barlyq türkı tektes halyqtarǧa ortaq latyn ärpın taŋdauymyz kerek edı. Būryndary bızge taŋǧan qatelıkke taǧy da ūrynyp otyrmyz. Sondyqtan komissiia älıpbidı jetıldıre tüsu kerek.
– Özımız ırgelı el bolamyz dep jatqanda, türkı tektes halyqtarǧa ortaq älıpbidı taŋdaudyŋ ne qajettıgı bar? Olar da öz täuelsızdıgın alǧan, ırgesı bölek böten memleket emes pe?!
– Ärıden oilaǧan adam bolaşaqqa bügıngı Qazaq­stannyŋ şekarasynan asyp qarau kerek. Osyǧan keiıngı ötken jolymyzdy saralamai, tarihtyŋ ırı sabaqtarynan taǧlym almai, būralaŋ joldy betke alyp tūrmyz. Myna jer şarynyŋ Euraziia degen bır pūşpaǧynda myŋ ǧasyrlyq köşpendıler temırden üzeŋgı jasap, jylqyǧa auyzdyq salyp, bas bıldırıp, tarih sahnasyna şyqty. Şaşyrap jatqan taipalardyŋ basyn qosyp, bailanysa bıldı. Bırıne bırı süieu bolyp, bırın-bırı qoldau körsetıp, aty bölek bolsa da tamyry bır halyqtar bırge jasap keledı. Elmen eldı jaqyndastyratyn küre joly Jıbek joly bar-tūǧyn. Būl tūtastyqtyŋ bastauyn ūmytpauymyz kerek. Täuelsız elımızdıŋ baiandylyǧyn oilasaq, ortaq tarihymen bırge qarauymyz kerek. Olai bolmaǧanda öz qolymyzdy şapqandai bolamyz. Tarihi taǧdyrlastarymyzdan bas tartuymyz Orta Aziia dep atalatyn ülken kümbezdıŋ astyndaǧy ūlan-ǧaiyr jerdı jailap jatqan türkı tıldı bauyrlarymyzdyŋ arasyn aralap tastaǧanmen bırdei.
Basqany qoişy, tarihşy­lardyŋ özderı de qūdai-au, taŋ qalasyŋ, osyny zerdelei almai otyr. Adamnyŋ miy, ne oiy delık, ony özıŋe özıŋ şekteseŋ, tar oilauǧa mäjbürleseŋ, odan keler paida joq. Oily adam bır şeŋberdı emes, tūtas panoramany közdeuı kerek. Äzerbaijan, türık, qyrǧyz ben özbekpen bır jerde şūrqyrasyp, bır alaŋda tıl tabysa almai kelemız. Ärine, qol jetken jetıstıkterdı joqqa şyǧarmaimyn. Mäsele bärın qosyp bır memleket qūruda da emes. Onyŋ qajettıgı joq, bıraq yntymaqty memle­ketterdıŋ ruhyn ūstan­saq, müddesı men arǧy tarihy tūtas aumaq retınde ötken zamandardaǧydai airandai ūiyp, tūtastyqqa qol jetkıze bılse, bergı zamannyŋ, aldaǧy künnıŋ tosqauyldaryna bırge tötep bere alamyz. Türkı tıldesterdı bauyrym dep sezınıp, ruhani şekarasyn bekıtkenımız jön.
– Ondai qadamdar tek memleket deŋgeiınde ǧana emes, belgılı tūlǧalar men qoǧam qairatkerlerı tarapynan da boluy şart deisız ǧoi.
– 15 jyl boldy tūraqty türde «Jıbek jolyndaǧy sūhbat» seminarlaryn ötkızıp tūramyz. Būl – mädeniet­aralyq dialog tūrǧysyndaǧy jalpy mädeni jäne jalpy tarihi qūndylyqtardy odan ärı damytuǧa ärı saqtauǧa yqpal etıp, körşı elderdıŋ sarapşylarymen yntymaqtastyqty nyǧaitatyn halyqaralyq joba. Jobaǧa Qyrǧyzstan, Täjıkstan, Türkımenstan jäne Özbekstan ziialy şyǧarmaşylyq qauym ökılderı qatysuda. Soŋǧy jyldary būl jobaǧa asa män berılude. IýNESKO ısterı boiynşa komissiialardyŋ bas hatşylary Parijden kelıp te qatysty. Jiynǧa qatysuşylar – ülken bılım ielerı öte bedeldı tūlǧalar, naǧyz patriottar. Qanşama jyldan berı jaqyn tuystardai sezınıp saǧynamyz, hat alysamyz. Olar saiasatty jaqsy bıledı, el arasyndaǧy köpır boluǧa daiyn, sol üşın ırgetasyn qalauda.
– Olar da elderınıŋ ziialylary ǧoi, bıraq ekonomika men saiasattyŋ öz zaŋy bar emes pe?
– Bızdıŋ ünımızdıŋ estıluı üşın memleket basşylarynyŋ közıqaraqty tūlǧalardan bolǧany dūrys. Tıptı, jan-jaqty bılım­dar bolmasa da kezındegı Äbış, Aqseleu siiaqty el aǧalarynyŋ aqyl-keŋesın tyŋdai bılgenı abzal. Kezınde Būqar jyraudyŋ keŋesıne han basymen Abylai nege qalt etpei qūlaq asty. Däl osy qazırgı tarihi kezeŋde auzy dualylardyŋ körınetın jerı.
Mūhtar Äuezovtıŋ 120 jyl­dyǧyna bailanysty köp jer­lerdı aralap keldım. Halyqqa senu kerek, onymen sanasyp sendırtu kerek. Ol üşın bilık halyqtyŋ qamyn oilaitynyn körsete bılu kerek. Sonda halyqtyŋ qoldauy bolady.
Ras, imperiia sanamyzdy oisyratyp jıberdı. Osal sanaly adamdarmen bilık jasau oŋai. Odan qaldy būrys boljaulardyŋ arqasynda köp mūramyz köleŋkede qa­lyp qoiyp otyr. Ǧūndar, qarahandyqtardy özımızbız deuge sanamyz jetpeidı, ūlttyq müdde degenge alaközben qaraityn boldyq qoi. Jalpy, kedeisıŋ dep adamdy jäbırleuge bolmaidy, bıraq kedeişılık te adamdy azdyryp jıberedı. Būl da eskeretın jait.

Otyzynşy jyldary Kremldıŋ türkı tektes halyqtardyŋ arasyna jık salyp, bırın-bırı tüsınbeitındei etıp alystatu üşın kirillisany beiımdedı. Auyzekı tıldesseŋız özbek, qyrǧyz, qaraqalpaqty, no­ǧai-tatarlardy tüsıne alamyz. Alaida orystyŋ qarpıne auysqanda türkılerge onsyz da tüsınıktı ortaq dybystardyŋ öŋı ainalyp şyǧa keldı. Jazba düniesın oqyp bılu mümkın emes. Osylaişa kirillisa arqyly aramyzdy aşty, ajyratyp jıberdı. Olardyŋ ortaq ruhani mūrasyn oqyp-bıluge osylaişa tosqauyl qoiyldy

– Jaqynda oqyrmandar «Dılım» atty jinaǧyŋyzben qauyşty. «Tılden de, Dınnen de aiyrylyp qala jazdap, qaita oralǧan kezderımız boldy, älı de kezdesedı. Al, Dılden şe?! Odan arylu müldem mümkın emes, tek sol Dıl saulyǧy, Dıl tazalyǧy, Dıl berıktıgı arqyly ǧana jeke tūlǧa, derbes ūlt, täuelsız memleket retınde saqtalyp qaldyq» depsız. Boiymyzdaǧy Dılımızdıŋ berıktıgın jalpy onyŋ bar-joǧyn qalai tanimyz?
– Şyr etıp osy düniege kelgelı bergı ǧūmyrym jol üstınde keledı. Izdenıster men tolǧanystar joly. Jasym jetpıstıŋ beseuıne kelse de, sol baiaǧy jolda kelemın, köŋıl de, jürek te, sana-sezım de älı de äldenenı ızdeidı. Men özımnıŋ täi-täi basqan alǧaşqy qadamymnan bastap, anamnyŋ:
Tılı jat,
Dını jat,
Dılı jat
Jat elden taiaqty jep edıŋ, – degen joldardy änge qosyp jyrlaǧanyn estıp östım. Tıldı, dındı tüsınemın, dıldı ūǧyna bermeimın. Bıraq bala bolsam da, būl öleŋ joldaryndaǧy eŋ maŋyzdy oidyŋ osy Dılge kelıp tıreletının bükıl bolmys-bıtımmen sezıngendei bolatynmyn. Eger de menıŋ elıme, jerıme, ūltyma tamşydai bolsa da sebım tiıp, bılım dämın, ılım dänın, ǧylym närın bere bılsem, ol da – osy menıŋ Dılımnıŋ arqasy dep bılemın.
Sondai-aq, Injılde: «Vy – sol zemli. Esli je sol poteriaet silu, to chem sdelaeş ee solenoiu?» degen söz bar. Qazaqtyŋ «Et būzylsa tūz sebedı, tūz būzylsa ne sebedı?» degen sözındegı tūz da bızdıŋ dılımızge janasady. Abaidyŋ «tolyq adam» degen anyqtamasy bar. To­lyq adam myna jalǧanda qūlamaidy. Bailyqqa, man­sapqa ūrynbai keŋırek oilaidy. Dılı myqtylarǧa sonau student kezımızden üzeŋgıles bolǧan, «Jas tūlparlyq» zamandastarymdy qosar edım. Jany sūlu adamdar. Ondailardy qūdai jaratady. Dıl degenımız – abstrakty emes, adamdy jaqsylyqqa bastauşy qasiet. Tektılık degen ūǧymnan da maǧynasy keŋ. Ǧaşyqtyqqa, dostyqqa adal, şynaiy riiasyz adamdardyŋ dılı berık bolady.
– Aǧa, mereitoilarǧa qaita oralsaq, biyl Äigerımnıŋ kiız üiınde qoiylǧan «Eŋlık-Kebek spektaklıne de 80 jyl toldy. Elımızdıŋ sahnalarynda atalyp öttı degendı estımedım.
– Jaqynda Semeiden habar kelıp, kezınde äkemız oqyǧan peduchilişenıŋ oquşylarymen kezdesuge şaqyrdy. Bır kün boiyna jastardyŋ daiarlaǧan baǧdarlamasyn qyzyqtap, kelesı künı Börılıge bardyq. Būrynǧy M.Äuezov atyndaǧy sovhozdyŋ qazırgı Qasqaldaq degen auylynda oquşylar Eŋlık-Kebektı oinady. El degen – osy. Kiız üidıŋ şaŋyraǧyn kerıp jıberıp sahna jasap, şyn berılıp oinaǧanyna qarap qairan qaldym. Auyldyŋ erjetıp kele jatqan balala­ry ūly önermen ruhtanyp, közderı jainap tūr. Qazaq­tyŋ tūŋǧyş dramasyn nebır akademiialyq sahnalar elemese ne deiın, bıraq myna bala­lardyŋ talaby köŋılge ümıt ūialatady. Qaraşanyŋ suyǧyna qaramai jartylai qūrylǧan kiız üide, mahabbat dramasyn köz aldymyzdan ötkızgen jastardyŋ önerıne men degen ärtısterımızdıŋ ılese almasy anyq.
Būl öŋırde Abai men Şä­kärımdı, Mūhtardy şejıre­şı-jazuşy Beken İsabaevtan artyq bıletın adam joq. Onyŋ ūly Şaǧan jaqsy ızbasary bolyp, mūrajaidy ūstap otyr. Osy jiynda «Mūhtar Äuezovtıŋ kındık qany tamǧan jer» dep şartty türde bır şarşydai jerdıŋ telımın anyqtap, belgısın qoidy. Sol jerde eskı qūdyq ta bar edı ony da jaŋǧyrtyp jatyr.

Esterıŋızde bolsa, Lev Tolstoi «Qajymūratynda» äskerlerdıŋ äreketın aiyptap, tektı taulyqtarǧa ışı būryp, öz orysyn tıldeidı. «Slovo o polku İgoreve» de osyǧan ündes tuyndy. Mūhtar Omarhanūly da Kenesary joryǧynyŋ qatygezdıgın suretteu arqyly, onyŋ şalys basqan tūsyn körsetedı.
Qyrǧyzdyŋ Şoŋkemer degen jailauy bar, arǧy jaǧyn – qyrǧyz, ber jaǧyn qazaqtar mekendegen. Sonda Susamyr asuy bar. Salt atpen ötu qiyndau, qyrǧyzdar da solai oilaǧan bolar, qauıptı būl jaqtan kütpei, qalyŋ qoly basqa jaǧynda şep qūrady. Qazaqtar basyp kelgende, 70-80-dei auylda qalǧan qyrǧyzdyŋ äielderı bala bölengen besıktı alyp, qaruly qoldyŋ aldynan şyqqan eken. Sondaǧy qazaqtyŋ qataldyǧy qyrǧyzdardyŋ älı esınde…

Odan keiıngı Kereudegı kezdesuler de äserlı boldy. «Akme» dep atalatyn jastar odaǧyn qūrypty. Būl grek tılınen audarǧanda joǧary ruh degen ūǧymdy beredı. Jalyndaǧan türlerınen «Jas tūlpardyŋ» synyǧyn körıp, özderımen bolǧan ekı-üş saǧattai sūhbatymda köp jaidy aŋǧardym.
– Būryndary Äuezovtıŋ «Qaraközı» jazuşy atyn­daǧy äkem teatrdyŋ repertuarynan tüspeitın, teatrdyŋ bügıngı basşylarynyŋ re­per­tuarǧa qatysty köz­qarasy özgergen be? Klas­sika­lyq tuyndylardy afişadan körmeitın boldyq. Būl, ärine, nazymyz ǧoi. Odan bölek, «Han Kene» 1934 jyly alǧaş ret ärı soŋǧy ret sahnalanypty, jazuşynyŋ būl tuyndysy rejisserlerdıŋ közıne nege tüspei jür dep oilaisyz?
– Kenesary – soŋǧy hanymyz. 1968 jyly Han Kenenıŋ üŋgırınde boldym. Mümkın osy üŋgırde küŋırengen halqynyŋ qyspaqqa tüsken jaiyn oilap atqa qonǧan bolar. Jeŋıletının de bılgen. Būl soŋǧy hannyŋ emes, soŋǧy ret serpılgen qazaqtyŋ mınezı deuge bolady. Qazaqtyŋ tarihyn qanymen jazyp, qasietın ajalymen berıp ketken tūlǧanyŋ orny bölek.
Al endı öner tuyndysyna kelsek, mūndai jaǧdai Ūly suretkerler men Ūly şyǧarmalarǧa tän qūbylys qoi. «Svoi ne prav!» nemese «Aqiqat artyq!»
Esterıŋızde bolsa, Lev Tolstoi «Qajymūratynda» äsker­lerdıŋ äreketın aiyptap, tektı taulyqtarǧa ışı būryp, öz orysyn tıldeidı. «Slovo o polku İgoreve» de osyǧan ündes tuyndy. Mūhtar Omarhanūly da Kenesary joryǧynyŋ qaty­gezdıgın suretteu arqyly, onyŋ şalys basqan tūsyn körsetedı.
Qyrǧyzdyŋ Şoŋkemer degen jailauy bar, arǧy jaǧyn – qyrǧyz, ber jaǧyn qazaqtar mekendegen. Sonda Susamyr asuy bar. Salt atpen ötu qiyndau, qyrǧyzdar da solai oilaǧan bolar, qauıptı būl jaqtan kütpei, qalyŋ qoly basqa jaǧynda şep qūrady. Qazaqtar basyp kelgende, 70-80-dei auylda qalǧan qyrǧyzdyŋ äielderı bala bölengen besıktı alyp, qaruly qoldyŋ aldynan şyqqan eken. Sondaǧy qazaqtyŋ qataldyǧy qyrǧyzdardyŋ älı esınde…
Menıŋşe, ony qaita qoiu kerek. Onyŋ keŋ maǧynasyn, Hannyŋ arman-maqsatyn aşyp körsetetın myqty rejisser bolsa. Han Kenenıŋ qanypezerlıgın aitu qazaqtyŋ namysyna tiedı dei almaimyn. Ūly suretker Tolstoidy kım küstamalamady kezınde. Solai bolǧanda Äuezov nege aqtaluy kerek?!
– Ystyqköldıŋ jaǧalauyn­da jazuşynyŋ bır jaiy bar edı?!
– Şolpan-Atadaǧy saiajai-mūrajaiyn aityp otyrsyŋ ǧoi. Kezınde ony Qyrǧyzstan ükımetıne syiǧa bergenbız. Äkemnıŋ qyrǧyz jerındegı bır belgısı – ülken ruhani ortalyqqa ainaluy tiıs edı. Bıraq jūmys toqtap tūr.
Üidı kütıp ūstauǧa qarjy bölınbei keledı. Aulasynda äkemnıŋ özı otyrǧyzǧan toǧyz aq qaiyŋy biıktep ösıp, jaiqalyp tūr. Ekı eldıŋ ırı tūlǧalary bas qosqan qasiettı oryn edı, tozyp barady. Qaitaryŋyz degenge qyrǧyzdar namysqa tyrysyp bergısı joq. Qyrǧyz elınıŋ ielıgındegı üi bolǧan soŋ, bızdıŋ qolymyz bailauly.
– Aǧa, osy jyldyŋ basynda gazet tılşısınıŋ bır saualynda telefon arqyly bylaişa jauap berıp edıŋız. «Bız ol hattardy qolǧa tüsıruge qanşama ärekettendık. Būl mäselege kezınde Äbdıjämıl Nūrpeiısov te ülken köŋıl böldı. Es­tuımşe, S.Qarabaevtyŋ özı qaitys boldy. Al ol kısı­nıŋ ūrpaqtary hattardy «qūlypqa» salyp qoiyp otyr. Hattardy qaitara alsaŋyzdar, süiınşımdı bırınşı özım berem. Bälkım, ol hattardyŋ elge qaitatyn uaqyty da kelgen şyǧar, qazır qazaq-özbek bailanystary nyǧaiyp jatyr ǧoi» degen sözıŋızden keiın eleŋdep jür edık. Özbek aǧaiyndardyŋ qolynda jürgen jazuşynyŋ hattary turaly ne aitasyz?
– Mūhtar Äuezovtıŋ Özbek­stan Joǧarǧy Keŋesınıŋ deputaty jäne Densaulyq saq­tau ministrınıŋ orynbasary bolǧan Ǧainijamal Kutumovaǧa jazǧan hattary ǧoi. Osy jūmysqa belgılı ǧalym G.Pırälieva myqtap kırıstı. Äkemızdıŋ syilastyqpen amandyq bılgen bır-ekı hatyn körgende közımızge ottai basyldy. Al qalǧany basqa adamnyŋ qolymen jazylǧan jäne onyŋ äkemnıŋ hattary ekenıne ülken kümänımız bar. Qanşama azamattarymyz uystap aqşasyn alyp barǧanda satuǧa kelısım bermese, tübınde bır şikılık bar-au. Anyǧyn zertteuşı ǧalym aitady dep oilaimyn.
– Äŋgımeŋızge köp rahmet!

Sūhbattasqan
Aigül UAISOVA