Aiazy bet qarityn Astanada qystyŋ körkı mūz qalaşyǧymen enedı. Jaqynda şahardaǧy bas şyrşany qorşai ornalasqan mūzdan salynǧan sarai saltanatty türde aşyldy.
«Hanşatyrdyŋ» ırgesındegı būl qalaşyq – mūzdy ǧimarattardyŋ alǧaşqysy. Qazır mūnda qyzyqtap kelıp jatqan jūrttyŋ qatary kün sanap artuda.
Mūz qūrsanǧan qalaşyqtyŋ qaqpasyna osyndaǧy ertegı älemınıŋ «eltaŋbasyndai» bolyp «EHRO-2017» körmesı men «Täuelsızdıktıŋ 25 jyldyǧy» logotipterı qaşalypty. Sondai-aq, smartfondardyŋ sänı men mänı bolǧan äleumettık jelılerdıŋ belgılerı de osy jerde bederlengen.
Tabaldyryǧynan attap basqannan qiial älemınıŋ taŋǧajaiyp keiıpkerlerıne tap bolasyz. Mäz-meiram bolǧan kışkentailardyŋ nazary aldymen osy multfilm batyrlaryna auady. Būl maŋdaǧy basty beine – jaŋa jyldyŋ jarşysyndai bolǧan alyp qorazdyŋ mūz müsını.
Äues körıp jügırgen jas balalardyŋ ermegı – syrǧanaqtar. Qalaşyqta eŋ ırı ekı syrǧanaq saraiy salynypty. Oǧan qosa, mūz üstınde zyrǧyǧysy keletınder üşın konkilerdı jalǧa beretın düŋgırşekter qūrylǧan.
– Mūz qalaşyqtyŋ salynǧany jaqsy boldy. Endı ekı qyzymdy demalys künderı osynda jiı äkelıp tūramyn. Özderı oiyn qyzyǧyna kırıp ketkende jauraǧandaryn da bılmeidı. Tek qana syrǧanau üşın ǧana emes, seruen qūryp kelgender üşın otbasylyq demalysqa taptyrmaityn oryn dep oilaimyn. Jaŋa jyldyŋ qarsaŋynda neşe türlı merekelık şaralar bolatynynan qūlaǧdar boldyq, – dedı qala tūrǧyny Serjan Täŋırberdı.
Şynynda da būl jerde mereke künderı elordalyqtar men meimandardyŋ uaqytyn köŋıldı ötkızu maqsatynda arnaiy baǧdarlamalar äzırlenbek. «Astana Winter Fest» şarasynyŋ şeŋberınde konsertter, estafetalar jäne türlı fleşmobtar ūiymdastyrylady.
Sonymen qatar, taǧy üş negızgı mūz qalaşyq aşylady. Olar qalalyq äkımdıktıŋ aldyndaǧy alaŋda, Esıl özenınıŋ jaǧasynda jäne «Studentter» parkınde ornalasady. Al jalpy qala boiynşa ırılı-ūsaqty jetı mūz sarai salynady. Olar 11 syrǧanaqpen jäne 37 şyrşamen jabdyqtalady.
Atalǧan saiabaqtyŋ aumaǧyndaǧy jäne Esıl özenınıŋ jaǧalauyndaǧy mūz qalaşyqtary jeltoqsan aiynyŋ 25-ınde paidalanuǧa berıledı.
– Osy jylǧa deiıngı täjıribe mūz qalaşyqtary qysqy uaqytta būqaranyŋ eŋ köp jinalatyn orny ekenın körsettı. Soǧan bailanysty aǧymdaǧy jyly keluşıler üşın dumandy baǧdarlamalardyŋ sanyn köbeittık. Onyŋ ışınde konsert, türlı sport saiystary, mänerlep syrǧanaudan şeberlık sabaqtary, fleşmobtar, järmeŋkeler, sportşylardyŋ öner körsetuı – bärı bar. Mūnyŋ barlyǧy eŋ aldymen salamatty ömır saltyn nasihattaidy, – deidı qalalyq Mädeniet basqarmasynyŋ baspasöz hatşysy Mira Moldahmetova.
Al jaŋa jyl toilanatyn tünı saǧat 21.00-den bastap 03.00-ge deiın «Hanşatyr» men qalalyq alaŋ maŋaiynda ülken konsert ötpek.
Orynbek ÖTEMŪRAT
