Q.Quanyşbaev atyndaǧy Memlekettık akademiialyq qazaq muzykalyq drama teatrynda dauylpaz aqyn, körnektı qoǧam qairatkerı Säken Seifullin muzeiınıŋ qūrylǧanyna otyz jyl toluyna arnalǧan ädebi-muzykalyq keş öttı.
Säkennıŋ ömırı men şyǧarmaşylyǧy keşegı Aqmola, bügıngı Astana tarihymen jymdasyp örılgen. Osyndaǧy üş synyptyq qalalyq uchilişede bılım aldy. Elordadan alys emes Ahmet töre auylynda balalarǧa sabaq berdı. 1917 jyly Aqmolaǧa köşıp kelıp, «Jas qazaq» saiasi jäne äleumettık-mädeni qoǧamyn qūrdy. Aita berse, Aqmola topyraǧynda arqaly aqynnyŋ basqan ızderı tolyp jatyr. Alaida, qara basynan tuǧan halqyn biık qoiǧan qairatker qyzyl imperiianyŋ qaqpanynan qūtylmady. 1938 jyly jalǧan jalamen atyldy. 1957 jyly jary Gülbahramnyŋ ötınışımen aqtaldy. Arada bıraz jyldar ötken soŋ, Qazaq KSR ministrler keŋesınıŋ jarlyǧymen 1988 jyly 21 aqpanda Aqmolada Säken muzeiı aşyldy. 1995 jyly 17 tamyzda Elbasy Aqmolaǧa kelgen saparynda, aqyn muzeiıne soǧyp, «Asyl babamyz Säken Seifullinnıŋ äruaǧy täuelsız elımızdı jelep-jebep jürsın» degen tılegın jazyp qaldyrǧan.
Mıne, sodan berı de doptai domalap otyz jyl öttı. Mūrajaidyŋ alǧaşqy basşysy Roza Asylbekova ardaqty azamattyŋ mūrasyn jinaqtauda köp eŋbek sıŋırdı.
Keş barysynda muzei direktory, aqyn, Memlekettık syilyqtyŋ laureaty Nesıpbek Aitūly jinalǧandarǧa qūttyqtau lebızın bıldırdı. Ūjymnyŋ bırınşı basşysy Roza apai pen aqyn mūrasynyŋ janaşyry, qairatker Oralbai Äbdıkärımovke qūrmet körsettı. Qapaş Qūlyşeva, Serık Ospanov, Qanat Jünısov, Janǧali Jüzbai sekıldı tanymal önerpazdar äueletıp än salyp, kümbırletıp küi töktı. Sondai-aq, jastar aqynnyŋ öleŋderın oqyp, änderın şyrqady. Söitıp, Säken muzeiınıŋ mereiı bır biıkke köterıldı.
