Nauryz merekesı qarsaŋynda elordalyq därıgerler päter kıltterıne ie boldy
Biylǧy nauryz merekesı elordalyq jedel medisinalyq järdem stansasynyŋ därıgerlerı üşın naǧyz nesıbelı boldy. Olar mereke qarsaŋynda üilı bolyp, Astana qalasy äkımınıŋ orynbasary Ermek Amanşaevtyŋ qolynan päter kıltın aldy. Sondai-aq, mekeme jaŋa 8 sanitarlyq kölıkke ie boldy.
Medisina qyzmetkerlerın Astana qalasy äkımınıŋ atynan qūttyqtaǧan Ermek Ämırhanūly jedel medisinalyq järdem stansasyn damytuǧa äkımdık erekşe köŋıl bölıp otyrǧanyn, soǧan bailanysty arnaiy keşendı jospar qabyldanǧanyn jetkızdı.
– Jedel järdem stansasy – täulık boiy damyldamai, tūrǧyndarǧa jedel qyzmet körsetetın mekeme. Olardyŋ jūmystary ünemı qarbalas üstınde. Soǧan qaramastan osy salada ūzaq jyldar boiy üzbei jūmys ıstep kele jatqan jandar barşylyq. Qalalyq äkımdık därıgerlerdıŋ äleumettık jaǧdaiyn jaqsartuǧa, medisinadaǧy tüitkılderdı şeşuge qoldan kelgendı jasap jatyr. Bügın, mıne, 30 därıger üilı boldy. Būl – äkımdık qabyldaǧan keşendı jospardyŋ aiasynda jüzege asyrylǧan igı şarua. Būǧan qosa, jūrtşylyqqa körsetıletın qyzmettıŋ sapasyn arttyru üşın 8 sanitarlyq kölık berılıp otyr. Aldaǧy uaqytta taǧy 40 kölıktıŋ kıltın tabystau josparda bar. Al sızderden talap etıletını – joǧary bılıktılık pen sapaly qyzmet. Säuır aiyna qarai jedel järdem elordanyŋ kez kelgen tūsyna 10 minutta jetu kerek degen maqsat qoiyp otyrmyz. Būiyrtsa, būl mejege jetetınımızge senımdımız. Qalalyq äkımdıktıŋ densaulyq saqtau salasyn jaqsartuǧa baǧyttalǧan jūmystary aldaǧy uaqytta da jalǧasyn taba bermek, – dedı Ermek Amanşaev.
Qalalyq äkımdık tarapynan päter kıltıne ie bolǧan därıgerlerdıŋ quanyşynda şek joq. Mysaly, Qorǧanbek Senbı atty därıgerdıŋ jedel järdem qyzmetınde ıstegenıne 12 jyl bolypty. Ekı balasy bar. Ūzaq jyldar boiy päter jaldap kelgen Qorǧanbektıŋ äkımdıkke aitar alǧysy mol. «Astana qalasynda basty mäsele – baspana. Üiıŋ joq bolsa, küiıŋ de joq. Şynymdy aitsam, basynda bızge üi berıledı degende sengen joqpyz. Būl mäsele bız üşın qol jetkızbes arman siiaqty edı. Bıraq, ümıtımız üzılgen joq. Endı, mıne, otbasymyzben osynau quanyşty sättıŋ kuäsı bolyp, jüregımız jarylardai bolyp otyrmyz» dedı ol.
Bügınde Astana qalasy jedel järdem medisinalyq stansasynda 1239 adam eŋbek etedı. Mūnda künıne 2 myŋnan astam şaqyrtu tüsedı. Al tūrǧyndardyŋ ömırın saqtau üşın kündelıktı jūmys ısteitın brigadanyŋ sany – 85.
Jedel järdemnıŋ basty maqsaty – şaqyrtylǧan jerge neǧūrlym jyldam jetu. Qazırgı taŋda şaqyrtularǧa barudyŋ uaqytyn azaitu maqsatynda qolǧa alynǧan şarualar barşylyq. Qyzmet körsetu sapasyn arttyru üşın zamanaui qūral-jabdyqtardy engızuge de erekşe den qoiylǧan. Biyl qyrküiek aiynda jedel medisinalyq järdem stansasynyŋ jaŋa ǧimaraty paidalanuǧa berılmek. Onda tūrǧyndarǧa qyzmet körsetetın brigadalardyŋ sany artyp, därıgerlerge tüsetın jükteme azaiary sözsız.
Saltanatty jiynda küi tögılıp, «Şattyq» ansamblınıŋ qyzdary myŋ būrala bi biledı. Ūlystyŋ ūly künın ūlyqtaǧan ūjym Qasymjomart atty balaqaidyŋ tūsauyn kesıp, şaşu şaşyp, qazaqtyŋ jön-joralǧysyn jasady.
Qymbat TOQTAMŪRAT
