Keşe elorda äkımdıgınde ötken apparat otyrysy Parlament Mäjılısınıŋ kezekten tys jäne Astana qalasy mäslihatynyŋ kezektı sailauyna, sondai-aq, Nauryz meiramyna daiyndyq mäselelerıne arnaldy.
Jeksenbı, iaǧni, 20 nauryz künı bas şaharda 213 dauys beru uchaskesı jūmys ısteidı. Qala basşysy Ädılbek Jaqsybekov būl oqiǧanyŋ maŋyzdylyǧyn atap ötıp, äkımdıktıŋ barlyq qyzmetkerlerıne ülken jauapkerşılık jükteletının taǧy da eskerttı.
Bügınge deiın 50 myŋdai elordalyq tūrǧyn öz sailau uchaskesın anyqtau maqsatynda Astana qalasy äkımdıgınıŋ qyzmetterın paidalanǧan. Osy oraida adamdarǧa yŋǧaily boluy üşın sailau uchaskesın anyqtaudyŋ bırneşe joly ūsynylǧan. Olarǧa e.astana.kz elektrondy qyzmetter veb-portaly, astana.gov.kz resmi saity, Bailanys ortalyǧy, qoǧamdyq oryndarda ornalasqan aqparattyq düŋgırşekter, sonymen qatar, 1414 nömırıne SMS-habarlama joldau servisı, «WhatsApp» jäne «Telegram» mobildı qosymşalary jatady. Mūndai igılıkterdıŋ barlyǧy sailau kezınde är kısınıŋ azamattyq qūqyǧyn jüzege asyruǧa baǧyttalǧan.
Biyl demalys jäne merekelık künder nauryzdyŋ 19-y men 23-ı aralyǧyna säikes kelıp tūr. Sondyqtan elordalyqtardyŋ demalysyna jäne qoǧamdyq qauıpsızdıkke basa nazar audarylady. Qalada Nauryz meiramy 14 jerde toilanady. Negızgı şara 21 nauryzda «Saryarqa» respublikalyq velotregınde ūiymdastyrylady. Sondai-aq, «Astana Arena» stadionynyŋ aldyndaǧy alaŋda halyqtyq seruen ötıp, etnoauyl aşylady. Atalǧan meiramǧa orailastyrylǧan şaralar «Qazaq elı» jäne «Bäiterek» monumentterınıŋ janynda, qalalyq alaŋda, «Studenttık» jäne «Jerūiyq» saiabaqtarynda da ötedı. Merekelık baǧdarlama aiasynda konsert qoiylyp, kiız üi tıgılıp, altybaqan ornatylady, qonaqtarǧa ūlttyq taǧamdar ūsynylady.
«Baǧdarlama qanyq ärı qyzyqty boluy tiıs, är adam özınıŋ būl ıske ortaqtas ekendıgın sezınuı kerek. Būl rette barlyq qalalyq qyzmetter küşeitılgen rejimde jūmys ısteuı qajet» dedı elorda äkımı. Jalpy, Nauryz meiramy qarsaŋynda Astanada 70-ten asa şara ötkızu josparlanǧan.
Mūnymen qosa, jiyn barysynda jol tösemınıŋ sapasy da talqylandy. Avtomobil joldary basqarmasynyŋ basşylyǧyna ärbır merdıger boiynşa taldau jürgızu tapsyryldy. Al jūmysyn sapasyz oryndaǧandar qalalyq joldardy salu men jöndeuge būdan bylai jıberılmeitın bolady. Ärine, klimattyq jaǧdailarǧa bailanysty oryndy sebepter de boluy mümkın. Mysaly, biyl qysta aua temperaturasy kürt özgerıp otyrdy. Degenmen, joldar – qalany abattandyru mäselesınıŋ asa maŋyzdy bölıgı.
«Bärın qolǧa alu kerek. Aǧymdaǧy jylǧa josparlanǧan ūzyndyǧy 14 şaqyrymdy qūraityn 11 köşenı jöndeu jetkılıksız. Jol jöndeu jūmystaryn basym tärtıpte qarjylandyru kerek» dedı Ädılbek Jaqsybekov.
Audan äkımderıne de köşelerdı aralap, qalpyna keltırudı qajet etetın tūstaryn anyqtau mındetteldı. Jöndeu-qalpyna keltıru jūmystary nauryz aiynyŋ soŋynda bastaluy kerek.
Materialdy “Astana aqşamy” gazetınıŋ astana-akshamy.kz resmi saityna sılteme jasaǧanda ǧana paidalanuǧa rūqsat etıledı.
