Nūr-Sūltan qalasynyŋ 2050 jylǧa deiıngı damu strategiiasyn äzırleu aiasynda qalalyq äkımdık pen «Zertteu jäne konsalting ortalyǧy» döŋgelek üstel ötkızıp, bas şahardyŋ jūrtşylyqqa jailylyǧy – basty maqsat ekenın jetkızdı.
Jiynǧa jergılıktı bilık ökılderı men sarapşylar, «Astanabasjospar» ǦZJİ» mamandary, bırqatar kompaniia men zertteu ortalyqtarynyŋ ökılderı jäne qala tūrǧyndary qatysty.
– Nūr-Sūltan – halqynyŋ sany asa jyldam qarqynmen ösıp kele jatqan qala. Būl jaǧynan elordany tek Qytaidyŋ millioner qalalarymen ǧana salystyruǧa bolady. Jūrtşylyqty baspanamen qamtamasyz etu üşın tūrǧyn üiler qūrylysy qarqyndy jürgızılıp jatqanmen, Nūr-Sūltandy baspanamen qamtu jaǧynan būrynnan qalyptasqan älemdegı örkeniettı qalalarmen salystyruǧa kelmeidı, – deidı «Strategy Partners» jobasynyŋ jetekşısı Nikita Popov.
Onyŋ sözınşe, elordada turisterge arnalǧan muzei siiaqty mädeni nysandar älı de jetkılıksız. Sondai-aq ol qalada aşyq aspan asty alaŋdardyŋ köp, al jabyq keŋıstıktegı qoǧamdyq oryndardyŋ az ekenın atap öttı.
Sarapşylardyŋ aituynşa, Nūr-Sūltan 2050 jylǧa qarai älemdegı bılım men densaulyq salasy jetılgen, qauıpsız ärı jaily, ömır süruge barynşa qolaily qalalardyŋ bırı bolady. Ol üşın qazırgı uaqytta strategiialyq jospar äzırlenıp jatyr. Taqyrypty keŋınen talqylaǧan jiynǧa qatysuşylar şahardyŋ bolaşaǧy jaily öz oilarymen bölısıp, ūsynystaryn da aitty. Olardyŋ bırı şahardyŋ bolaşaǧynan görı qazırgı jaǧdaiyna köbırek köŋıl bölu qajettıgın aitsa, Artem Pavelev esımdı qatysuşy Aqbūlaq arnasy jaǧalauy men keibır saiabaqtyŋ qoqystan tazartylmaitynyn synǧa alyp, kärız qūdyqtaryn jaiau jürgınşıler joldarynyŋ boiynan körgenıne taŋdanysyn bıldırdı. Alaida Qalalyq ortany regenerasiialau basqarmasy basşysynyŋ orynbasary Amanjol Alpysbaev kärız qūdyqtarynyŋ orny tek normativ boiynşa belgılenetının jetkızdı.
Öz kezegınde aldaǧy uaqytta qaladaǧy velojoldardyŋ trotuarlardan bölek salynuy kerektıgın tılge tiek etken «Käsıpodaqtardyŋ Qazaqstan sport jäne dene şynyqtyru qoǧamy» qoǧamdyq qorynyŋ vise-prezidentı Baqytjan Esjanov Nūr-Sūltan qalasynda tez soǧylatyn bıregei sport nysandaryn saludy ūsyndy. Hokkei korty men şaǧyn futbol alaŋyn qamtityn būl keşennıŋ jobasy, bırınşıden, jer resurstaryn ünemdeuge mümkındık berse, ekınşıden, balalarǧa sportpen tegın ainalysuǧa jol aşpaq.
Şara barysynda tılşılerge bergen sūhbatynda urbanistika ortalyǧynyŋ jetekşısı Ashat Säduov 2030 jylǧa deiıngı jaŋa formattaǧy keşendı jospardy 2020 jyldan bastap jüzege asyru közdelıp otyrǧanyn aitty.
– Jospar boiynşa aldaǧy uaqytta elordada qauıpsız köşeler qatary köbeiedı. Äsırese köşeler jaiau jürgınşılerge keŋ ärı yŋǧaily etıp jasalady. Mysaly, sol jaǧalaudaǧy tyǧyzdyq oŋ jaǧalaumen salystyrǧanda 1,5 esege ülken. Sol jaǧalaudaǧy ǧimarattardyŋ araqaşyqtyǧy alşaq. Negızınen, kölık jürgızuşılerıne yŋǧaily. Būl tūrǧyda 2019-2023 jyldarǧa arnalǧan elordadaǧy yqşam qūrylysynyŋ keşendı josparyna äkımdık tarapynan 1,5 trln teŋge qarastyryldy. Būl qarjyǧa keşendı jospar boiynşa gazdandyru, injenerlık jelıler men nöser kärızderınıŋ jūmystary da jürgızılmek. Aita ketu kerek, tek abattandyrudyŋ özıne 500 million teŋge qajet, – deidı ol.
Elordalyqtardyŋ ömır süru sapasyn jaqsartu mäselesı Astana ekonomikalyq forumynda da keŋınen talqylanatyn bolady.
