Almaty audanynda «Halyq qatysatyn biudjet» jobasy aiasynda dauys beruge rūqsat beru üşın jobalyq ūsynystardy ırıkteu kezeŋı aiaqtaldy.
Audan tūrǧyndarynan būl jobaǧa biyl 74 ötınım kelıp tüstı, saraptamalyq keŋes dauys beru kezeŋıne 72 jobany dauys beru kezeŋıne jıberu turaly qauly ettı. Jalpy, «Halyq qatysatyn biudjet» jobasy Astanada 2019 jyldan berı ıske asyrylyp keledı. Tabysty bastama aiasynda ötken jyl ışınde qalanyŋ tört audanynda jüzden astam aula abattandyryldy.
Joba aiasynda tūrǧyndar qalany abattandyruda jergılıktı biudjet qarajatyn böluge qatysa alady. Osy oraida aumaqty kögaldandyru, trotuarlardy, pandustardy, aryqtardy salu jäne jöndeu, ortaq paidalanu oryndaryn qūru, jöndeu jäne jaryqtandyru, bordiurlerdı, qoqys tastaityn jerlerdı joiu, ortaq paidalanu oryndarynda kürkeler, oryndyqtar, urnalar jäne balalardyŋ oinauy, eresek tūrǧyndardyŋ demaluy üşın jabdyqtar men konstruksiialar ornatu, balalar oiyn alaŋdaryn ornatu, jöndeu jäne jaryqtandyru erekşe eskerılgen.
Respublikalyq «Halyq qatysatyn biudjet» baǧdarlamasy alǧaş ret Saryarqa audanynda bastalǧan bolatyn. Osyǧan orai, 2021 jyly 45 joba, 2022 jyly 71 joba boiynşa tūrǧyndardan ötınış kelıp tüsken. Jalpy, Saryarqa audanynyŋ aumaǧynda soŋǧy üş jylda 125 aula, 32 qoǧamdyq keŋıstık abattandyryldy. Byltyr 23 aula «Halyq qatysatyn biudjet» baǧdarlamasy aiasynda abattandyryldy. Būdan bölek, audan aumaǧynda 22 aula körıktendırıldı jäne 8 qoǧamdyq keŋıstık qaita jandandyryldy.
Sondai-aq, būl baǧdarlama trenajer, futbol, basketbol, voleibol alaŋdarynda, aula aumaqtarynda jäne jalpy paidalanu oryndarynda tazalyqty qamtamasyz etudı qajet etedı. Joba maqūldanǧannan keiın aulalardy kürdelı jöndeu jūmystary bastalyp, gülzarlar, saiabaqtar, qoǧamdyq keŋıstıkter salu, aumaqtardy kögaldandyru jäne t. b. igılıktı ıs-şaralar jüzege asyrylatyn bolady. Olardyŋ barlyǧy tūrǧyndardyŋ ötınışterı negızınde jürgızıledı.
«Halyq qatysatyn biudjet» jobasyna qatysu üşın tūrǧyndar elektrondy-sifrlyq qoltaŋbany paidalana alady. Dauys beru 6-24 säuır aralyǧynda Almaty audany äkımı apparatynyŋ resmi saitynda ötedı.
