Nūr-Sūltan qalasy äkımdıgınıŋ «Naz» memlekettık bi teatrynyŋ qūrylǧanyna şirek ǧasyrǧa juyqtady. Basynda elorda filarmoniiasy janynan halyq bi ansamblı bolyp jūmysyn bastaǧan atalmyş öner ūjymynyŋ jeke otau bolyp şyqqanyna 1 nauryz künı 15 jyl toldy. Bügınderı belgılı, ırgelı mädeni oşaqqa ainalǧan bi teatrynyŋ negızın käsıbi horeograftar Erkebūlan jäne Qadişa Aǧymbaevtar qalady.
Bi önerı degende, aldymen äigılı bişı, Qaz KSR halyq ärtısı Şara Jienqūlovanyŋ aty esımızge tüsedı. Ūlttyq bi önerınıŋ negızı qalanyp, tanyluyna Şara Baimoldaqyzy ölşeusız üles qosty. Alaida öner bır ornynda tūrmaidy. Özegın saqtap, örletu – bügıngı jäne keleşek ūrpaq enşısınde. «Naz» teatrynyŋ maqsaty da – ūlttyq folklordy nasihattau jäne qazaqtyŋ ūlttyq bilerın damytu. Osy baǧytta mädeni oşaq körkemdık jetekşısı, bas baletmeisterı, Qazaqstannyŋ eŋbek sıŋırgen qairatkerı Qadişa Aǧymbaevanyŋ jetekşılıgımen orasan zor jūmys atqaryp otyr.
Oŋtüstık Qazaqstan oblysy Sairam audanynda tuǧan Qadişa Ermekbaiqyzy A.Seleznev atyndaǧy Almaty horeografiialyq uchilişesın jäne Abai atyndaǧy Qazaq memlekettık pedagogikalyq universitetın bıtırdı. Alǧaşqy oqu ornynda halyq biı ansamblınıŋ bişısı mamandyǧyn alsa, ekınşısınde horeografiia pänderınıŋ oqytuşysy bılıktılıgın igerdı. Qazır ekeuın qatar alyp, ūştastyryp otyr.
Kışkentai kezınde tuǧan Aqsukent auylyna A.Seleznev atyndaǧy Almaty horeografiialyq uchilişesınıŋ ūstazdary kelıp, önerlı balalardyŋ arasynan Qadişa Ermekbaiqyzyn taŋdap alyp, Almatyǧa oquǧa şaqyrdy. Anasy jıbergısı kelmegen edı, alaida äjesı: «būl balanyŋ taǧdyry şyǧar, baǧyn bailamaiyq» degen soŋ köndı. Rasymen, önerı ömırıne ainaldy.
Eŋbek jolyn asa körnektı memleket qairatkerı Özbekälı Jänıbekov ūiymdastyrǧan Süiınbai atyndaǧy Almaty oblystyq filarmoniiasy janyndaǧy «Altynai» folklorlyq ansamblınde bastady. Osynda on ekı jyl bişı boldy. Astanamyz Alatau bauraiynan Arqa tösıne köşkenıne az uaqyt ötkende önerın örıstetu maqsatymen elordaǧa keldı. 1999 jyly qala filarmoniiasy janyndaǧy «Naz» halyq bi ansamblıne qabyldandy. Al ansambl jeke otau bolyp qūrylǧanda körkemdık jetekşılıgın qolyna aldy.
Mıne, sodan berı ūlttyq bidı damytu, ūlttyq folklordy nasihattau jolynda ter tögıp kele jatyr. Köptegen konserttık baǧdarlamalardy ūiymdastyryp, horeografiialyq spektaklderdı qoidy. Atap aitqanda, Kültegın zamanynan bastap täuelsızdıgımızdı alǧanǧa deiıngı kezeŋdı beineleitın «Tūiǧyndar», «Nūrǧisa», «Myŋ bır tünnıŋ bır künı», «U – Sana», «Äzım äŋgımesı» horeografiialyq spektaklderın, «Aq pen qara», «Bolero» horeografiialyq kompozisiialaryn ūsyndy.
«Naz» memlekettık bi teatrynyŋ jetıstıkterı de az emes. Ş.Jienqūlova atyndaǧy II respublikalyq qazaq biı baiqauynyŋ, Novosibirsk qalasynda ötken horeograftardyŋ II halyqaralyq baiqauynyŋ, Groznyi şaharynda ūiymdastyrylǧan M.Esambaev atyndaǧy IH halyqaralyq festivalınıŋ laureaty atandy. «Şabyt» şyǧarmaşyl jastardyŋ IV halyqaralyq festivalınde bas jüldenı ielendı. Qazaqstan Jastar odaǧy syilyǧy men Qytaida ötken baiqau nätijesınde «Altyn müsın» iegerı boldy.
Niderlandy, Türkiia, Resei, Fransiia, Belgiia, Qytai, BAÄ, Chehiia, Bolgariia, Katar, Norvegiia, İzrail, Ukraina elderınde gastroldık saparmen boldy. Elımızde jäne özge memleketterde ötken sporttyq jäne mädeni şaralarǧa atsalysty. Qazır Dubaida ötıp jatqan «EKSPO» körmesınde öner körsetıp jatyr.
