Oquşylar arasyndaǧy 45-ınşı Halyqaralyq fizika olimpiadasy öz märesıne jettı. Qazaqstan qūramasy 3 altyn jäne 2 kümıs medal enşılep, komandalyq esep boiynşa 85 memlekettıŋ arasynda üzdık ondyqqa endı.
Nazarbaev universitetınde ūiymdastyrylǧan bılımdıler dodasy ekı kezeŋnen tūrdy. Teoriialyq synda 383 oquşyǧa tapsyrmalar jazylǧan 3 konvert taratylyp, ony oryndauǧa 5 saǧat uaqyt berıldı. Qatysuşylardyŋ qai elden kelgendıgı de eskerılıp, säikesınşe esepterı de öz tılderıne audaryldy. Şetelden kelgen bıraz professorlardyŋ aituynşa, Astanadaǧy IPHO olimpiadasynyŋ tapsyrmalary ädettegıden qiyn ärı köp bolǧan eken.
Alaida olar fizikanyŋ qarqyndy damyp kele jatqandyǧyna bailanysty oquşylar da myqty bolu kerektıgın aityp, sūraqtar deŋgeiın laiyqty dep tauypty.
Auqymy keŋ olimpiadany ūiymdastyruşy el retınde Bılım jäne ǧylym ministrlıgıne, qala äkımşılıgı men «Daryn» ǧylymi-praktikalyq ortalyǧyna artylǧan jük jeŋıl bolmaǧany anyq. Qazaq elıne alǧaş ret at basyn tıregen älem jastarynyŋ ǧylym bäigesın halyqaralyq deŋgeide ötkızıp qana qoimai, meimandardyŋ köŋılın qaldyrmai, ūiymdastyru jaǧyn kem-ketıksız jasau qajet. Qazaqstan būl üdeden şyǧa bıldı. Ol qatysuşylardyŋ ystyq yqylastarynan aiqyn aŋǧaryldy. Jas fizikter, äsırese, Astana säuletıne taŋǧalysyp, onyŋ körkı el damuyn paş etıp tūrǧandyǧyn jasyrmady. Bır aptaǧa sozylǧan olimpiada kezınde olar qalany aralap qana qoimai, Burabai kurortyna da baryp qaitty. Ondaǧy etno-mädeni auylda tıgılgen kiız üilerge bas sūǧyp, ūlttyq taǧamdardan däm tatyp, bişılermen bırge qazaq bilerın de bilep ülgerdı.
«Bärı öz uaqytynda öttı. Bızdı jaqsy ornalastyrdy, oquşylarmen de ünemı bailanysta boldyq. Qatysuşylar jadynda Qazaqstandaǧy būl olimpiada mäŋgı saqtalatynyna kümänım joq» dedı Saraevo universitetınıŋ professory Raifa Musemich.
«Osy olimpiadaǧa byltyr da qatysqanmyn. Alaida, jarystan kümıs medalmen oraldym. Kelesı IPHO elımızde ötetının bılgende, bır jyl boiy eŋbektenıp, aldymyzǧa «altyn alamyz» degen maqsat qoidyq. Qosymşa kıtaptardy aqtarmai, mektep baǧdarlamasymen ǧana daiyndalǧan balalardyŋ qinalyp qalǧany ras. Öitkenı, osy jyly universitettıŋ alǧaşqy kursynda üiretıletın esepter boldy» deidı altyn medal ielengen otandasymyz Ämır Bırälin. Sonymen qatar, ol olimpiadanyŋ jabylu saltanatynda bärınen oza şauyp, joǧary körsetkışten körıngen 7 absoliuttı jeŋımpazdyŋ qataryna kırdı.
Jeŋımpazdardy Beibıtşılık jäne kelısım saraiynda QR Bılım jäne ǧylym ministrı Aslan Särınjıpov pen IPHO olimpiadasynyŋ prezidentı Hans Iordans marapattady. İsa Danat, Nūrbek Dınmūhammed, Tūrsynbek Nūrislam, Ämır Bırälin jäne Däulet Qūrmantaev el märtebesın bırınşı ondyqtaǧy segızınşı satyǧa köterdı. Al, alǧaşqy üştıkten Qytai, Taivan jäne Oŋtüstık Koreia komandalary körındı.
Endıgı kezekte būl olimpiada 2015 jyly Ündıstannyŋ Niu-Deli qalasynda ötkızıledı.
Mädina JAQYP
