Jaqynda elordada «A.İ. balalar teatrynyŋ» aşyluyna orai «Ūr, toqpaq» qazaq halyq ertegısınıŋ premerasy öttı. Muzykalyq jas körermen teatrynyŋ sahnasynda qoiylǧan spektakldıŋ qoiuşy rejisserı – Mädeniet salasynyŋ üzdıgı Beibıt Qūsanbaev, qoiuşy suretşı – Altynai Jüsıpälı, horeograf – Aqbota Şoiynbek, hormeister – Jūldyz Telhojaeva.
«A.İ. teatrynyŋ» direktory, änşı, aktrisa, Qazaqstannyŋ eŋbek sıŋırgen qairatkerı Aigül İmanbaevanyŋ aituynşa, balalar teatrynyŋ qūramy bır jarym jyl būryn Nūr-Sūltan qalasynda aşylǧan «A.İ. öner akademiiasy» şäkırtterınen qūraldy. Bastapqyda būl akademiia 30 balamen ǧana aşylsa, qazır şäkırtter sany 300-ge juyqtady. Oǧan qatysatyn balalardyŋ jasy – 6-17 jas aralyǧynda.
– «A.İ. balalar teatrynda» üş qūram bar. Bırınşı qūram – qazaqşa, ekınşı qūram – orysşa, üşınşı qūram aǧylşynşa spektaklderge qatysady. Nege jūmysty «Ūr, toqpaq» qazaq halyq ertegısımen bastadyq? Öitkenı mūnda qazaqtyŋ koloritı bar. Europa men Amerikany «Külşe qyz» ben «Şrekpen» taŋǧaldyra almaimyz. Sol üşın aldymen ūlttyq ertegını qolǧa aldyq. Ärine, josparymyzda älemdegı balalar teatry festivalderıne qatysu bar. Ondaǧy niet balalar önerdegı baǧyn synap, özderınıŋ naq baǧasyn alsa eken deimız. Alda «Ūr, toqpaqty» qazaq tılınde ǧana emes, orysşa da, aǧylşynşa da qoiamyz, – deidı Aigül İmanbaeva.
Äsiia NŪRBEKQYZY
